وبلىستا بىرنەشە ۆەدومستۆولاردىڭ, قوعامدىق ۇيىمداردىڭ قاتىسۋىمەن «جولداعى قابىلداۋ» اكتسياسى جاريالاندى. وسى شارا شەڭبەرىندە ايماقتاعى تاس جولدار بويىندا جۇمىستار جۇرگىزىلۋدە.
بۇدان بۇرىن 1 ماۋسىمنان 15 تامىز ارالىعىندا وبلىستاعى اۆتوموبيل جولدارىن ساقتاۋ ماقساتىمەن «نازار اۋدارىڭىز, اۋىر سالماقتى كولىك!» اكتسياسى جاريالانىپ, ناتيجەسىندە تاسىمالداۋشىلارعا قاتىستى 116 اكىمشىلىك ءىس انىقتالىپ, ولارعا اكىمشىلىك حاتتاما تولتىرىلعان بولاتىن. ال جىلدىڭ ءبىرىنشى جارتىسىندا جۇرگىزۋشىلەرگە كولىك زاڭناماسىن بۇزعانى ءۇشىن 41560 063 تەڭگەنى قۇرايتىن 561 اكىمشىلىك قۇجات تولتىرىلىپ, اۆتوكولىكتىڭ وتكەنى ءۇشىن الىم رەتىندە بيۋدجەتكە 73 ميلليون تەڭگە تۇسكەن ەدى. سوندىقتان قوستاناي وبلىسى بويىنشا كولىكتىك باقىلاۋ ينسپەكتسياسى ماۋسىم ايىندا تۇرعىندارعا ءتۇسىندىرۋ جۇمىستارىن جۇرگىزىپ, جۇرتشىلىقتىڭ, اسىرەسە تاسىمالداۋشىلاردىڭ ەلىمىزدىڭ كولىك زاڭناماسىنداعى وزگەرىستەر مەن تولىقتىرۋلار جونىندە حابارسىز ەكەنىن انىقتاعان بولاتىن.
بۇگىندە اتالعان اكتسيانىڭ ماقساتى – تاسىمال ىسىندە سىبايلاس جەمقورلىقتىڭ الدىن الۋ, تاسىمالداۋشىلارمەن وزەكتى ماسەلەلەر جونىندە اشىق اڭگىمە جۇرگىزۋ.
شارا اياسىندا وبلىس اۋماعىنان وتەتىن قارابۇتاق-كومسومول-دەنيسوۆ-رۋدنىي-قوستاناي جانە قوستاناي-مامليۋتكا تاس جولدارى بويىندا كولىك جۇرگىزۋشىلەرىمەن اڭگىمەلەر وتكىزىلدى. سونىمەن قاتار, وبلىستىق كولىكتىك باقىلاۋ ينسپەكتسياسىنىڭ قىزمەتكەرلەرى ازاماتتاردىڭ قوعامدىق پىكىرىن تىڭداپ, ولاردىڭ وتىنىشتەرى مەن ارىزدارىن قاراۋ ماقساتىندا سەنىم تەلەفوندارىن دا ۇسىندى.
ءنازيرا جارىمبەتوۆا