راديكاليزم, ەكسترەميزم جانە تەرروريزمگە قارسى تۇرۋ – قازاقستان پرەزيدەنتى ن.ءا.نازارباەۆتىڭ «قازاقستان-2050» ستراتەگياسى: قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋىندا ايتىلعان باسىم باعىتتاعى مىندەتتەردىڭ ءبىرى.
جاسىراتىنى جوق, بۇگىنگى كۇننىڭ تولعاقتى دەگەن ماسەلەسى – تەرىس اعىمنىڭ جەتەگىندە كەتكەن جاستاردىڭ ب ۇلىڭعىر بولاشاعى. «باتپانداپ كىرگەن مىسقالداپ شىعادى» دەگەن بار. مۇنىڭ زاردابىن ءبىز قازىردىڭ وزىندە تارتا باستادىق. جاعداي وسىلايشا كۇردەلى بولىپ قالىپتاسقاندا قاراعاندى وبلىسىندا جاستار اراسىنداعى ءدىني ەكسترەميزمنىڭ الدىن الۋ بويىنشا جۇمىستاردى كۇشەيتۋ قولعا الىنا باستادى. مۇنداي مۇباراك شارۋادا جاستار ىسىمەن اينالىساتىن باسقارماعا وبلىستىق ورتالىق مەشىت كومەك قولىن سوزباقشى. بۇل تۋراسىندا ارنايى ۇيىمداستىرىلعان بريفينگ بارىسىندا وبلىستىق جاستار ساياساتى ماسەلەلەرى جونىندەگى باسقارما باسشىسى ميراس قۇتتىباي مالىمدەدى.
بريفينگتە ءدىني ەكسترەميزمنىڭ الدىن الۋ جۇمىستارىن كۇشەيتۋ ماقساتىندا قاراعاندى وبلىسىنىڭ جاستار ساياساتى ماسەلەلەرى جونىندەگى باسقارما مەن قمدب-ءنىڭ قاراعاندى وبلىستىق ورتالىق مەشىتىنىڭ جاستار ءىسى جونىندەگى ءبولىمى اراسىندا ءوزارا ىنتىماقتاستىق جونىندەگى مەموراندۋمعا قول قويىلدى.
بۇل مەموراندۋم جاستارىمىزدىڭ ساناسىندا ءبىزدىڭ حالىققا ءتان ءداستۇرلى ءدىني نانىمدى جانە راديكالدى يدەولوگياعا قارسى يممۋنيتەتتى قالىپتاستىرۋعا باعىتتالعان كەشەندى شارالاردى جەتىلدىرۋدى ماقسات ەتەدى.
بۇدان بولەك اتالعان مەموراندۋم جاستار اراسىنداعى ءدىني قاتىناستار سالاسىندا ساراپتامالىق جانە الەۋمەتتىك زەرتتەۋلەر جۇرگىزۋدى قاراستىرادى. بەلگىلى ءبىر ءدىني ۇستانىمى بار «زاماناۋي جاس ادامنىڭ پورترەتىن» جاساۋ دا جوسپاردا بار. سونىمەن قاتار, جاستارمەن جۇمىس ىستەيتىن كوشباسشىلار مەن ماماندارعا ارنالعان ارنايى كۋرستار ۇيىمداستىرىلماقشى. ال اقپاراتتار تاراتۋ ءۇشىن الەۋمەتتىك جەلىلەرگە ارقا سۇيەۋ كەرەكتىگى ايتىلدى.
«جاستاردىڭ الەۋمەتتىك جانە ماتەريالدىق تۇرعىدان قورعالماۋى, باعالاۋ مەن پايىمداۋدا ماكسيماليزمگە ۇرىنۋ, پسيحولوگيالىق شيكىلىك, بوتەن پىكىرگە تاۋەلدى بولۋ – وسى ايتىلعان بىرنەشە سەبەپتەردىڭ ءوزى-اق راديكالدى جانە بۇلدىرگى يدەيالاردىڭ وڭاي تاراۋىنا مۇمكىندىك بەرەدى دەپ ايتۋعا بولادى», – دەدى ميراس قۇتتىباي.
قايرات ءابىلدينوۆ,
«ەگەمەن قازاقستان»
قاراعاندى