تۇركيا پرەزيدەنتى رەدجەپ تايپ ەردوعان 9 تامىزدا سانكت-پەتەربۋرگكە كەلەدى. تۇركيا ۆيتسە-پرەمەرى مەحمەت شيمشەك رەسەيلىك ارىپتەسى اركادي دۆوركوۆيچپەن كەزدەسۋى بارىسىندا وسىلاي دەدى.
«ەلشى مىرزا ءبىزدىڭ قۇرمەتتى پرەزيدەنتىمىزدىڭ (رەدجەپ تايپ ەردوعان) تامىزدىڭ 9-ىندا پەتەربۋرگتە بولاتىنىن راستاپ بەردى», - دەدى شيمشەك.
تۇرىك ۆيتسە-پرەمەرى بۇعان ەكى ەلدىڭ اراسىنداعى قارىم-قاتىناستى جەدەلدەتىپ قالپىنا كەلتىرۋ كەرەك بولىپ تۇرعانىن قوستى.
اركادي دۆوركوۆيچ ءوز كەزەگىندە تۇركيانىڭ سۋ-24 ۇشاعىن اتىپ تۇسىرىلگەنى ءۇشىن كەشىرىم سۇراعانى انكارا مەن ماسكەۋدىڭ اراسىنداعى بايلانىستى قايتا قالپىنا كەلتىرۋگە جول اشىپ بەرگەنىن جەتكىزدى. شەنەۋنىكتىڭ ايتۋىنشا, شيمشەكپەن ارادا جۇرگىزىلگەن كەلىسسوزدەر سانكت-پەتەربۋرگتە ەكى ەل پرەزيدەنتتەرى كەزدەسۋى ءۇشىن «مازمۇندى نەگىز» جاساپ بەرۋگە ءتيىس.
«ءبىز كونسترۋكتيۆتى كەلىسسوزدەرگە دايىنبىز. ءبىزدىڭ كەزدەسۋلەرىمىزدەن كەيىن مينيسترلەر دەڭگەيىندە كەزدەسۋلەر وتەتىن بولادى. ەكى جاقتىڭ قارىم-قاتىناسىن قالپىنا كەلتىرۋ ساۋدا-ەكونوميكا سالاسىنداعى ءىس-قيمىلدى بىرتىندەپ جانداندىرۋ ماقساتىندا كەزەڭ-كەزەڭىمەن جۇرگىزىلۋى ءتيىس دەپ ەسەپتەيمىز», - دەدى رەسەي ۆيتسە-پرەمەرى.
رەسەي مەن تۇركيا اراسىنداعى داعدارىس وتكەن جىلدىڭ قاراشا ايىندا تۇرىك يسترەبيتەلى سيريا اسپانىندا رەسەيدىڭ سۋ-24 بومبارديروۆششيگىنە شابۋىل جاساعاننان كەيىن پايدا بولدى. رەسەي پرەزيدەنتى ۆلاديمير پۋتين مۇنى تەررورشىلارعا بولىسۋ ماقساتىنداعى «تۋ سىرتتان سوققى بەرۋ» رەتىندە باعالادى. وسىدان كەيىن انكارامەن ارادا ەكونوميكالىق قارىم-قاتىناسقا توسقاۋىل قويىلدى.
ەكى اراداعى سۋىق قاباق بيىلعى ماۋسىم ايىندا ەردوعان اتىپ تۇسىرىلگەن ۇشاق پەن قازا تاپقان ۇشقىش ءۇشىن كەشىرىم سۇراعاننان كەيىن بىرتىندەپ جىلي باستادى.
تۇرىك پرەزيدەنتىنىڭ رەسەيگە كەلۋى انادولى جەرىندە مەملەكەتتىك توڭكەرىس ورىن الا جازداعاننان كەيىن جۇزەگە اسقالى تۇر. ب ۇلىكشىلدەر كوتەرىلىسى باسىلدى. وعان قاتىستارى بار 10 مىڭنان استام اسكەريلەر مەن ازاماتتار تۇتقىنعا الىندى. ەلدە وسىنداي ءدۇمپۋ بولعالى جاتقانىن سيريا جەرىندەگى رەسەي اسكەريلەرى تۇرىك اسكەريلەرىنىڭ ءبىر-بىرلەرىمەن سويلەسكەن راديوسيگنالدارى ارقىلى انىقتاپ, ونى جىلدام تۇرىك باسشىلىعىنا جەتكىزدى. سونىڭ ناتيجەسىندە رەدجەپ تايپ ەردوعان امان قالدى. مۇنىڭ سوڭىنان ب ۇلىكشىلدەردى اۋىزدىقتاۋعا قول جەتتى. بۇعان تۇرىك حالقىنىڭ كوشەگە شىعىپ, ءوز ەلى پرەزيدەنتىنە قولداۋ كورسەتۋلەرىنىڭ اسەرى از بولعان جوق.
ال رەسەي ۇشاعىن اتىپ تۇسىرگەن تۇرىك ۇشقىشتارى قاماۋعا الىندى.
مۇرات ايتقوجا