«ەگەمەن قازاقستان» رەسپۋبليكالىق گازەتى» اق باسقارماسىنىڭ توراعاسى دارحان قىدىرالى جازۋشى, مەملەكەت قايراتكەرى ءابىش كەكىلباي ۇلىنىڭ قارا شاڭىراعىنا ارنايى بارىپ, كلارا اپايمەن كەزدەستى.
«بۇگىن ءابىش اعانىڭ ۇيىنە كىرىپ شىقتىق... ارايلى ازاتتىقتىڭ العاشقى جىلدارىندا باسىلىمنىڭ باسشىسى بولعان ابىز اعا "ەگەمەندى" دەگەن ءسوزدى "ەگەمەن" دەپ وزگەرتىپ, گازەتتىڭ بۇگىنگى اتاۋىنىڭ قالىپتاسۋىنا ىقپال ەتكەن ەكەن. ابزال اعا تۇركى اكادەمياسىن دا جاقسى كوردى, جاقىن تارتىپ, بارلىق ىرگەلى شارالارىمىزدىڭ تورىندە وتىردى. ءابىش اعانى قاتتى ساعىنىپپىز... اعامىزدىڭ ارۋاعىنا قۇران باعىشتاپ, اقتىق ساپارعا اتتانعان كابينەتىندە تىنىستاپ, ماۋقىمىزدى باستىق... كلارا اپاي اعىل-تەگىل اڭگىمە ايتتى... بۇيىرسا, كەزىندە ءوزى باسقارعان ۇجىم رەتىندە ءابىش اعانىڭ مول مۇرالارىن تۇگەندەۋ ىسىنە بارىنشا اتسالىسامىز. كىتاپxاناسىن اشۋ, ەگەمەندە جارىق كورگەن ماقالالارىن كىتاپ ەتىپ باستىرۋ, قارىمدى پۋبليتسيستەرگە ارنايى سىيلىق تاعايىنداۋ جانە تاعى باسقا شارالاردى اتقارۋ جاعىن ويلاستىرىپ وتىرمىز. جاتقان جەرىڭىز جايلى, ماڭگىلىك مەكەنىڭىز پەيىش بولسىن جان اعا - الاشتىڭ ابىزى...», – دەپ جازدى فەيسبۋكتەگى پاراقشاسىنا د.قىدىرالى.