[caption id="attachment_52648" align="aligncenter" width="560"] akorda.kz[/caption]
مەملەكەت باسشىسى پرەمەر-مينيستر كارىم ءماسىموۆتى قابىلدادى.
Akorda.kz-ءتىڭ مالىمەتى بويىنشا, كەزدەسۋ بارىسىندا ك.ءماسىموۆ نۇرسۇلتان نازارباەۆقا ەل دامۋىنىڭ نەگىزگى الەۋمەتتىك-ەكونوميكالىق كورسەتكىشتەرى, باستى مەملەكەتتىك باعدارلامالاردىڭ ىسكە اسىرىلۋى, سونداي-اق جەر رەفورماسى جونىندەگى كوميسسيانىڭ قازىرگى قىزمەتى تۋرالى باياندادى.
ەلباسى جىل سوڭىنا دەيىن بىرقاتار ماڭىزدى مىندەتتەردى شەشۋدى قامتاماسىز ەتۋ قاجەتتىلىگىن اتاپ ءوتتى.
«بىرىنشىدەن, ەكونوميكالىق كورسەتكىشتەردىڭ تومەندەۋىنە جول بەرىلمەۋى ءتيىس, ول ءۇشىن بارلىق جاعداي جاسالعان, قاجەتتى قاراجاتتار بولىنگەن, جۇمىستىڭ ءتيىستى باعىتتارى انىقتالعان. ەكىنشىدەن, استىق جيناۋ مەن كۇزگى-قىسقى كەزەڭگە دايىندىق ماسەلەلەرىنە نازار اۋدارۋ قاجەت. سونىمەن بىرگە ەكسپو-2017 كورمەسى مەن 2017 جىلعى قىسقى ۋنيۆەرسياداعا ازىرلىكتى جالعاستىرۋ كەرەك», – دەدى قازاقستان پرەزيدەنتى.
بۇدان بولەك, نۇرسۇلتان نازارباەۆ ەلدىڭ ودان ءارى يندۋستريالىق-يننوۆاتسيالىق دامۋىن قامتاماسىز ەتۋ جانە تۇرعىنداردىڭ ءال-اۋقاتىن ارتتىرۋ ءۇشىن شارالار قابىلداۋ قاجەتتىگىنە نازار اۋداردى.
سونداي-اق ول جۋىق ارادا جەر رەفورماسى جونىندەگى كوميسسيانىڭ جۇمىس ناتيجەلەرىن ۇسىنۋدى تاپسىردى.
«تامىز ايىنىڭ سوڭىندا ءبىز ۇكىمەتتىڭ كەڭەيتىلگەن وتىرىسىن وتكىزىپ, الدىن-الا قورىتىندىلارىن جاساۋ جانە ارى قارايعى ءىس-قيمىلدى ايقىنداۋ ءۇشىن بارلىق اتالعان ماسەلەلەردىڭ شەشىمىن ازىرلەۋدى سۇرايمىن», – دەدى مەملەكەت باسشىسى.
ەلباسى كەزدەسۋ قورىتىندىسى بويىنشا بىرقاتار ناقتى تاپسىرما بەردى.
ايدار ورىسباەۆ