ۇلتىمىزدىڭ عۇلاما عالىمدارى مەن قوعام جانە مەملەكەت قايراتكەرلەرىنىڭ مەرەيتويلىق جىلدارىنا وراي, «قازپوشتا» اق «ەستەلىك جانە مەرەيتويلىق كۇندەر» تاقىرىبىمەن سەريالى پوشتالىق ماركالاردى اينالىمعا ەنگىزۋدە.
سولاردىڭ قاتارىندا – ءاليحان بوكەيحان مەن ىبىراي التىنسارين جانە قايىم مۇحامەدحانوۆ سىندى ۇلت زيالىلارىنىڭ قۇرمەتىنە ارنالعان پوشتا ماركالارىنىڭ ارقايسىسى 2,5 ملن. دانا تارالىممەن شىعارىلادى دەپ جوسپارلانعان. عالىمدار مەن ويشىلدارعا ارنالعان پوشتالىق ماركالاردى اينالىمعا شىعارۋ شاراسى ءاليحان بوكەيحاننىڭ 150 جىلدىعى مەرەيتويىنىڭ قۇرمەتىنە ارنالعان پوشتا ماركاسىن تانىستىرۋ راسىمىمەن باستالدى.
«اق جول» دەموكراتيالىق پارتياسىنىڭ ورتالىق كەڭسەسىندە وتكەن جيىنعا ەلىمىزگە بەلگىلى الاشتانۋشىلار مەن وسى جولدا جانىن پيدا ەتكەن قايراتكەرلەر ءومىرىن زەرتتەپ جۇرگەن ازاماتتار جانە قوعام بەلسەندىلەرى قاتىستى. وتىرىسقا جەتەكشىلىك ەتكەن «اق جول» دەموكراتيالىق پارتياسىنىڭ توراعاسى, ءماجىلىس دەپۋتاتى ازات پەرۋاشەۆ پارتيانىڭ پارلامەنتتىك فراكتسياسىنىڭ اتىنان وتكەن جىلدىڭ جەلتوقسان ايىندا «قازپوشتا» اق-تىڭ باسشىلىعىنا ارنايى جولدانعان ساۋالدا حالىقارالىق دەڭگەيدە مويىندالعان, ساڭلاق ساياساتكەر, مەملەكەت جانە قوعام قايراتكەرى, عۇلاما عالىم, كوسەمسوزدىڭ شەبەرى ءاليحان بوكەيحاننىڭ 150 جىلدىق مەرەيتويى قۇرمەتىنە ارنايى پوشتا ماركاسىن شىعارۋ قاجەتتىگى ايتىلعاندىعىن ەسكە ءتۇسىردى.
«وسىنداي حاتتىڭ نەگىزىندە ايتىلعان وي-پىكىرىمىز, مىنەكي, بۇگىن ورىندالىپ, «قازپوشتا» اق جەتەكشىلەرىنىڭ شەشىمىمەن نومينالى 5 تەڭگەلىك پوشتالىق ماركالار اينالىمعا ەنگىزىلۋدە. بۇل تاۋەلسىز ەلىمىزدىڭ باياندى بولاشاعى ءۇشىن باسىن بايگەگە تىككەن ارىس ازاماتتارىمىزدى ۇلىقتاۋ مەن ولاردى ناسيحاتتاۋدىڭ ۇتىمدى ادىستەرىنىڭ ءبىرى», – دەدى ازات تۇرلىبەك ۇلى. «ۇلتتىق بانك بانكنوت فابريكاسى» رەسپۋبليكالىق مەملەكەتتىك كاسىپورنىندا باسىلىپ شىققان ماركاعا قوعام قايراتكەرىنىڭ ناق 110 جىل بۇرىن پەتەربۋرگتە تۇسكەن سۋرەتى سالىنعان. «بۇل ءا.بوكەيحاننىڭ 1906 جىلى 8 شىلدە كۇنى پەتەربۋرگكە بارعان كەزىندە ءبىرىنشى مەملەكەتتىك دۋمانىڭ دەپۋتاتى رەتىندە تۇسكەن سۋرەتى. الايدا, ول جەردە سۋرەت استىنا ونىڭ اتى-ءجونى «حانوۆ» دەپ قاتە جازىلعان. قازىرگى كەزگە دەيىن بۇل فوتو بىزگە بۋللا فوتواتەلەسىنىڭ ءونىمى رەتىندە بەلگىلى.
ال ءاليحاننىڭ الەمگە ايگىلەنگەن ەڭ تانىمال بەينەسى وسى بولعاندىقتان, ءبىز اقىلداسا كەلە وسى سۋرەتتى پوشتالىق ماركادا قايتا جاڭعىرتۋدى ءجون كوردىك», – دەدى «الاش» عىلىمي-زەرتتەۋ ينستيتۋتىنىڭ ديرەكتورى سۇلتان حان اقق ۇلى. ايتا كەتەيىك, سالتاناتتى شارا اياسىندا وفسەتتىك باسىلىمدا 2 ءتۇستى بوياۋمەن سالىنعان ءاليحان بوكەيحاننىڭ سۋرەتى بەينەلەنگەن كولەمى 26ح18 مم. ماركا جاپسىرىلعان كونۆەرتتەرگە ارنايى پوشتا مورقالىبى دا باسىلدى.
سونداي-اق, «اق جول» پارتياسى وكىلدەرىنىڭ ۇسىنىسىمەن جۇزەگە اسقان جوبانىڭ تۇساۋكەسەر راسىمىنە قاتىسقان الاشتانۋشى عالىم ەربول تىلەشوۆ پەن ساعىمباي جۇماعۇلوۆ, سونداي-اق, كەنجەبولات جولدىباي, قايىربەك سادۋاقاسوۆ, ءاليحان بوكەيحاننىڭ تۋىسى اسىلحان تىلەۋقابىل, «قازپوشتا» اق باسقارماسى توراعاسىنىڭ ورىنباسارى ساۋلە ەگەمبەرديەۆا, «اق جول» قدپ ورتالىق كەڭەسىنىڭ يدەولوگيالىق جۇمىس جونىندەگى حاتشىسى ءسابيت بايدالى سىندى ازاماتتار ءسوز سويلەپ, ءاليحان بوكەيحاننىڭ 150 جىلدىعى مەن كەلەسى جىلعى الاش اۆتونومياسىنىڭ قۇرىلعانىنا 100 جىل تولاتىنىنا وراي ۇسىنىس-پىكىرلەردى ورتاعا سالىپ تالقىلادى.
نۇرلىبەك دوسىباي, «ەگەمەن قازاقستان»