كەشە سىرتقى ىستەر مينيسترلىگى مەن قازاقستاننىڭ باس رەداكتورلار كلۋبى «قازاقستان شەتەلدىك باق كوزىمەن» اتتى ءىىى حالىقارالىق بايقاۋدىڭ قورىتىندىسىن شىعاردى.
وسى جىلعى ۇيىمداستىرۋ كوميتەتىنە 29 ەلدەن كەلىپ تۇسكەن 60 ءوتىنىمنىڭ اراسىنان قازىلار القاسى تمد, ەۋروپا, امەريكا, ازيا, تاياۋ شىعىس جانە افريكا بويىنشا بەس جەڭىمپازدى انىقتادى. قازىلار القاسىنىڭ قۇرامىنا سىرتقى ىستەر مينيسترى ەرلان ىدىرىسوۆ, سىرتقى ىستەر ءمينيسترىنىڭ ورىنباسارى رومان ۆاسيلەنكو مەن باس رەداكتورلار كلۋبىنىڭ پرەزيدەنتى بيبىگۇل جەكسەمباي كىردى.
ە.ىدىرىسوۆ بيىل بايقاۋعا تۇسكەن وتىنىمدەردىڭ ساپاسى مەن ەلىمىزدىڭ دامۋ سەرپىنىنە, استانادا بولاتىن ەكسپو-2017 حالىقارالىق مامانداندىرىلعان كورمەسى مەن الماتىدا بولاتىن قىسقى ۋنيۆەرسيادا ويىندارى سەكىلدى الداعى ءىرى حالىقارالىق ءىس-شارالارعا شەتەلدىك باق تاراپىنان قىزىعۋشىلىقتىڭ ءوسىپ كەلە جاتقانىن اتاپ ءوتتى. «وسى جىلى بايقاۋىمىزعا الەمنىڭ ءتورت بۇرىشىنان كەلىپ تۇسكەن وتىنىمدەر سانىنىڭ, ەڭ باستىسى – ولاردىڭ ساپاسىنىڭ ارتقانى ءبىزدى ءسۇيسىندىردى. الەمدەگى باق-تاردا قازاقستاننىڭ الەۋمەتتىك-ەكونوميكالىق جانە ساياسي دامۋىنا, ونىڭ حالىقارالىق قاتىناستارىنا دەگەن قىزىعۋشىلىقتىڭ ۇدايى ارتۋى بايقالۋدا. بۇل قازاقستاننىڭ جانە ەلباسى نۇرسۇلتان نازارباەۆتىڭ اشىق ساياساتىنىڭ ناقتى جەمىسى دەپ بىلەمىن», – دەدى ە. ىدىرىسوۆ.
قازىلار القاسى تمد اۆتورلارىنىڭ اراسىنان رەسەيدىڭ «ارگۋمەنتى ي فاكتى» اپتالىق گازەتىنىڭ ءتىلشىسى مارينا ناباتنيكوۆانى «دامۋ ءۇشىن جارالعان. قازاقستانمەن ساۋدا-ەكونوميكالىق قارىم-قاتىناستار قالاي دامىپ كەلەدى؟» اتتى ماقالاسى ءۇشىن ماراپاتتاۋ تۋرالى شەشىم قابىلدادى. ەۋروپالىق اۆتورلار اراسىنان HuffingtonPost.fr ونلاين-باسىلىمىندا جاريالانعان «ەكسپو-2017: بولاشاق ەنەرگياسى قانداي بولادى؟» ماقالاسى ءۇشىن فرانتسۋز ءجۋرناليسى پاۋلين گاۆريلوۆ ماراپاتتالدى.
قازىلار القاسى امەريكا قۇرلىعىنان جەڭىمپاز بولىپ Washington Times گازەتىندە جاريالانعان «بولاشاق» ءورشىل باعدارلاماسىمەن شەتەلدە وقيتىن قازاق جاستارى بۇرىنعى كەڭەس رەسپۋبليكاسىن كوتەرۋگە مۇددەلى» اتتى ماقالانىڭ اۆتورى, اقش ءجۋرناليسى دۋگلاس بەرتون تانىلدى. ال تاياۋ شىعىس جانە افريكا ەلدەرى ۇمىتكەرلەرىنىڭ اراسىنان «The Jordan Times» گازەتىندە جاريالانعان «يوردانيا مەن قازاقستاننىڭ الەمدەگى بەيبىتشىلىككە دەگەن كوزقاراسى ورتاق» اتتى ماقالاسى ءۇشىن يوردانيا ءجۋرناليسى موحاممەد گازال (Mohammad Ghazal) ماراپاتتالدى.
ازيا ەلدەرى ءۇمىتكەرلەرىنىڭ اراسىنان «Yeni Cag» گازەتىندە جارىق كورگەن «ەۋرازيا كىلتى قازاقستاننىڭ دامۋى مەن تۇراقتىلىعىندا» ماقالاسىنىڭ اۆتورى, ءتۇركيا ءجۋرناليسى كۋرشاد زورلۋ جەڭىمپاز اتاندى.
جەڭىمپازداردان باسقا بەس ءوڭىردىڭ ارقايسىسىندا قوسىمشا جۇلدەگەرلەر انىقتالدى, ولاردىڭ اۆتورلارى قازىلار القاسىنان العىس حاتتارىن الاتىن بولادى. بايقاۋ جەڭىمپازدارى قىركۇيەك ايىنىڭ باسىندا استانا مەن الماتى قالالارىنا جانە بۋراباي كۋرورتىنا ساپار شەگە الادى.
جولدىباي بازار,
«ەگەمەن قازاقستان»