قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى باقىتجان ساعىنتاەۆ بەيجىڭدە قكپ وك ساياسي بيۋروسى تۇراقتى كوميتەتىنىڭ مۇشەسى, قحر مەملەكەتتىك كەڭەسىنىڭ ۆيتسە-پرەمەرى چجان گاوليمەن كەزدەسۋ وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى.
اتالعان كەزدەسۋ قازاقستان پرەزيدەنتى نۇرسۇلتان نازارباەۆتىڭ قىركۇيەكتىڭ باسىنداعى قىتايعا ساپارى جانە حانچجوۋ قالاسىنداعى G20 سامميتىنە قاتىسۋ قارساڭىندا وتكىزىلىپ وتىر.
باقىتجان ساعىنتاەۆ پەن چجان گاولي قازاقستان پرەزيدەنتى نۇرسۇلتان نازارباەۆ جاريالاعان «نۇرلى جول» جاڭا ەكونوميكالىق ساياساتى جانە قحر توراعاسى سي تسزينپيننىڭ «ءبىر بەلدەۋ, ءبىر جول» باستاماسى شەڭبەرىندەگى جوبالاردى ءجۇزەگە اسىرۋ جولدارىن تالقىلادى. ول ەلدەر الدىندا ءوزارا ءتيىمدى ءارىپتەستىكتىڭ جاڭا پەرسپەكتيۆالارىن اشاتىن بولادى.
2020 جىلعا دەيىن ەكىجاقتى تاۋار اينالىمىن 40 ملرد. اقش دوللارىنا دەيىن جەتكىزۋ جونىندە ەكى ەل كوشباسشىلارى العا قويعان ءمىندەتتى جۇزەگە اسىرۋ ماقساتىندا قازاقستان رەسپۋبليكاسى پرەمەر-مينيسترىنىڭ ءبىرىنشى ورىنباسارى ساۋدا كەدەرگىلەرىن جويۋ جونىندەگى ەرەجەلەردى قاراستىرا وتىرىپ, ساۋدا-ەكونوميكالىق ىقپالداستىقتى ءارتاراپتاندىرۋ بويىنشا ءىس-قيمىلداردىڭ بىرلەسكەن باعدارلاماسىن ازىرلەۋدى ۇسىندى.
كەلىسسوزدەر بارىسىندا سونداي-اق, يننوۆاتسيالىق ىنتىماقتاستىق, كەڭ اۋقىمدى كولىك, ەنەرگەتيكا سالاسىنداعى, اۋىل شارۋاشىلىعىنداعى جوبالار شەڭبەرىندەگى ءوزارا ءىس-قيمىلدار ماسەلەسى دە تالقىلاندى.
قحر-عا ساپارى شەڭبەرىندە پرەمەر-ءمينيستردىڭ ءبىرىنشى ورىنباسارى سيان قالاسىندا بولىپ, شەنسي پروۆينتسياسى پارتكومىنىڭ حاتشىسى لوۋ تسينتسزيانمەن كەلىسسوزدەر جۇرگىزۋدى, قىتاي بيزنەسى وكىلدەرىمەن كەزدەسۋدى, جوعارى تەحنولوگيالار, اەروعارىشتىق تالدامالار, بيوفارماتسەۆتيكا, اوك سالالارىنداعى تەحنولوگيالىق ورتالىقتارمەن تانىسۋدى جوسپارلاپ وتىر.