وسىدان ءۇش جىل بۇرىن الماتىدا قازاقستان تەڭىز فلوتى ءۇشىن الەمدىك دەڭگەيدەگى كاسىبي ماماندار دايارلاۋعا رۇقسات رەتىندە ءۇش رەت قاتارىنان ءداستۇرلى كەمە قوڭىراۋى سوعىلعان-دى. وسىلايشا قازاقستان تەڭىز اكادەمياسى (قتا) تۇساۋىن كەسىپ, اكادەميا كادەتتەرى قازاقتىڭ وندىردەي ۇل-قىزدارى ەكەنىن كورگەنبىز.
جاقىندا قازاقستان تەڭىز اكادەمياسىنىڭ العاشقى تۇلەكتەرىنە ديپلوم تاپسىرۋ سالتاناتى كەلىپ جەتتى. وڭتۇستىك شاھاردا 4 جىلدىق وقۋ باعدارلاماسىن ءتامامداپ, باكالاۆر دارەجەسىن العان العاشقى 16 كادەت وسىلايشا تەڭىزدەگى كاسىبي قىزمەتىنە كوشەدى.
قتا 2012 جىلى قازاقستان رەسپۋبليكاسى پرەزيدەنتىنىڭ تاپسىرماسى بويىنشا تەڭىزدەگى مۇناي-گاز كەن الاڭدارىن يگەرۋدى قولداۋ جانە ءداستۇرلى مۇناي-گاز سەكتورىنان تىس قازاقستان ازاماتتارىن جۇمىسپەن قامتۋ ماقساتىندا قۇرىلعانى ايان.
سول كەزدە قتا «تەڭىزشەۆرويل» جشس-ءنىڭ تىكەلەي قولداۋىمەن قۇرىلىپ, وعان قازاق-بريتان تەحنيكالىق ۋنيۆەرسيتەتى (قبتۋ) سەرىكتەس بولدى. قازاقستان تەڭىز اكادەمياسىنىڭ حالىقارالىق سەرىكتەستىگىنە تەڭىز ءبىلىمى سالاسىنداعى كونگلومەرات – STC-Group (نيدەرلاند) كومپانياسى شاقىرىلدى. «شەۆرون شيپپينگ» كومپانياسى كادەتتەردىڭ حالىقارالىق دەڭگەيدەگى زاماناۋي كەمەلەردە تاجىريبەدەن وتۋىنە كاسىبي تۇرعىدا قولداۋ كورسەتىپ, تاجىريبە ساباقتارىن ۇيىمداستىردى. سونداي-اق, اكادەميانىڭ التى تۇلەگىن ستاجەر رەتىندە قابىلدادى.
– «تەڭىزشەۆرويل» كاسىپورنى اتىنان اكادەميا تۇلەكتەرىن وقۋدى ءبىتىرۋىمەن قۇتتىقتايمىن! ءوز بويلارىنداعى ماقساتكەرلىكتىڭ, ەل ۇكىمەتى مەن سەرىكتەستەرىمىزدىڭ قولداۋى ارقاسىندا سىزدەر تەڭىز تاسىمالى سالاسىندا حالىقارالىق تۇرعىدا مويىندالعان قازاقستاندىق مامان بولاسىزدار, – دەدى تشو باس ديرەكتورىنىڭ مىندەتىن اتقارۋشى يمەر بوننەر.
اكادەميا نورۆەگيانىڭ Kongsberg Maritime كومپانياسى شىعارعان ەڭ وزىق ناۆيگاتسيالىق جۇيەسىمەن جانە ايرىقشا جاعدايلاردى ۇقساتۋ ءۇشىن پايدالانىلاتىن قۇرالدارمەن جابدىقتالعان. قتا-نىڭ اۋقىمدى جانە ىنتالاندىراتىن وقۋ ۇدەرىسى اعىلشىن تىلىندە جۇرگىزىلەدى. اكادەميا تۇلەكتەرى قازاقستاندىق جانە شەتەلدىك كەمەلەردە الەمنىڭ ءار تۇكپىرىندە جۇمىس جاساي الاتىن جوعارى بىلىكتى ماماندار توبىن قۇرايتىن بولادى.
قازىرگى ۋاقىتتا 84 كادەت قازاقستان تەڭىز اكادەمياسىندا ءبىلىم الۋدا. قتا كادەتى ارايلىم بەكوۆا: «قتا مەن ءۇشىن جاڭا ءومىر اشتى, ول – تەڭىز ءومىرى», – دەدى. تشو ينۆەستيتسيالار جانە دامۋ مينيسترلىگىنە تەڭىزشىلەردى دايارلاۋ, اتتەستاتتاۋدان وتكىزۋ جانە ۆاحتالىق ءادىستى ەنگىزۋ تۋرالى حالىقارالىق كونۆەنتسيا تالاپتارى مەن شارتتارىنا ساي ەكەندىگىن دالەلدەۋ شارالارى بويىنشا كومەك بەرۋدى جالعاستىرىپ كەلەدى. بۇل قازاقستان تەڭىزشىلەرىنە قازاقستاننىڭ اۋماقتىق سۋلارىنان تىس ساپارلارعا دا شىعۋعا مۇمكىندىك بەرەدى.
ايناش ەسالي,
«ەگەمەن قازاقستان»
الماتى