«اش-شابابتىڭ» اياۋسىز ارەكەتى
«اش-شاباب» يسلاميستىك توبى سودىرلارىنىڭ سوماليدەگى اسكەري بازاعا جاساعان شابۋىلى سالدارىنان كەم دەگەندە 10 اسكەري قىزمەتشى قازا تاپتى, دەپ حابارلايدى رەيتەر اگەنتتىگى اسكەريلەرگە سىلتەمە جاساي وتىرىپ. اگەنتتىكتىڭ مالىمەتىنشە وقيعا دۇيسەنبى كۇنى ەل استاناسى موگاديشونىڭ وڭتۇستىك-باتىسىندا ورىن العان.
مينا قويىلعان اۆتوموبيل بازانىڭ قاقپاسىنا بارىپ سوعىلىپ, ودان كەيىن سودىرلار ىشكە باسىپ كىرگەن. 10 سولداتتىڭ قازا تابۋىنا دا وسى شابۋىل سەبەپ بولعان كورىنەدى. اتالمىش توپ قاندى شابۋىل ءۇشىن جاۋاپكەرشىلىكتى ءوز مويىندارىنا الىپ وتىر. ولاردىڭ ايتۋلارىنا قاراعاندا, بازاعا شابۋىل كەزىندە 30 سولدات قازا تاپقان. ايتا كەتۋ كەرەك, «اش-شاباب» ەلدىڭ ورتالىق ۇكىمەتىنە قارسى قارۋلى كۇرەس جۇرگىزىپ, بۇۇ-نىڭ گۋمانيتارلىق قىزمەتىنە كەدەرگى كەلتىرىپ كەلەدى.
جاپونيا كونستيتۋتسيانى قايتا قاراماق
جاپونيا ۇكىمەتى ەل پارلامەنتىنىڭ تومەنگى پالاتاسىنداعى كونستيتۋتسيالىق كوميسسيادا ەلدىڭ بەيبىت كونستيتۋتسياسىن قايتا قاراۋ ماسەلەسىن زەرتتەمەك نيەتتە. بۇل تۋرالى دۇيسەنبى كۇنى ءباسپاسوز ءماسليحاتىندا پرەمەر-مينيستر سيندزو ابە حابارلاعان.
ەڭ الدىمەن, مۇنى كونستيتۋتسيالىق كوميسسيادا سالماقتى تۇردە تالقىلاپ الۋ قاجەت. كيودو اگەنتتىگى پرەمەردىڭ وسىلاي دەگەن ءسوزىن كەلتىرىپ وتىر. وسىعان بايلانىستى ابە نەگىزگى زاڭدى قايتا قاراۋ مۇمكىندىگىنە قاتىستى وپپوزيتسيانىڭ تەرىس رەاكتسياسىن سىندارلى قادامعا جاتپايدى دەپ اتادى. وسىنىڭ الدىندا ەلدە پارلامەنتتىڭ جوعارعى پالاتاسىنا وتكەن سايلاۋدا ابە باسقاراتىن ليبەرالدى-دەموكراتيالىق پارتيا مەن «كومەيتو» پارتياسى ورىننىڭ ۇشتەن بىرىنە يە بولعان ەدى. ال ول نەگىزگى زاڭدى وزگەرتۋگە مۇمكىندىك بەرەدى.
تەررورشىنىڭ تۋىستارى ەلدەن قۋىلدى
كۋۆەيتتىڭ قاۋىپسىزدىك قىزمەتى وسىدان ءبىر اپتا بۇرىن دجيددا قالاسىنداعى اقش-تىڭ باس كونسۋلدىعىنا قارسى ورنالاسقان اۋرۋحانا اۆتوتۇراعىندا جارىلىس جاساعان جانكەشتى تەررورشىمەن تۋىستىق بايلانىسى بار دەگەن ءۇش پاكىستاندىقتى ەميراتتان شىعارىپ جىبەردى, دەپ حابارلادى دۇيسەنبى كۇنى وسى ەلدىڭ «ال-كاباس» گازەتى.
كۋۆەيتتە يسلام مەملەكەتى دەپ اتالاتىن ۇيىممەن بايلانىسى بار دەگەن كۇدىكپەن 6 ادام قاماۋعا الىندى. ايتا كەتۋ كەرەك, پاكىستاننان شىققان جانكەشتى اقش-تىڭ دجيدداداعى باس كونسۋلدىعىنا جاقىن جەردە تۇنگىلىك وزىنە پوليتسەيلەر جاقىنداپ كەلە جاتقان شاقتا ءوزىن-ءوزى جارىپ جىبەرگەن بولاتىن. سونىڭ سالدارىنان قاۋىپسىزدىك قىزمەتىنىڭ 2 قىزمەتكەرى زارداپ شەككەن ەدى. ساۋد ارابياسىنىڭ ءار جەرلەرىندە ورىن العان بىرنەشە تەراكتىلەردەن كەيىن كورولدىك بيلىگى 19 ادامدى قاماۋعا العان بولاتىن, ولاردىڭ 12-ءسى پاكىستاندىقتار بولىپ شىقتى.
ءجاسوسپىرىم ءۇش پوليتسەيدى اتىپ ءولتىردى
تۇركيانىڭ وڭتۇستىك-شىعىسىندا ورنالاسقان شانلىۋرفا قالاسىنداعى اۆتوبۋس ايالداماسىندا ءبىر ءجاسوسپىرىم وق اتىپ, سونىڭ سالدارىنان ءۇش پوليتسەي قازا تاۋىپ, تاعى ۇشەۋى دەنە جاراقاتتارىن العان. بۇل تۋرالى انادولى اگەنتتىگىنە سىلتەمە جاساي وتىرىپ, رەيتەر اگەنتتىگى حابارلادى.
ءجاسوسپىرىم پوليتسيا قىزمەتكەرلەرى اۆتوبۋس ايالداماسىندا تۇرعان ادامداردان جەكە كۋالىكتەرىن سۇراعان كەزدە وق اتقان. وسىدان سوڭ ول وقيعا ورنىنان قاشىپ كەتىپ, وزگە پوليتسەيلەرگە قارسى تاعى دا وق جاۋدىرعان. ءۇش پوليتسيا قىزمەتكەرىنىڭ اۋرۋحانادا قايتىس بولعانى ءمالىم بولىپ وتىر. اگەنتتىكتىڭ مالىمەتتەرىنە قاراعاندا, وق اتۋشىنىڭ كوزى جويىلعان. قالا گۋبەرناتورى بۇل وقيعانىڭ تەرروريزمگە ەش قاتىسى جوق ەكەنىن, وق اتقان 17 جاسار جىگىتتىڭ اقىل-ەسىندە اۋىتقۋشىلىق بولعانىن ايتقان.
نارازىلىق بىلدىرۋشىلەر سانى ازايماي وتىر
لۋيزيانا شتاتىنىڭ باتون-رۋج قالاسىنداعى افروامەريكالىقتىڭ ولىمىنە بايلانىستى نارازىلىقتار بارىسىندا ۇستالعاندار سانى 160 ادامعا دەيىن جەتتى, دەپ حابارلادى اسسوشيەيتەد پرەسس اگەنتتىگى. بۇعان دەيىن 101 ادام ۇستالدى دەپ حابارلانعان بولاتىن.
ونىڭ سىرتىندا ۇستالعانداردىڭ اراسىندا Black Lives Matter (قارالار ءومىرىنىڭ ءمانى بار) قوزعالىسىنىڭ بەلگىلى بەلسەندىسى, قارا ءناسىلدى حالىققا قاتىستى كۇش كورسەتۋگە قارسى ارەكەت ەتىپ جۇرگەن دە رەي ماكەسسوننىڭ بولعانى دا انىقتالىپ وتىر. اگەنتتىكتىڭ مالىمەتتەرى بويىنشا, كەزەكتى نارازىلىق بارىسىندا پوليتسيا باسقارماسىنا قارسى جاتقان كوشەلەرگە جۇزدەگەن ادام جينالعان. ەرەۋىلدى پلاستماسسا قالقاندارى مەن قارۋ-جاراقتارى بار ونداعان پوليتسيا قىزمەتكەرلەرى باقىلاپ تۇرعان. ايتا كەتۋ كەرەك, نارازىلىق اكتسياسى اقش-تىڭ كوپتەگەن قالالارىندا وتكەن بەيسەنبى كۇنى باستالعان بولاتىن.
قىتايلىق ۇشاق بۇرشاق استىندا قالدى
China Southern Airlines اۋە كومپانياسىنىڭ اۋە لاينەرى قحر-داعى ۇشۋ بارىسىندا كۇشتى بۇرشاقتىڭ استىندا قالىپ, سونىڭ سالدارىنان ۇشاقتىڭ تۇمسىق جاعى ايتارلىقتاي زاقىمدانعان. بۇل تۋرالى قىتايدىڭ ورتالىق تەلەديدارى ءوزىنىڭ الەۋمەتتىك جەلىدەگى رەسمي اككاۋنتىندا حابارلاعان.
وقيعا سەنبى كۇنى كەشكىلىك ورىن العان. CZ 3483رەيسى گۋانچجوۋدان چەندۋعا بەت العان شاقتا ۇلكەن داۋىلدىڭ استىندا قالعان. تەلەارنانىڭ مالىمەتتەرىنە قاراعاندا, ۇشاق ورىن العان وقيعادان كەيىن چەندۋ قالاسىنا ءساتتى قونعان. جولاۋشىلار مەن ەكيپاج مۇشەلەرىنىڭ ەشقايسىسى زارداپ شەكپەگەن. ۇشاقتىڭ تۇمسىق جاعى مەن الدىڭعى شىنىسىنىڭ زاقىمدانعانى بەلگىلى بولىپ وتىر. ولاردا كوپتەگەن بۇرشاق ىزدەرى قالعان كورىنەدى.
وق نوسەرى استىنداعى يەمەن
يەمەننىڭ باتىسىنداعى شەكاراعا جاقىن ورنالاسقان حادجا پروۆينتسياسىنداعى ميدي قالاسى اياۋسىز زىمىراندىق جانە ارتيللەريالىق اتقىلاۋدىڭ استىندا قالدى, دەپ حابارلادى دۇيسەنبى كۇنى ليۆاندىق «ال-مايادين» تەلەارناسىنىڭ ءتىلشىسى.
ورىن العان قۇرباندىقتار تۋرالى ازىرگە ەشقانداي اقپارات جوق. ەلدى مەكەنگە وقتىڭ ساۋد ارابياسى جاعىنان اتىلعاندىعى انىقتالۋدا. يەمەندە 2014 جىلدان بەرى بۇرىنعى پرەزيدەنت پەن قازىرگى پرەزيدەنتتى جاقتاۋشىلار اراسىندا قارۋلى قاقتىعىستار ءجۇرىپ جاتقانى بەلگىلى. بيلىككە ساۋد ارابياسى باستاعان اراب ەلدەرىنىڭ كواليتسياسى اسكەري قولداۋ كورسەتۋدە.