قازاقستان بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانىپ وتىر. ۇيىمنىڭ باس اسسامبلەياسىندا 138 مەملەكەتتىڭ قازاقستاندى قولداپ داۋىس بەرۋى بۇل ەلىمىز ءۇشىن ءۇلكەن قۇرمەت, حالىقارالىق دەڭگەيدەگى بەدەلىنىڭ بارلىعى دەپ ءتۇسىنۋىمىز كەرەك.
قازاقستان رەسپۋبليكاسى بۇل بەدەلگە قالاي جەتتى؟ ول – ەلباسىمىزدىڭ كەمەڭگەرلىك ساياساتىنىڭ ارقاسى. ەل پرەزيدەنتى الدىمەن حالقىمىزدىڭ قاسىرەتىنە اينالعان سەمەيدەگى يادرولىق سىناق پوليگونىن جاپتى. سونان سوڭ تورتكۇل دۇنيەگە قاتەر ءتوندىرىپ, الاڭداتاتىن يادرولىق قارۋدان باس تارتتى.
قازاقستان وتارشىلدىقتىڭ, قىرعىن سوعىستىڭ زاۋالىن باستان كەشكەن ەل. سوندىقتان ەلباسى ادام بالاسىنا قاسىرەت اكەلەتىن ىستەردەن اۋلاق بولىپ, تاۋەلسىزدىگىمىزدىڭ تۇعىرىن ادال ەڭبەكپەن, دامىعان ەكونوميكا, جاقسارعان تۇرمىسپەن بەكىتۋدى قالادى.
ەلباسىمىزدىڭ ادامزاتقا بەيبىت ءومىر تىلەيتىن بۇل باستاماسىن بۇۇ-عا مۇشە ەلدەردىڭ باسشىلارى قولداپ, دۇنيەجۇزىندەگى بەيبىتشىلىكتى نىعايتۋعا, سوعىستىڭ الدىن الۋعا باعىتتالعان يگىلىكتى ۇلەس دەپ جوعارى باعالاپ وتىر. حالىقارالىق قاۋىمداستىقتى يادروسىز الەم قۇرۋعا, سوعىستى بولدىرماۋعا شاقىرعان اقش-تاعى يادرولىق قاۋىپسىزدىك جونىندەگى سامميتتە جاريالانعان «الەم.ءححى عاسىر» مانيفەسى بۇۇ-نىڭ رەسمي قۇجاتىنا اينالعانى دا بارشاعا ايان. بۇل دا ەلباسىنىڭ كورەگەندىگى ەدى.
بىرلىك – ءبىزدىڭ باستى ماقساتىمىز. پرەزيدەنتىمىز باستاپ, بارلىق قوعامدىق ۇيىمدار, ساياسي پارتيالار, قوعامدىق ينستيتۋتتار, جالپى حالىق بولىپ ىنتىماعىمىزدى نىعايتۋ جولىندا جۇمىلا ەڭبەك ەتپەسەك, ەلىمىزدە تۇراقتىلىق بولماس ەدى.
ەڭبەك – ءبىزدىڭ باستى قارۋىمىز. تاۋەلسىزدىك العان وسى از جىل ىشىندە ەلىمىز ايتارلىقتاي دامىپ, كوركەيدى. ەڭ باستىسى – ەلىمىزدە بەرەكە بار, تىنىشتىق بار. مۇنداي ەلگە ينۆەستيتسيا قۇيۋشىلار دا از بولعان جوق. باستىسى – ەلباسىمىز العا ۇلكەن مۇرات قويا ءبىلدى جانە وعان جەتۋگە حالىقتى جۇمىلدىرىپ, ەرتەڭىمىزدىڭ جارقىن بولارىنا جۇرتشىلىقتى يلاندىرا ءبىلدى.
الپاۋىت ەلدەردىڭ ءوزىن سانسىراتقان قارجىلىق جانە ساياسي داعدارىستاردان ەلباسىمىزدىڭ كەمەڭگەرلىك ساياساتى ارقاسىندا حالقى ءتۇسىنۋشىلىك تانىتىپ, تابيعي تاباندىلىعى, توزىمدىلىگى, ەڭبەكقورلىعى ارقاسىندا شىعىپ كەلەدى.
وسىنداي بىرلىكتى, رۋحى مىقتى ەل عانا بۇۇ قاۋىپسىزدىك كەڭەسىنىڭ قابىلداعان شەشىمدەرىن, جاۋاپكەرشىلىكپەن ورىنداي الادى.
مىنە, سوندىقتان دا قازاقستان بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانىپ وتىر. بۇل ءبىزدىڭ ەلباسىمىزعا, ەلىمىزگە كورسەتىلگەن سەنىم, حالقىمىزدىڭ قوماقتى تابىسى, جارقىن جەتىستىگى, ۇلكەن مارتەبە دەپ تۇسىنەمىن.
باتىس قازاقستان وبلىسىنىڭ جاڭاقالا اۋدانى جۇرتشىلىعى دا وسىنداي ۇلى ىستەرگە باستاعان پرەزيدەنتىمىزدىڭ سارا ساياساتىن قولداپ, ونى جۇزەگە اسىرۋعا ۇلەستەرىن قوسا بەرەدى.
رۋحوللا ساماتوۆ,
«نۇر وتان» پارتياسى جاڭاقالا اۋداندىق فيليالى توراعاسىنىڭ ورىنباسارى
باتىس قازاقستان وبلىسى