اشىق اسپان اياسىندا ءتىرى داۋىستا ءان سالىپ الەمگە ايگىلەنگەن رەسەيلىك «تۋرەتسكي حور» مۋزىكالىق توبى استانا كۇنىندە ونەر كورسەتىپ, تىڭدارماندارعا عاجايىپ كۇي سىيلادى. «ءبايتەرەك» مونۋمەنتىنىڭ الدىنداعى ساحنادا ءان سالعان ونەرلى توپ بۇل جولى قازاق تىلىندە ءۇش ءان ورىنداپ, كوڭىلدەردى مارقايتتى.
ونىڭ الدىندا باق وكىلدەرىنە رەسمي ءباسپاسوز ءماسليحاتىن ءوتكىزگەن مۋزىكالىق توپ قالا تۇرعىندارى مەن قوناقتارىن قۇتتىقتاۋ ءۇشىن استاناعا ارنايى كەلگەندىگىن ايتتى.
«ساپارلاپ بارعان ەلدىڭ تىلىندە ءتىرى داۋىسپەن ءان شىرقاۋىمىز بۇگىنگى تاڭدا باستى ەرەكشەلىگىمىزگە اينالدى. بۇل ءبىزدىڭ ءدام-تۇز تاتقان ەلگە دەگەن قۇرمەتىمىزدەن تۋىنداعان يدەيا ەدى. ەندى, مىنە, استاناعا دا ارنايى كەلىپ وتىرمىز. قورجىنىمىزدا ءۇش ءان – «اۋىلىم» مەن «كوزىمنىڭ قاراسى» جانە باتىردىڭ (شۇكەنوۆ) «دجۋلياسى» بار. بۇلاردى تاڭداۋ سەبەبىمىز – ءاندى ورىنداۋ جەڭىلدىگىمەن جانە ەل ىشىنە كەڭ تارالعاندىعىمەن بايلانىستى», دەيدى توپ جەتەكشىسى ميحايل تۋرەتسكي.
ءتىرى داۋىستا ءان سالاتىن ونەرپازعا تىڭدارمانداردىڭ دا قوشەمەت-قۇرمەتى ەرەكشە بولاتىنى اقيقات قوي. سوندىقتان شىعار, بۇلتتى كۇننىڭ قاباعىنا قاراماي «بايتەرەكتىڭ» ماڭىنا جينالعان جۇرتتىڭ قاراسى قالىڭ بولدى. وعان قوسا, ون ادامنان قۇرالعان مۋزىكالىق توپتىڭ شىرقاعاندارى ءۇش قانا ءانمەن شەكتەلمەدى. كوپشىلىككە كەڭىنەن تانىلعان كينوداعى ءاندەر مەن حالىق اندەرىن ورىنداپ, تىڭدارمانداردىڭ قۇلاق قۇرىشىن قاندىردى. ءتىپتى, كاراوكە ارقىلى كوپتەگەن ءاندى ەل-جۇرت ارتىستەرمەن قوسىلا ايتىپ, ءتۇنگى استانانىڭ اسپانىن انمەن الديلەدى.
وسىنداي كەشتى وتكەن كۇننىڭ ەستەلىكتەرمەن بولىسە وتىرىپ جۇرگىزگەن ميحايل بوريسوۆيچ حالىقپەن قوسىلا ءان شىرقاۋ يدەياسىن وزىنە وسىدان ەكى جىل بۇرىن ەلباسىمىز نۇرسۇلتان نازارباەۆ ۇسىنعاندىعىن اتاپ ءوتتى.
«مەرەكەلىك ءان» ستيلىندەگى ءان ايتۋدى پرەزيدەنت مىرزا بۇرىنىراقتا ەسكەرتكەن بولاتىن. «سەن حالىقپەن بىرگە ءان ورىنداۋعا كەرەكسىڭ» دەگەنى ءالى ەسىمدە. ەندى, مىنە, بۇگىن ءبىز وسىلايشا كوڭىلدەرگە قۋانىش سىيلاپ كەلەمىز» دەدى م.تۋرەتسكي.
ونەرلى ۇجىمنىڭ تاعى ءبىر مۇشەسى پاۆەل بەركۋت بولسا, قازاق تىلىندە ءان شىرقاۋ قيىن ەمەستىگىن العا تارتادى.
«ءبىزدىڭ رەپەرتۋارىمىزداعى «كوزىمنىڭ قاراسى» ءانى قازاقستاندا عانا ەمەس, بارعان جەرىمىزدە زور ىقىلاسپەن قابىلدانادى. ماسەلەن, رەسەي مەن فرانتسيادا, ءتىپتى, اقش-تىڭ وزىندە بۇل ءانىمىزدى قوسىلا ورىنداعان تىڭدارماندارىمىز از ەمەس. باستىسى, جۇرەگىڭ تازا, نيەتىڭ ءتۇزۋ بولسا, كەز كەلگەن تىلدە ءان شىرقاۋ وڭاي» دەيدى ول.
نۇرلىبەك دوسىباي,
«ەگەمەن قازاقستان»