[caption id="attachment_50284" align="aligncenter" width="560"] فوتو: olympic.kz[/caption]
استانادا مادەنيەت جانە سپورت ءمينيسترى ارىستانبەك مۇحامەدي ۇلى مەن ۇلتتىق وليمپيالىق كوميتەتىنىڭ پرەزيدەنتى تيمۋر ق ۇلىباەۆ قازاقستان ۇلتتىق قۇراما كوماندالارىنىڭ مۇشەلەرىمەن كەزدەستى.
كەزدەسۋدە وليمپيا ويىندارىنا دايىندىق ماسەلەسى قارالدى. فەدەراتسيا باسشىلارى مەن باس جاتتىقتىرۋشىلار سپورتشىلاردىڭ ءدۇبىرلى دوداعا دايىندىعى تۋرالى ايتىپ بەردى. بوكستان ۇلتتىق قۇراما كوماندانىڭ باس جاتتىقتىرۋشىسى مىرزاعالي ايتجانوۆ بيىلعى وليمپياداعا قازاقستان سپورتشىلارىنىڭ تولىق قۇرامدا قاتىساتىنىن, قازىر بوكسشىلار الماتى وبلىسىنداعى حالىقارالىق بوكس اكادەمياسىندا جاتقانىن, ودان كەيىن دايىندىقتى استاناداعى بوكس ورتالىعىندا جالعاستىراتىنىن ايتتى. ونىڭ ايتۋىنشا, بىلعارى قولعاپ شەبەرلەرى استانادا وقۋ-جاتتىعۋ جيىنى بىتكەن سوڭ وسى ايدىڭ سوڭىندا ريو-دە-جانەيروعا بارادى. ال بوكستان ايەلدەر قۇراماسىنىڭ جاتتىقتىرۋشىسى قايرات ساعاديەۆ قىزداردىڭ استانادا جاتتىعىپ جاتقانىن, ودان كەيىن ولار يسپانيادا وتەتىن گران-پري جارىسىنا قاتىسىپ, ءارى قاراي برازيليادا دايىندىقتارىن جالعاستىراتىنىن اتاپ ءوتتى.
جيىندا اۋىر اتلەتتەردىڭ دە وليمپياداعا دايىندىعى تۋرالى اڭگىمە قوزعالدى. كەزدەسۋدە ءالى جارىسقا قاتىساتىن سپورتشىلاردىڭ ءتىزىمى بەكىتىلگەنى, وليمپياداعا ۆلاديمير سەدوۆتىڭ دا قاتىسۋى مۇمكىن ەكەنى حابارلاندى. وندا اۋىر اتلەتيكا فەدەراتسياسىنىڭ وكىلدەرى سپورتشىلاردى تاعى دا دوپينگكە تەكسەرۋ ماسەلەسىن قوزعادى. تەكسەرۋ بولعان سوڭ ونىڭ قورىتىندىسىن دۇنيەجۇزىلىك دوپينگكە قارسى اگەنتتىكتىڭ زەرتحاناسىنا جىبەرۋ كەرەكتىگىن ايتتى. «سپورتشىلاردى دوپينگكە تاعى دا تەكسەرۋ كەرەك. ونىڭ قورىتىندىسىن وليمپياداعا دەيىن ءبىلىپ العانىمىز ءجون. ەگەر وتانداستارىمىزدىڭ تاعى دوپينگتى قابىلداعانى بەلگىلى بولسا, وندا ولارعا قاتاڭ جازا قولدانۋ كەرەك», دەدى فەدەراتسيا وكىلدەرى. سونىمەن بىرگە قانىنان دوپينگ ءدارىسى تابىلعان ەلىمىزدىڭ ءتورت سپورتشىسىنا قاتىستى ماسەلە دە ءسوز بولدى. وسىعان بايلانىستى ۇلتتىق وليمپيالىق كوميتەت پەن اۋىر اتلەتيكا فەدەراتسياسى سپورتشىلاردى قولداۋعا قولدا بار مۇمكىندىكتىڭ بارلىعىن جاسايتىندارىن اتاپ ءوتتى. سونداي-اق, ۇوك حالىقارالىق وليمپيالىق كوميتەتتىڭ دوپينگكە بايلانىستى زەرتتەپ جاتقان جۇمىستارىن قولدايتىنىن جاسىرمادى.
كەزدەسۋدە جەڭىل اتدەتيكا, تاەكۆوندو, ساداق اتۋ, نىسانانى كوزدەۋ, قابىرعاعا وق اتۋ, سينحروندى ءجۇزۋ, پاراليمپيادانىڭ پاۋەرليفتينگ تۇرىنەن جارىسقا قاتىساتىن سپورتشىلار مەن ولاردىڭ جاتتىقتىرۋشىلارى وزدەرىن تولعاندىرىپ جۇرگەن پروبلەمالارىن جەتكىزدى. وسى ماسەلەگە بايلانىستى ۇلتتىق وليمپيالىق كوميتەتىنىڭ پرەزيدەنتى تيمۋر ق ۇلىباەۆ سپورتشىلارىمىزدىڭ وليمپيادادا لايىقتى ونەر كورسەتۋىنە بارلىق جاعدايدىڭ جاسالاتىنىن, وتانداستارىمىزعا وليمپيادانىڭ ليتسەنزياسىن الۋىنىڭ ءوزى ۇلكەن جەتىستىك ەكەنىن ايتتى. سونىمەن بىرگە ول دوپينگ ماسەلەسى دە قاتىستى ءوز ويىن ءبىلدىردى. تيمۋر ق ۇلىباەۆ وليمپياداعا, اسىرەسە, فارموكولوگيا مەن سپورتشىلاردىڭ تاماعىنا, دوپينگتىڭ سىنامالارىنا ۇلكەن جاۋاپكەرشىلىكپەن قاراۋ كەرەكتىگىن ەسكەرتتى. سول سياقتى ۇلتتىق وليمپيالىق كوميتەت دۇنيەجۇزىلىك دوپينگكە قارسى اگەنتتىكتىڭ سپورتشىلارعا قاتىستى جۇمىسىن قولدايتىنىن مالىمدەدى.
[caption id="attachment_50285" align="aligncenter" width="560"] فوتو: olympic.kz[/caption]
داستان كەنجالين