تاڭعى تىلەك

قايىرلى تاڭ, قازاقتىڭ ارايلاعان اسپانى! جيىرما بەس جىل – ازات كۇن التىن نۇرىن شاشقالى!   قايىرلى تاڭ, كوكبايراق, – ەلدىگىمنىڭ تىرەگى! ارمانىنا ات بايلاپ, حالقىم قايتا تۇلەدى!   قايىرلى تاڭ, استانا, ازاتتىقتان جارالعان! جاۋقازىنداي  جاس قالا, اينالاسى كوك ورمان!   قايىرلى تاڭ, اقوردا, – قاراشىعى كوزىمنىڭ. مىناۋ شەكسىز عالامدا, ورنىڭ بولەك ءوزىڭنىڭ!   قايىرلى تاڭ, بايتەرەك, بۇتاعىنا نۇر تۇنعان! بيىكتىكپەن بوي تەڭەپ, بولاشاققا ۇمتىلعان!   قايىرلى تاڭ, قازاعىم, باقىت قونعان باسىنا! ورالدى تايقازانىڭ, كۇلتەگىننىڭ تاسى دا!   قايىرلى تاڭ, ەلباسى, ەرتە تۇرعان ەل ءۇشىن! جايناپ بىرلىك ورداسى, جارقىراسىن جەڭىسىڭ!   قايىرلى تاڭ, قارا جەر, قايىرلى تاڭ, كوك اسپان! ەلىمدى امان قىلا كور, ىنتىماعى جاراسقان! نۇروللا ساعاتباەۆ