ۆاشينگتوندا استانا كۇنى جانە قازاقستان مەن اقش ديپلوماتيالىق قاتىناستارىنىڭ 25 جىلدىعى اتاپ ءوتىلدى
استانا كۇنى مەرەكەسىنىڭ قارساڭىندا ۆاشينگتون قالاسىندا ءداستۇرلى قازاق تاعامدارىن دايىنداۋ بويىنشا شەبەرلىك-ساباعى وتكىزىلدى. ءىس-شاراعا ساياسي جانە ساراپتامالىق توپتاردىڭ, «قازاقستان دوستارى كلۋبىنىڭ» وكىلدەرى جانە قازاق دياسپوراسى قاتىستى.
قازاق ۇلتتىق تاعامدارى اقش قاۋىمداستىعىنىڭ ەرەكشە قىزىعۋشىلىعىن تۋدىردى. ۆاشينگتونداعى ءىس-شارادا قوناقتارعا ءداستۇرلى قازاق مازىرىنەن تاعام دايىنداۋ ۇسىنىلدى.
قوناقتار الجاپقىشتارىن تارتىپ, قازاق تاعامدارىن دايىنداۋ اۋەسقويلىعىمەن ايگىلى Edlow International Company (EIC) كورپوراتسياسىنىڭ باسشىسى دجەك ەدلوۋتيانىڭ جاساعاندارىن قايتالادى. ەلشىلىك قىزمەتكەرلەرى مەن دياسپورا وكىلدەرى قوناقتارعا كومەكتەسىپ, نان يلەۋگە قاتىستى. وسىدان كەيىن قوناقتار ءوز قولىمەن جاساعان تاعامدارىنىڭ ءدامىن تاتۋعا شاقىرىلدى.
قازاقستاننىڭ اقش-تاعى ەلشىسى قايرات وماروۆ مەرەكەلىك داستارقان ءۇشىن سەبەپتەردىڭ جەتكىلىكتى ەكەنىن ايتتى. ول قازاقستاننىڭ بۇۇ قاۋىپسىزدىك كەڭەسىنىڭ قۇرامىنا كىرگەنىنە ەرەكشە توقتالىپ, بۇل كاسىبي مەرەكەسى 2 شىلدەدە اتالىپ وتكەن قازاقستاندىق ديپلوماتيا تاريحىنداعى ۇلكەن جەتىستىكتەردىڭ ءبىرى ەكەنىنە نازار اۋداردى. ەلشى قوناقتاردى اقش-تىڭ الداعى تاۋەلسىزدىك كۇنىمەن قۇتتىقتاپ, بيىل قازاقستاننىڭ تاۋەلسىزدىك العانىنا 25 جىل تولاتىنىن جانە اقش-پەن ديپلوماتيالىق قاتىناستار ورناعانىنا دا شيرەك عاسىر بولاتىنىن ايتىپ ءوتتى. ول, سونىمەن قاتار, 6 شىلدەدە اتالىپ وتەتىن استانا كۇنىنە توقتالىپ, بيىل ەلوردا ءوزىنىڭ 17 جىلدىعىن تويلايتىنىن كولدەنەڭ تارتتى. جينالعانداردىڭ نازارىنا «قازاقستان – ۇلى دالا ەلى» زاماناۋي ءموبيلدى قوسىمشاسى ۇسىنىلدى.
ەلشىلىك قوناقتارى قازاق تاعامدارىمەن جاقىن تانىسۋعا ءمۇمكىندىك بەرىلگەنى ءۇشىن العىسىن ءبىلدىرىپ, قازاقستان حالقى مەن مەملەكەت باسشىلىعىن تاۋەلسىزدىكتىڭ 25 جىلى ىشىندەگى جەتىستىكتەرىمەن جانە الداعى مەرەكەلەرمەن قۇتتىقتادى.
«ەگەمەن-اقپارات»