الماتى وبلىسى مەن مىسىر پروۆينتسياسىنىڭ اراسى جاقىنداي ءتۇستى

تالدىقورعان. 23 مامىر. وتكەن جۇما كۇنى الماتىدا مىسىر مەن قازاقستان اراسىندا تۋريستىك سالادا ىنتىماقتاستىقتىڭ جاڭا كەزەڭىنە ارنالعان ءباسپاسوز ءماسليحاتى بولدى. ول الماتى وبلىسى مەن مىسىر پروۆينتسياسى اراسىندا ىنتىماقتاستىق تۋرالى مەموراندۋمعا قول قويىلۋىنا ارنالدى. بۇل تۋرالى «قازاقپارات» دەرەگىنە سىلتەمە جاساعان egemen.kz ءتىلشىسى حابارلادى. «جۋرناليستەرمەن كەزدەسۋگە مىسىردىڭ قازاقستانداعى ەلشىسى حايتام گاميل كامال, مىسىردىڭ تۋريزم اكىمشىلىگى ءبولىمىنىڭ باسشىسى احمەد شۋكري, وڭتۇستىك سيناي پروۆينتسياسىنىڭ گۋبەرناتورى حاليد فۋدا, الماتى وبلىسى اكىمىنىڭ ورىنباسارى سەرىك  تۇرداليەۆ جانە قازاقستان مەن مىسىردىڭ تۋريزم, قوناق ءۇي بيزنەسى سالاسىندا قىزمەت اتقاراتىن كومپانيا باسشىلارى قاتىستى», - دەلىنگەن حابارلامادا. كەزدەسۋ بارىسىندا الماتى وبلىسى مەن مىسىردىڭ ەڭ تانىمال تۋريستىك مەكەندەرىنىڭ ءبىرى - وڭتۇستىك سيناي پروۆينتسياسى اراسىندا ىنتىماقتاستىق تۋرالى مەمورۋندامعا قول قويىلدى. «بۇل كەلىسىمنىڭ ارقاسىندا قازاقستان مەن مىسىر اراسىندا, اسىرەسە, تۋريستىك سالاداعى قارىم-قاتىناس جاڭا دەڭگەيگە كوتەرىلەدى دەپ ويلايمىن. بۇل جەردە بۇگىنگى كەلىسىمنىڭ الار ورنى ەرەكشە. ويتكەنى, الماتى وبلىسى قازاقستانداعى ەڭ ۇلكەن, ەكونوميكاسى دامىعان جانە حالىق كوپ شوعىرلانعان وڭىرلەرىنىڭ ءبىرى. مۇندا ەرەكشە تاريحي ورىندار كوپ. وڭتۇستىك سيناي دا مىسىردىڭ ەڭ بەتكە ۇستار پروۆينتسيالارىنىڭ ءبىرى. مۇندا بۇكىل الەمگە تانىمال شارم-ەل-شەيح شيپاجايى ورنالاسقان», - دەدى مىسىردىڭ قازاقستانداعى ەلشىسى حايتام گاميل كامال. ءوز كەزەگىندە الماتى وبلىسى اكىمىنىڭ ورىنباسارى سەرىك تۇردىاليەۆ بۇل كەلىسىم ەكى ەل اراسىندا تۋريستىك بايلانىستىڭ دامۋىنا جاڭا سەرپىن بەرەتىنىن اڭگىمەلەدى. «بۇل كەلىسىمگە قول قويۋ ءبىز ءۇشىن ۇلكەن قۇرمەت. ەندى الماتى وبلىسى مەن وڭتۇستىك سيناي اراسىندا تۋريزم, ءبىلىم, مادەنيەت, ونەر, ەكولوگيا سالاسىنداعى ىنتىماقتاستىق دامي تۇسەدى دەگەن سەنىمدەمىن. سونىمەن قاتار, بۇل كەلىسىم ەكى ەلدىڭ تۋريستىك كومپانيالارى اراسىندا سەرىكتەستىك قارىم-قاتىناستىڭ نىعايۋىنا نەگىز بولادى», - دەدى ول. ەسكە سالا كەتەيىك, قازىرگى تاڭدا جەر شارىنىڭ ءاربىر 11-ءشى تۇرعىنى تۋريزم سالاسىندا قىزمەت ەتەدى. ال قازاقستاننان مىسىرعا باراتىن تۋريستەر سانى جىلدان جىلعا ارتا تۇسۋدە. سونىڭ ءبىر ايعاعى – وتكەن جىلى ەلىمىزدەن مىسىر جەرىنە 22 مىڭنان استام ادام تۋريستىك ساپارمەن بارىپ قايتقان ەكەن. نۇربول الدىباەۆ. دەرەك: قازاقپارات.