استانا. 22 مامىر. اقش-تىڭ نيۋ-يورك قالاسىنىڭ ورتالىعىنداعى «تايمس-سكۆەردە» ءىلۋلى تۇرعان جارنامالىق مونيتورلاردىڭ بىرىنەن كەنەت رەسەي پرەزيدەنتى ۆلاديمير پۋتين كورىنىپ, ءبىر كوزىمەن ىم قاققاندا, مۇندا جۇرگەندەردىڭ تاڭدانباعانى جوق. بۇل تۋرالى Imgur پورتالىنىڭ اقپارىنا سۇيەنگەن egemen.kz ءتىلشىسى حابارلادى.
رف ليدەرى كوزىن ءبىر قىسقاننان كەيىن ىلە-شالا ەكراننان جوعالىپ كەتتى. ونى سول ساتىندە ءتۇسىرىپ ۇلگەرگەن ءبىر امەريكالىق ازامات روليكتى YouTube-ءتىڭ ۆيدەوحوستينگىنە سالا قويادى.
ۆلاديمير ءپۋتيننىڭ بەينەسى بار انيماتسيا نەمىستىڭ Volvo ماركالى ءاۆتوموبيلىنىڭ جارناماسى ءجۇرىپ جاتقان كەزدە ەكراننان كورىنەدى. سول مەزەتتە ءوز كامەراسىنىڭ وبەكتيۆىن دەرەۋ باعىتتاي قويعان كىسى بۇعان قاتتى تاڭ قالادى. ال باسقا ءبىر كۋالاردىڭ ايتۋلارىنشا, رف پرەزيدەنتى «تايمس-سكۆەردەگى» جارنامانى وسىلاي بىرنەشە تاۋلىك بويىنا ءۇزىپ تۇرعان.
ال YouTube-تە جاريالانعان ۆيدەوروليك ءبىرشاما ۋاقىتتىڭ ىشىندە 288 مىڭنان استام كورەرمەن جيناپ ۇلگەرەدى. كادردىڭ سىرتىنداعى داۋىس: «مىنانى كوردىڭىزدەر مە؟ قۇداي-اۋ, ءوز كوزىمە سەنبەي تۇرمىن», دەپ قاتتى تاڭىرقاعان سىڭاي بىلدىرەدى.
https://youtu.be/yFIdHXCIhXU
قازىر جەلى پايدالانۋشىلار بۇل ۆيدەونىڭ شىنايى نە شىنايى ەمەس ەكەندىگى تۋرالى پىكىرتالاستى قىزدىرىپ جاتقانعا ۇقسايدى. ولاردىڭ قارسى ارگۋمەنت ايتاتىندارى بۇعان باتىستىڭ ءىرى باق-تارىندا بۇل وقيعا تۋرالى ەشتەڭە جازىلماعانىن العا تارتادى.
تالعات رايىمبەك.
دەرەك, فوتو: Imgur.