استانا. 22 مامىر. قىتايدىڭ فۋەرداي دەگەن ات العان جاڭا جاس بۋىندى ميلليونەرلەرى قاتارىنا جاتاتىن ءبىر ستۋدەنتى كانادانىڭ ۆانكۋۆەر قالاسىندا 31 ميلليون دوللارعا كەرەمەت وسوبنياك ساتىپ الدى. بۇل تۋرالى «لەنتا.رۋ» اقپارىنا سۇيەنگەن egemen.kz ءتىلشىسى حابارلادى.
جاسى 20-دان جاڭا اسقان ستۋدەنتتە بۇل قايدان جۇرگەن بايلىق؟ اگەنتتىك ءتىلشىسى بۇل سۇراقتىڭ جاۋابىن اسپاناستى ەلىنەن شىققان ءبىر توپ جاستىڭ Instagram الەۋمەتتىك جەلىسىندەگى اككاۋنتىنان تاۋىپتى. مۇنىڭ ءوزى «قىتاي كوممۋنيزمى» دەپ اتالاتىن نارىق جۇيەسىنىڭ ارقاسىندا مۇمكىن بولىپ وتىر.
قاپ تۇبىندە التىن كەزدىك جاتپايدى. قىتايدىڭ جاس باي ازاماتتارى – فۋەردايلار تۋرالى اقپارلار ءباسپاسوز بەتتەرىندە كەيىنگى كەزدەردە وقتىن-وقتىن كورىنىپ قالىپ جاتادى. ماسەلەن, 2012 جىلى ەلدەگى جوعارى لاۋازىمدى شەنەۋنىكتىڭ ۇلى ءوزىنىڭ Ferrari 458 Spider كولىگىمەن جول اپاتىنا ءتۇسىپ قالعان كەزدە بۇل فاكتىدەن ءبىر حابار ءبىلىندى. سول سياقتى 2016 جىلى ەكى جاس جىگىتتىڭ بەيجىڭدەگى توننەلدە سۋپەركارلارىمەن «كەزدەسىپ قالۋلارىنان» سوڭ فۋەردايلاردىڭ كىم ەكەندەرى تۋرالى تاعى اڭگىمە قوزعالدى. ال مۇنداي جاعداي قىتاي قوعامىندا ءاردايىم اشۋ-ىزا مەن نارازىلىقتىڭ داۋىلىن ءبىر سوقتىرىپ ءوتىپ تۇرادى.
وسىعان بايلانىستى قحر توراعاسى سي تسزينپين حالىقتىڭ تىلەگىنە وراي شەنەۋنىكتەر مەن بيزنەسمەندەر بالالارىنىڭ مىنەز-ق ۇلىقتارىن ۇدايى باقىلاۋدا ۇستاپ تۇرۋعا ۋادە بەردى. 2016 جىلدىڭ مامىرىندا مۇنداي بالالاردىڭ تەلەۆيدەنيەدەگى الدەقانداي ءبىر رەالتيت-شوۋلاردا كورىنۋلەرىن تىيىم سالىندى. بۇدان بولەك, باس حاتشى «التىن باۋلى جاستاردى» ءيۋاننىڭ قادىرىن ءبىلۋدى ۇيرەنۋگە شاقىرىپ, 70 فۋەردايدى ەڭبەك-تاربيە لاگەرىنە جىبەرتتى.
سي سونداي-اق ارنايى دەپارتامەنت قىزمەتكەرلەرىنە ميللياردەرلەر بالالارىنىڭ ومىرلەرىن ۇدايى باقىلاۋدا ۇستاپ, ولاردى تۋرا جولعا سالىپ وتىرۋدى تاپسىردى.
بىراق ءبارىبىر Instagram-دى الداي المايسىڭ: فۋەردايلاردىڭ ءىسى توقتاعان جوق.
تالعات رايىمبەك.
دەرەك, فوتو: لەنتا.رۋ.