كوكشەتاۋ. 21 مامىر. اقمولا وبلىسى, ارشالى اۋدانىنىڭ ورتالىعى - ارشالى كەنتىندە تاۋەلسىزدىكتىڭ 25 جىلدىعىن مەرەكەلەۋ شەڭبەرىندە الەۋمەتتىك جاعىنان مۇقتاج تۇرعىندارعا جاڭا 16 پاتەردىڭ كىلتى تابىس ەتىلدى. بۇل تۋرالى وبلىستىق ىشكى ساياسات باسقارماسىنىڭ ءباسپاسوز قىزمەتى دەرەگىنە سۇيەنگەن egemen.kz ءتىلشىسى حابارلادى.
وسىعان ارنالعان سالتاناتتى جيىندى اۋدان اكىمى ازامات تايجانوۆ اشىپ, قۋانىشتى وقيعانىڭ جاي-جاپسارىن ايتىپ بەردى. ول بەرىلگەلى تۇرعان جاڭا باسپانالاردىڭ ەندىگى يەلەرى كامەلەتتىك جاسقا تولماعان 5 جەتىم بالا, كوپ بالالى 2 وتباسى جانە تۇرمىستارى تومەن 3 سەميا ەكەنىن اتاپ ءوتتى.
«مەن بۇگىن باسپانالى بولعانىما ەرەكشە قۋانىشتىمىن. شىنىمدى ايتسام, بۇلاي بولادى دەپ ءتىپتى دە ويلاعان ەمەس ەدىم. ەندى ەشتەڭەگە الاڭداماي, وتباسىممەن باقىتتى عۇمىر كەشەمىز دەگەن ويدامىز. بىزدەرگە وسىنداي قامقورلىق تانىتىپ جاتقان مەملەكەتىمىزگە مىڭ العىس», - دەدى پاتروناتتىق وتباسىنىڭ تاربيەلەنۋشىسى و. ريازانوۆ باسقوسۋدا سويلەگەن سوزىندە.
ارشالى كەنتىندە بوي كوتەرگەن 16 پاتەرلى تۇرعىن ءۇيدىڭ قۇرىلىسىنا بيۋدجەتتەن 143 ميلليون تەڭگە قارجى بولىنگەن. قۇرىلىس جۇمىستارىن باس مەردىگەر رەتىندە «سك گروسس» جشس اتقارعان.
اۋدان باسشىلارىنىڭ ايتۋلارىنشا, ءۇي بارلىق تالاپتارعا ساي سالىنعان. ونىڭ جانىنان اۆتوتۇراق پەن بالالار الاڭى جاسالعان.
اۋدان اكىمى ا. تايجانوۆ ءوز سوزىندە پرەزيدەنت نۇرسۇلتان نازارباەۆتىڭ باسپانانىڭ تۇرعىندار ءۇشىن قولجەتىمدى ءارى ساپالى بولۋىن ۇنەمى ەسكەرتىپ كەلە جاتقانىن, مەملەكەتتىك باعدارلامانىڭ ارقاسىندا قازاقستاندىقتاردىڭ ءبىرازى جىلدا باسپانالى بولىپ تۇراتىنىن اتاپ ءوتتى.
باقبەرگەن امالبەك.
دەرەك: اقمولا وبلىستىق ىشكى ساياسات باسقارماسىنىڭ ءباسپاسوز قىزمەتى.