ارحەولوگتار 5 مىڭ جىل بۇرىنعى قابىردىڭ ورنىن تاپتى

استانا. 29 ءساۋىر. تايۆاندا ارحەولوگتار 5 مىڭ جىل بۇرىن كومىلگەن 48 ادامنىڭ ءمايىتىن تاپتى. بۇل تۋرالى spbdnevnik.ru-عا سىلتەمە جاساعان egemen.kz ءتىلشىسى حابارلادى. ولاردىڭ اراسىندا ءبىر ايەلدىڭ سۇيەگى كوپشىلىكتىڭ نازارىن اۋدارتتى. ەرەكشەلىگى – ول ءسابيىن ۇستاعان كۇيى جەرلەنگەن. جاراتىلىستانۋ عىلىمدارىنىڭ ۇلتتىق مۇراجايى انتروپولوگيا ءبولىمىنىڭ قىزمەتكەرى چجۋ حۋەيلي مامانداردىڭ تاڭدانىستارىن جاسىرا الماعانىن ايتتى. عالىمدار ونىڭ تىستەرى ارقىلى وسىدان 4800 جىل بۇرىن, ياعني نەوليت داۋىرىندە ءومىر سۇرگەنىن انىقتادى. زەرتتەۋ ناتيجەلەرى بويىنشا جەرلەنگەن كەزدە جاسى 20-دا بولعانى بەلگىلى بولدى. بويىنىڭ ۇزىندىعى 160 سانتيمەتر. ال قولىنداعى ءسابيدىڭ ءتىپتى, تىستەرى دە شىعىپ ۇلگەرمەگەن, بويى 50 سانتيمەتر. سونىمەن قاتار, قابىردەن ىدىس-اياقتار دا تابىلدى. مۇنداي قورىمدار وسىعان دەيىن دە تابىلعان. وتكەن جىلى قىتايدىڭ ارنايى قۇرىلعان توبى قولا داۋىرىندە تىرشىلىك ەتكەن اناسى مەن بالاسىنىڭ قاڭقالارىن تاپتى. بولجام بويىنشا ءزىلزالا كەزىندە بالاسىن قورعاماق بولعان. ايان ءابدۋالي. دەرەك: spbdnevnik.ru. فوتو: youtube.com.