كولۋمبيادا زيكا بەزگەگىن جۇقتىرعاندار سانى ارتىپ بارادى

استانا. 28 اقپان. كولۋمبيادا زيكا بەزگەگىن جۇقتىرعاندار سانى ارتىپ بارادى. بۇل تۋرالى ريا «نوۆوستي» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. سوڭعى ءبىر اپتانىڭ ىشىندە زيكا ىندەتىن جۇقتىرعاندار سانى 37 مىڭنان 42,7 مىڭعا ارتتى. ولاردىڭ اراسىندا 7,6 مىڭ تۇرعىن جۇكتى ايەلدەر. وسى كورسەتكىش بويىنشا, كولۋمبيا برازيليادان كەيىنگى ەكىنشى ورىندا تۇر. اتالعان ىندەتكە شالدىققاندار سانى كوپ بولعانىمەن ميكروتسەفاليامەن تۋىلعان ءبىر-اق بالا انىقتالدى. سونداي-اق, وسىعان دەيىن زيكامەن اۋىرعان گيەنا-باررە سيندرومى بار ءۇش ناۋقاس كوز جۇمدى. دارىگەرلەر ولاردىڭ قايتىس بولۋىنا وسى سيندروم سەبەپ بولدى دەگەن شەشىم شىعاردى. زيكا ىندەتى كوبىنە قاۋىپتى ۆيرۋس جۇقتىرعان جاندىكتەر مەن تورپيكالىق ايماقتاردا ءومىر سۇرەتىن ماسالار ارقىلى جۇعادى. ادامدار اراسىنداعى جۇقپالى اۋرۋلاردىڭ قاتارىنا جاتپايدى. دەنە قىزۋى, تىتىركەنۋى, بۋىن اراسىنداعى جايسىزدىق, باس اۋرۋلارى ىندەتتىڭ نەگىزگى بەلگىلەرى بولىپ ەسەپتەلەدى. زيكا ىندەتىن جۇقتىرعان بولاشاق انادان ميكروتسەفاليا اۋرۋىمەن اۋىراتىن سابيلەر دۇنيەگە كەلەدى. ول ءوز كەزەگىندە ءسابيدىڭ باس سۇيەگىنىڭ قاجەتتى مولشەردە وسۋىنە كەدەرگى جاساپ, مي قۇرىلىسىنىڭ دامۋىنا زيانىن تيگىزەدى. بۇل كەزدە ارنايى ۆاكتسينالار كومەكتەسپەيدى. دۇنيەجۇزىلىك دەنساۋلىق ساقتاۋ ۇيىمى قاۋىپتى ىندەتتىڭ 2015 جىلى ءساۋىر ايىندا برازيليا مەملەكەتىندە باستالعانىن رەسمي تۇردە حابارلادى. وسىدان سوڭ, وڭتۇستىك امەريكانىڭ وزگە دە ەلدەرىنە تاراعان. ايان ءابدۋالي. دەرەك, سۋرەت: ريا «نوۆوستي».