الماتى وبلىسىنىڭ تالعار اۋدانىنداعى بەساعاش اۋىلىندا 600 ورىندىق جاڭا مەكتەپ بيىلعى وقۋ جىلىندا شاكىرتتەرگە ەسىگىن ايقارا اشتى. بۇل ءبىلىم ۇياسىنىڭ اشىلۋ سالتاناتىنا الماتى وبلىسىنىڭ اكىمى اماندىق باتالوۆ پەن قازاقستان رەسپۋبليكاسى ءبىلىم جانە عىلىم ءمينيسترى اسلان ءسارىنجىپوۆ قاتىستى.
«نۇرلى جول» مەملەكەتتىك باعدارلاماسى اياسىندا بوي كوتەرىپ, الدى حالىق يگىلىگىنە ۇسىنىلىپ جاتقان مەكتەپتەردىڭ ەل كەلەشەگىنە قوسار ۇلەسى وراسان ەكەندىگىن جەتكىزگەن وبلىس اكىمى اماندىق باتالوۆ اۋدان حالقىنا جاڭا ءبىلىم عيماراتىنىڭ يگىلىگىن تاتىپ, تاربيەلى ۇرپاقتىڭ قىزىقشىلىعىن كورۋلەرىن, ءبىلىم بەرۋ ىسىندە ەڭبەك ەتۋشى ۇستازدار قاۋىمىنا اتقارار قىزمەتتەرى جەمىستى بولۋىن تىلەدى.
– الماتى وبلىسى دەموگرافيالىق ءوسىم جونىنەن قارقىندى ناتيجە كورسەتىپ كەلە جاتقان ايماق. ويتكەنى, مۇندا وزگە ءوڭىرلەردەن كوشىپ كەلۋشىلەر سانى وتە كوپ. بيىل وسى ءوڭىردىڭ وزىندە 18 جاڭا مەكتەپ اشىلىپ, وبلىس اۋماعىنداعى حالقى ەڭ تىعىز ورنالاسقان ەلدى مەكەندەردەگى جاستارىمىزدىڭ ءبىلىم الۋىنا كوپتەگەن جەڭىلدىكتەر جاسالىنباق. وسىنداي جاڭا مەكتەپتەر اشۋ ارقىلى ءبىز ءۇش اۋىسىمدى مەكتەپتەر مەن اپاتتى جاعدايداعى ءبىلىم وردالارىنىڭ ماسەلەسىن تۇبەگەيلى شەشەتىن بولامىز, – دەدى ءبىلىم جانە عىلىم ءمينيسترى اسلان ءسارىنجىپوۆ.
بەساعاشتىقتاردىڭ قۋانىشىن ءبولىسۋگە كەلگەن پارلامەنت ءماجىلىسىنىڭ دەپۋتاتى ءاليحان تويباەۆ, تالعار اۋدانىنىڭ اكىمى رايحان سادىقوۆا جاڭا مەكتەپتەن تۇلەپ ۇشاتىن جاس بۋىن وكىلدەرى وقۋدا وزات بولاتىندارىنا سەنىم ءبىلدىرىستى.
بەساعاش اۋىلىنداعى №45 مەكتەپ گيمنازياسىنىڭ قۇرىلىس جۇمىسى 2014 جىلى باستالىپ, رەسپۋبليكالىق جانە جەرگىلىكتى بيۋدجەتتەن 1 ميلليارد 187 ميلليون تەڭگە قارجىلاي قولداۋعا يە بولعان ەدى. «التاير» جشس باس مەردىگەر بولىپ, دىتتەگەن ۋاقىتىندا تاپسىرىلعان قۇرىلىستىڭ جالپى كولەمى 3060 شارشى مەتر.
جاڭا مەكتەپتە 45 وقۋ كابينەتى, 3 شەبەرحانا, 1 مۋلتيمەديالىق كابينەت, جاڭا ۇلگىدەگى حيميا, فيزيكا, بيولوگيا جانە ينفورماتيكا كابينەتتەرى, 575 شارشى مەترلىك سپورت زالى, 200 ورىندىق اسحانا جانە مەديتسينالىق بولمەسى بار. بۇدان وزگە, كىتاپ قورىندا 3000 ادەبي جانە 6000 وقۋلىقپەن قامتىلعان كىتاپحانا مەن وقۋ زالى, وقۋشى قىزدار ءۇشىن تىگىن, ال ۇلدار ءۇشىن اعاش پەن مەتالل وڭدەيتىن تسەحتار بار. ەڭبەك ساباعىن وتكىزۋ ءۇشىن بارلىق قۇرال-سايمان مەن كەرەكتى جابدىقتار تولىق جەتەرلىك.
ازىرگە 60 مۇعالىم قىزمەت اتقارعالى وتىرعان جاڭا مەكتەپتىڭ اشىلۋ سالتاناتىنا اۋىل تۇرعىندارى ەرەكشە كوڭىل-كۇيمەن قاتىسىپ, اقساقالدار جاستارعا باتا بەرىپ, جاڭا ءبىلىم جولىندا ۇلگىلى بولۋلارىنا تىلەك قوستى.
قالىقتاعان شاتتىقتىڭ قاناتىندا ءان,
قۋانىشتىڭ جىرىنان دالا تۇنعان.
مەكتەبىمىز جاراندار قۇتتى بولسىن,
بەساعاشتىڭ تورىنەن جاڭا اشىلعان!
– دەپ ارمان ادىلعازى ەسىمدى ءشاكىرت جىر ارناپ, ونەرپاز وقۋشىلار ءان-بيدەن شاشۋ شاشتى.
قانات ەسكەندىر,
«ەگەمەن قازاقستان».
الماتى وبلىسى.
سۋرەتتەردى تۇسىرگەن
جۇماباي مۇسابەكوۆ.
