العاشقى ەكى كەزدەسۋدە ءبيبىسارا اساۋباەۆا (فيدە رەيتينگىندە 2 516 ۇپايى بار) رامەشبابۋ ۆايشالي ء(ۇندىستان, 2 470), الەكساندرا گورياچكينامەن (رەسەي, 2 534) تەڭ ءتۇستى. ءۇشىنشى تۋردا الەمدىك رەيتينگتە ەكىنشى ورىندا تۇرعان قىتايلىق چجۋ تسزينەردى (2 578) جەڭىپ, سەنساتسيالىق ناتيجە تىركەدى. كوپ كەشىكپەي الەمنىڭ ەكس-چەمپيونى تان چجۋنيمەن (قىتاي, 2 534) ۇپاي ءبولىستى. بەسىنشى, التىنشى تۋرلاردا اساۋباەۆا ءساتسىز ونەر كورسەتىپ, ەكاتەرينا لاگنو (رەسەي, 2 508) مەن ديۆيا دەشمۋكحقا ء(ۇندىستان, 2 497) ەسە جىبەردى. وسى ساتسىزدىكتىڭ سالدارىنان جەرلەسىمىز جارىس كەستەسىندەگى جاعدايىن كۇرت ناشارلاتىپ, جەتىنشى ورىنعا سىرعىپ ءتۇستى. جەتىنشى تۋردا اننا مۋزىچۋكپەن (ۋكراينا, 2 522) شەبەرلىك بايقاستى. بۇل باسەكەدە جەڭىمپاز انىقتالمادى.
ەكىنشى كەزەڭ باستالعان تۇستا جوعارىداعى جاعداي اينا-قاتەسىز قايتالاندى. العاشقى اينالىمداردا ۆايشالي, گورياچكينامەن تەڭ ويناعان ءبيبىسارا 10-تۋردا تسزينەردى تاعى دا ۇتتى. ودان كەيىن چجۋنيمەن ۇپاي ءبولىستى. 12, 13-تۋرلاردا قارقىنىن كۇرت كۇشەيتكەن قانداسىمىز لاگنو مەن مۋزىچۋكتى ۇتىپ, ۇپاي سانىن 7,5-كە جەتكىزدى. وسى جەڭىستەرىنىڭ ارقاسىندا ءبيبىسارا وسىعان دەيىن جەكە-دارا كوش باستاپ تۇرعان ۆايشالي رامەشبابۋدى قۋىپ جەتىپ, ءبىرىنشى, ەكىنشى ورىندى ءوزارا ءبولىسىپ تۇردى.
ءبىرىنشى ورىننىڭ ءباسى سوڭعى تۋردا شەشىلدى. ءبيبىسارا دەشمۋكحمەن شەبەرلىك بايقاسىپ, تەڭ ءتۇستى. ال جەرلەسىمىزدىڭ باستى قارسىلاسى رامەشبابۋ ۆايشالي ەكاتەرينا لاگنودان ايلاسىن اسىردى. ناتيجەسىندە, ب.اساۋباەۆا 8 ۇپايمەن, ەكىنشى ورىندى قاناعات تۇتتى. وسى جارىس بارىسىندا 14 كەزدەسۋ وتكىزگەن ول ءتورت رەت جەڭىسكە جەتىپ, ەكى رەت ۇتىلدى. جەتى ويىندا جەڭىمپاز انىقتالعان جوق. قالاي دەگەندە دە ب.اساۋباەۆا بۇل تۋرنيردە ءساتتى ونەر كورسەتتى. كىلەڭ مىقتىلار باس قوسقان باسەكەدە ەكىنشى ورىن الۋ – اسا جوعارى كورسەتكىش. سول تۇرعىدا جاستايىنان-اق الەمدىك دودالاردا توپ جارعان, بليتستەن (شاپشاڭ شاحمات) ءۇش دۇركىن الەم چەمپيونى دەگەن اتاعى بار قايسار مىنەزدى قازاق قىزىنىڭ بولاشاعى الدا دەپ سەنەمىز.
ءبيبىسارادان بار-جوعى جارتى ۇپاي ارتىق جيناعان ۆايشالي «ۇمىتكەرلەر ءتۋرنيرىنىڭ» جەڭىمپازى اتاندى. ەندى ۇندىستاندىق شاحماتشى بۇگىندە تورتكۇل دۇنيەنىڭ تەڭدەسسىزى دەپ تانىلىپ وتىرعان قىتايلىق تسزيۋي ۆەنتسزيۋنمەن چەمپيوندىق تاجگە تالاسادى.
جارىستىڭ جۇلدە قورى بيىل 300 000 ەۋرونى قۇرادى. باس جۇلدەنى ولجالاعان شاحماتشى 28 000-دى يەلەنسە, ەكىنشى ورىن العان ويىنشى 17 000-دى ەنشىلەدى. ۇزدىك ۇشتىكتى تۇيىندەگەن بۇرىمدى 8 600 ەۋرونى ءاميانىنا سالدى.
ەرلەر اراسىنداعى جارىس جاۆوحير سينداروۆتىڭ جارقىن جەڭىسىمەن اياقتالدى. ءتۋرنيردىڭ اياقتالۋىنا ءبىر تۋر قالعاندا وزبەكستاندىق گروسسمەيستەردى ەندى ەشكىمنىڭ قۋىپ جەتە المايتىنى بەلگىلى بولدى. كيپردە ول گەرمانيالىق ماتتياس بليۋباۋم, ۇندىستاندىق رامەشبابۋ پراگناناندحا, امەريكالىق فابيانو كارۋانا مەن حيكارۋ ناكامۋرا, نيدەرلاندىق انيش گيري, قىتايلىق ۆەي ي, رەسەيلىك اندرەي ەسيپەنكو سىندى ساڭلاقتاردىڭ الدىن وراپ كەتتى. جاۆوحير 14 كەزدەسۋدە 10 ۇپاي جيناپ, رەكوردتىق ناتيجە كورسەتتى. ەندى 20 جاستاعى وزبەكتىڭ اسا دارىندى شاحماتشىسى الەم چەمپيونى, ۇندىستاندىق گۋكەشا دوممارادجۋمەن چەمپيوندىق ءتاجدى ساراپقا سالادى.
