بيىلعى دودا بۇعان دەيىنگى ماۋسىمداردان ەرەكشە ءوتتى. ولاي دەيتىنىمىز, العاش رەت ەلىمىزدىڭ ءار وڭىرىنەن 500 كوماندا قاتىسىپ, جالپى سانى 2 500 جاس ءبىر الاڭدا باس قوستى. شارانى ۇيىمداستىرۋشى تۇركىستان وبلىسى قوعامدىق دامۋ باسقارماسى «جاستار رەسۋرستىق ورتالىعى» كمم-ءنىڭ باسشىسى ەرنار بەكتاەۆ وسىنداي باستامالار ارقىلى ءبىلىمدى, بەلسەندى, جان-جاقتى جاستاردىڭ قاتارىن كوبەيتۋ كوزدەلىپ وتىرعانىن اتاپ ءوتتى. «AL-FARABI» ينتەللەكتۋالدى ويىنى الداعى ۋاقىتتا جالعاسىن تاۋىپ, اۋقىمىن كەڭەيتە بەرەتىنىنە سەنىم ءبىلدىردى.
ينتەللەكتۋالدى ويىننىڭ العاشقى ىرىكتەۋ كەزەڭى كەنتاۋ قالاسىنىڭ ورتالىق الاڭىندا ءوتتى. اشىق اسپان استىندا ۇيىمداستىرىلعان اۋقىمدى دوداعا قاتىسۋشىلار ءبىلىم, لوگيكا, تاريح, ادەبيەت, گەوگرافيا, مادەنيەت جانە وزگە دە باعىتتار بويىنشا سىنعا ءتۇستى. ءار كوماندا ۋاقىتپەن ساناسا وتىرىپ, قويىلعان سۇراقتارعا ناقتى ءارى جىلدام جاۋاپ بەرۋگە تىرىستى. ىرىكتەۋ كەزەڭىنىڭ وزىندە باسەكەنىڭ دەڭگەيى جوعارى بولدى. كوماندالار اراسىنداعى ۇپاي ايىرماشىلىعى وتە از بولعاندىقتان, سوڭعى سۇراقتارعا دەيىن تارتىس ساقتالدى. قاتىسۋشىلاردىڭ ءبىلىم دەڭگەيى, جىلدام ويلاۋ قابىلەتى جانە ءوزارا ۇيلەسىمى ولاردىڭ كەلەسى كەزەڭگە وتۋىنە تىكەلەي اسەر ەتتى. ۇزدىك ناتيجە كورسەتكەن 45 كوماندا كەلەسى كەزەڭگە جولداما الدى.
تۇركىستان قالاسىندا جالعاسقان زياتكەرلىك ويىننىڭ كەلەسى كەزەڭدەرىندە باسەكە كۇشەيىپ, سۇراقتاردىڭ كۇردەلىلىك دەڭگەيى ارتا ءتۇستى. ال اقتىق كەزەڭدە قاتىسۋشىلاردىڭ دايىندىق دەڭگەيى, جىلدام ويلاۋ قابىلەتى جانە كوماندا مۇشەلەرىنىڭ ءبىر-بىرىمەن ۇيلەسىمدى ارەكەت ەتۋى انىق بايقالدى. فينال قورىتىندىسى بويىنشا ءى ورىندى سايرام اۋدانىنان كەلگەن «IQ Elite» كومانداسى جەڭىپ الدى. ءىى ورىندى الماتى قالاسىنىڭ «A team» كومانداسى يەلەنسە, ءىىى ورىن كەلەس اۋدانىنان كەلگەن «Keles Oilap» كومانداسىنا بۇيىردى.
جەڭىمپازدار مەن جۇلدەگەرلەرگە جالپى كولەمى 3 ميلليون تەڭگە جۇلدە قورى تابىستالدى. سونىمەن قاتار قاتىسۋشى كوماندالارعا ىنتالاندىرۋ سىيلىقتارى بەرىلدى.
تۇركىستان
