جارمەڭكە اياسىندا ەكى كۇن بويى ەلوردا تۇرعىندارى مەن قوناقتارى اقمولا ءوڭىرى شەبەرلەرىنىڭ قولىنان شىققان بۇيىمدارمەن, اۆتورلىق توپتامالارمەن جانە جەرگىلىكتى برەند ونىمدەرمەن جاقىن تانىستى. اسىرەسە ءىس-شارادا كرەاتيۆتى ەكونوميكانىڭ زاماناۋي باعىتتارىنا ەرەكشە نازار اۋدارىلدى. ارنايى ايماقتا IT, digital جانە مەديا جوبالار, سونداي-اق روبوتتەحنيكا, ويىن ازىرلەۋ, جاساندى ينتەللەكت, تۋريزم جانە كيبەرسپورت سالالارىنداعى جاڭا ستارتاپتار تانىستىرىلدى.
اقمولا وبلىسى اكىمىنىڭ ورىنباسارى دوسۇلان ايتباەۆتىڭ ايتۋىنشا, وڭىردە كرەاتيۆتى يندۋستريا سالاسى جاقسى دامىپ كەلەدى. ايماقتا زەرگەرلىك ونەر, ۇلتتىق مۋزىكالىق اسپاپتار جاساۋ, اعاش وڭدەۋ, ديزاين, ءسان يندۋسترياسى, قولونەر, سونداي-اق IT جانە digital جوبالارى قارقىن العان.
«بۇگىندە وبلىستا 47 باعىتتا 2 مىڭنان اسا كرەاتور جۇمىس ىستەيدى. ءبىز بۇگىنگى ءىس-شاراعا سولاردىڭ ونىمدەرىن جيناقتاپ الىپ كەلدىك. بارلىق ايماق ءۇش بولىككە بولىنگەن. ءبىرىنشىسى – ۇلتتىق مۇرالاردى دارىپتەۋ, ەكىنشىسى – شابىت الەمى, ءۇشىنشىسى – بولاشاق ەكونوميكاسى», دەدى ول.
جارمەڭكەدە وبلىس كرەاتورلارىنىڭ ەكسپوزيتسياسى بىرنەشە تاقىرىپتىق زالعا بولىنگەن. ولاردىڭ ارقايسىسى ءوڭىردىڭ مادەني-كرەاتيۆتىك بولمىسىنىڭ جەكە الەمىن كورسەتەدى. ماسەلەن, ءبىرىنشى زال – زەرگەرلىك ونەرگە ارنالدى. مۇندا ايماقتاعى زەرگەرلەردىڭ كۇمىس جانە تابيعي تاستاردان جاسالعان بۇيىمدارى قويىلدى. بۇل بۇيىمدار قوناقتاردى ايشىقتى ورنەگىمەن بىردەن باۋراپ الدى. ال ەكىنشى زالدا – اعاش, بىلعارى جانە سۇيەك ونەرىنە ارنالعان ءبىرتۇتاس ەكسپوزيتسيا جاسالعان. وندا ۇلتتىق قولونەر مەن زاماناۋي كوركەمدىك باعىت ادەمى ۇيلەسىم تاپقان. بۇل زالدا ەلىمىزدەگى ۇلتتىق اعاش بۇيىمدارى فابريكاسى — «بلەك» جشس ونىمدەرىمەن بىرگە ايماق شەبەرلەرىنىڭ تۋىندىلارى ۇسىنىلدى.
اسىرەسە ەلوردالىقتاردى ۇلتتىق مۋزىكالىق اسپاپتار الەمى ەرەكشە ءتانتى ەتتى. وسى كورمەگە كوركەم كوكشە باۋرايىن سىرلى سازعا بولەگەن اقان سەرى, ءبىرجان سال, ۇكىلى ىبىراي سەكىلدى ايتۋلى تۇلعالاردىڭ ۇستاعان دومبىرالارىنىڭ كوشىرمەسى اكەلىنگەن. سونداي-اق كورنەكتى جازۋشى ساكەن ءجۇنىسوۆتىڭ دومبىراسى دا توردەن ورىن العان. كورمەنىڭ ەرەكشە ەكسپوناتى – «دومبىرا-قوبىز» مۋزىكالىق اسپابى. ونىڭ اۆتورى – كوكەي مەللات ۇلى.
ءتورتىنشى زالدىڭ ءجونى ءتىپتى بولەك. بۇل زاماناۋي وي مەن شىعارماشىلىق ەنەرگيا توعىسقان «Event» ايماعى دەپ اتالعان. ايماقتىڭ وكىلدەرى قوناقتاردى داۋىلپاز اقىن ساكەن سەيفۋلليننىڭ «ارقانىڭ كەربەز سۇلۋ كوكشەتاۋى» انىمەن قارسى الدى. ونى «تۇمار» نەو-ەتنو ءانسامبلىنىڭ سۇيەمەلدەۋىمەن ءانشى جالعاس سۇلتانوۆ ورىندادى. مۇندا اقمولا وبلىسىندا جۇزەگە اسقان «جەتى قازىنا» ينتەللەكتۋالدى ويىنى دا تانىستىرىلدى. سونداي-اق جاستار جاساعان جاڭا ستارتاپتار دا كورسەتىلدى. «Aqmola Hub» وكىلى اسەل ابدراحمانوۆا «IT, digital, media» جوباسىن ۇسىندى. بۇل جوبا جۇرتشىلىقتى سونى جاڭالىعىمەن قىزىقتىردى. سونىمەن بىرگە بۇل بولىمدە جاستاردىڭ شىعارماشىلىق الەۋەتىن كورسەتەتىن جوبالار جەتەرلىك ەكەن. «جاڭا بەلەس» حورەوگرافيالىق ءانسامبلى «Qaraqshy» ترەگىنىڭ سۇيەمەلدەۋىمەن زاماناۋي ترەند ءبيدى ورىندادى. ال ديماش اقايدار الەمدىك دەڭگەيدەگى حيتتەردىڭ اۆتورى ەرجان ەردەنوۆتى تانىستىرىپ, وڭىردەن شىققان جاس تالانتتاردىڭ جەتىستىكتەرىن باياندادى.
ماسەلەن, جاس رەجيسسەر جۇلدىزاي امانگەلديەۆانىڭ ايتۋىنشا, وبلىس كولەمىندە كينويندۋستريا سالاسى جۇيەلى جولعا قويىلعان.
ء«بىز وبلىس اكىمدىگىنىڭ قولداۋىمەن 18 فيلم تۇسىردىك. بۇل تۋىندىلاردىڭ جانرى ءارتۇرلى. ونىڭ ىشىندە تاريحي, درامالىق فيلمدەردە بار. مىسالى, بۋرابايدىڭ اسەم تابيعاتى تۋرالى «جاڭا جىل» دەگەن سەريال تۇسىردىك. تۋىندىنى كورەرمەن جىلى قابىلدادى. قازىر تريللەر جانرىندا كينو ءتۇسىرىپ جاتىرمىز. ءاربىر جوبانىڭ ماقساتى – ۇلتتىق قۇندىلىقتاردى دارىپتەۋ», دەيدى ول.
شىنىندا, جارمەڭكەدەگى ءاربىر ايماق ۇلتتىق قۇندىلىقتارمەن ايشىقتالعان. ايتالىق, «سىرماق» شەبەرلەر ايماعى قوناقتارعا «ون التى قىز» حالىق ءانسامبلىنىڭ سىرماقپەن بي پەرفومانسىن ۇسىندى. مۇندا ء«بىر اۋىل – ءبىر ءونىم» بايقاۋىنىڭ جەڭىمپازى, قوسشى قالاسىنىڭ شەبەرى ءاليا قالياسقاروۆا شەبەرلىك ساباعىن وتكىزىپ, كيىز وڭدەۋ مەن سىرماق جاساۋ ونەرىنىڭ قىر-سىرىمەن ءبولىستى. ال شەبەرلىك جانە دەمونستراتسيا ايماعىندا كەلۋشىلەر قىش ونەرىمەن جاقىن تانىسىپ قانا قويماي, ولاردىڭ جۇمىسىن كوزىمەن كوردى. مۇندا قىش ونەرىنىڭ وكىلدەرى – انار ساتىباەۆا (كوكشەتاۋ قالاسى) مەن اقجول داۋلەتكەرىم ۇلى (قوسشى قالاسى) شەبەرلىك ساباعىن وتكىزدى. جەتىنشى زال – ديزاين زالىنا ارنالعان. مۇندا ۇلتتىق جانە زاماناۋي ديزاين باعىتىندا تابىستى ەڭبەك ەتىپ جۇرگەن شەبەرلەر مەن شىعارماشىلىق ۇجىمداردىڭ, ال سەگىزىنشى زالدا – اقمولا وڭىرىنەن شىققان قىلقالام شەبەرلەرىنىڭ تۋىندىلارى قويىلعان. بۇگىندە ايماقتا 80-گە جۋىق سۋرەتشى بار. ونىڭ 30-دان استامى سۋرەتشىلەر وداعىنىڭ مۇشەسى.
سونداي-اق جوبا اياسىندا جارمەڭكەگە قويىلعان ونىمدەردى ساتىپ الۋعا دا مۇمكىندىك بولدى. جارمەڭكەنىڭ العاشقى كۇنىندە كرەاتورلار جالپى سوماسى 5 ميلليون تەڭگەنىڭ ءونىمىن ساتقان.
اقمولا وبلىسىنىڭ كرەاتيۆتى جارمەڭكەسى ءداستۇر مەن جاڭاشىلدىقتى ۇشتاستىرعان ەرەكشە مادەني الاڭعا اينالدى. كورمە ءوڭىردىڭ تالانتتى تۇلعالارى مەن جاس كاسىپكەرلەرىنىڭ شىعارماشىلىق جەتىستىكتەرىن تانىستىرىپ, كرەاتيۆتى يندۋستريانىڭ الەۋەتىن تولىق كورسەتتى.
