بۇگىندە سارقان قالاسىندا تۇرعىن ءۇي قۇرىلىسى قارقىندى جۇرگىزىلىپ جاتىر. مۇندا 60 پاتەرلى 30 تۇرعىن ءۇي ەل يگىلىگىنە بەرىلەدى. بۇل – تەك قۇرىلىس نىسانى ەمەس, ونداعان وتباسىنىڭ بولاشاققا دەگەن ءۇمىتىن ۇكىلەيتىن ۇلكەن جوبا, شالعايداعى ەلدى مەكەندەردىڭ الەۋمەتتىك جاعدايىن جاقسارتۋعا باعىتتالعان ماڭىزدى قادام.
باستامانى باتىل قولعا العان ورازعالي سادۋاقاسوۆ تۋعان جەرىنە دەگەن سۇيىسپەنشىلىگىن ناقتى ىسپەن دالەلدەپ كەلەدى. جوبانى جۇزەگە اسىرۋ جۇمىستارىن ونىڭ ۇلى ارنۇر ورازعالي ۇلى جەتەكشىلىك ەتەتىن «سانگاز» جاۋاپكەرشىلىگى شەكتەۋلى سەرىكتەستىگى اتقارىپ جاتىر. اكە مەن بالانىڭ ءبىر ماقسات جولىنداعى ەڭبەگى ءوڭىر تۇرعىندارىنىڭ ريزاشىلىعىنا بولەنىپ وتىر.
«قازاق حالقى ەجەلدەن تۋعان جەردىڭ قادىرىن بيىك قويعان. «تۋعان جەرگە تۋىڭدى تىك» دەگەن دانا ءسوزدىڭ ءمانى دە وسىندا. قاي كەزدە دە ەلىنىڭ دامۋىنا ۇلەس قوسقان ازاماتتار حالىقتىڭ قۇرمەتىنە يە بولعان. بۇگىنگى يگى باستاما دا سول ءداستۇردىڭ جالعاسى», دەيدى ارنۇر ورازعالي ۇلى.
قۇرىلىس جۇمىستارى بەلگىلەنگەن جوسپارعا ساي جۇرگىزىلىپ جاتىر. نىسانداردىڭ بارلىعى زاماناۋي تالاپتارعا سايكەس سالىنىپ, تۇرعىنداردىڭ جايلى ءومىر سۇرۋىنە قاجەتتى جاعدايلار قاراستىرىلعان. قازىردە قۇرىلىس الاڭىندا 30-دان استام ادام تۇراقتى ەڭبەك ەتىپ جاتسا, جەرگىلىكتى تۇرعىنداردىڭ دا جۇمىسپەن قامتىلۋىنا مۇمكىندىك جاسالعان.
ء«ۇي سالىنىپ جاتقان جەر تەلىمىن ساتىپ الدىق. قۇرىلىسقا قولدانىلاتىن ماتەريالداردىڭ بارلىعى ەلىمىزدە وندىرىلگەن ونىمدەر. ازىرگە بۇل اۋماقتا گاز جۇيەسى تارتىلماعاندىقتان, تۇرعىن ۇيلەر قاتتى وتىنمەن جىلىتىلادى. سۋ, جارىق, كارىز جۇيەلەرىن دە ءوز قاراجاتىمىزعا جۇرگىزىپ جاتىرمىز. گازبلوكتان تۇرعىزىلعان ۇيلەردىڭ سىرتقى ارلەۋ جۇمىستارى تولىق اياقتالىپ, ەسىك-تەرەزەسى ورناتىلىپ, ەدەنىنە لامينات توسەلىپ, قابىرعالارى كافەلمەن قاپتالىپ, تولىق دايىن كۇيىندە تاپسىرىلادى», دەيدى كاسىپكەر.
سايىپ كەلگەندە, بۇل باستامانىڭ الەۋمەتتىك ماڭىزى وتە زور. ويتكەنى تۇرعىن ءۇي ماسەلەسى قاي كەزدە دە بارىنشا وزەكتى. جاڭا ۇيلەردىڭ پايدالانۋعا بەرىلۋى باسپاناعا مۇقتاج ازاماتتاردىڭ جاعدايىن جاقسارتىپ قانا قويماي, قالا كەلبەتىنە دە وڭ وزگەرىس اكەلەدى.
ەڭ باستىسى, جوبانىڭ استارىندا تۋعان جەرگە دەگەن شىنايى جاناشىرلىق جاتىر. ادەتتە كاسىپكەرلەر ينۆەستيتسيانى ءىرى قالالار مەن تابىسى جوعارى جوبالارعا باعىتتاۋعا ۇمتىلادى. ال سارقانداي شاعىن قالادا وسىنداي اۋقىمدى قۇرىلىس جۇرگىزۋ – تۋعان ءوڭىردىڭ بولاشاعىنا دەگەن سەنىم مەن جاۋاپكەرشىلىكتىڭ ايقىن كورىنىسى.
«قايىرىمدىلىق قارجىلاي كومەك كورسەتۋمەن عانا ولشەنبەيدى. كەيدە حالىققا قاجەتتى نىسان سالۋ, جۇمىس ورىندارىن اشۋ, الەۋمەتتىك ماسەلەلەردىڭ شەشىلۋىنە ىقپال ەتۋ دە ۇلكەن ساۋاپتى ءىس سانالادى. وسى تۇرعىدان العاندا ورازعالي سادۋاقاسوۆتىڭ باستاماسى – كوپشىلىككە ۇلگى بولاتىن ازاماتتىق ۇستانىم», دەيدى سارقان اۋدانىنىڭ تۇرعىنى ەدىلبەك جانتىلەۋ.
جەرگىلىكتى تۇرعىندار يگى ىسكە ريزاشىلىقتارىن ءبىلدىرىپ وتىر. ويتكەنى جاڭا تۇرعىن ۇيلەردىڭ سالىنۋى ءوڭىردىڭ الەۋمەتتىك-ەكونوميكالىق دامۋىنا تىڭ سەرپىن بەرىپ, حالىقتىڭ ءال-اۋقاتىن ارتتىرۋعا مۇمكىندىك جاسايدى. مۇنداي جوبالار ەلدى مەكەندەردىڭ دامۋىنا عانا ەمەس, جاستاردىڭ تۋعان جەردە تۇراقتاپ ەڭبەك ەتۋىنە دە ىقپال ەتەدى. قۇرىلىس جۇمىسى تولىق اياقتالعان سوڭ, ونداعان وتباسى جاڭا قونىسقا كوشىپ, كوپتەن كۇتكەن قۋانىشقا كەنەلەدى. بۇل – ءبىر جاعىنان باسپانا ماسەلەسىنىڭ شەشىمى بولسا, ەكىنشى جاعىنان تۋعان جەردىڭ گۇلدەنۋىنە قوسىلعان ۇلەس.
«جاقسىنىڭ جاقسىلىعىن ايت, نۇرى تاسىسىن» دەگەن ءسوز بار. سارقاندا جۇزەگە اسىپ جاتقان يگىلىكتى ءىس – تۋعان جەرگە دەگەن سۇيىسپەنشىلىكتىڭ, الەۋمەتتىك جاۋاپكەرشىلىكتىڭ, قايىرىمدىلىقتىڭ جارقىن ۇلگىسى. وسىنداي باستامالار كوبەيگەن سايىن وڭىرلەر دامىپ, ەلدىڭ ەڭسەسى بيىكتەي تۇسەرى انىق.
جەتىسۋ وبلىسى
