كىتاپ تانىستىرىلىمىن قازاق تاريحي قوعامى مەن جوشى ۇلىسىن زەرتتەۋ عىلىمي ينستيتۋتى وتكىزدى. ۇيىمداستىرۋشىلار مۇنداي كەزدەسۋلەر حالىقارالىق عىلىمي ىنتىماقتاستىقتى نىعايتىپ, زەرتتەۋشىلەر, باسپاگەرلەر مەن وقىرماندار اراسىنداعى بايلانىستى كۇشەيتەتىنىن اتاپ ءوتتى.
كەش بارىسىندا امەريكالىق تاريحشى ءارى انتروپولوگ دجەك ۋەزەرفوردتىڭ «شىڭعىس حان جانە قازىرگى الەمنىڭ قالىپتاسۋى» اتتى ەڭبەگىنىڭ قازاق تىلىندەگى نۇسقاسى تانىستىرىلدى. الەمگە تانىمال كىتاپ العاش رەت قازاق تىلىنە اۋدارىلىپ وتىر. بۇعان دەيىن ەڭبەك 20-دان استام تىلدە جارىق كورگەن.
كىتاپتا موڭعول يمپەرياسىنىڭ قازىرگى الەمنىڭ قالىپتاسۋىنا اسەرى, حالىقارالىق ساۋدا جولدارىنىڭ دامۋى, ديپلوماتيالىق بايلانىستار مەن شىعىس پەن باتىس وركەنيەتتەرى اراسىنداعى مادەني ىقپالداستىق تۋرالى باياندالادى.
سونىمەن قاتار تاريحشى دجۋ-يۋپ ءليدىڭ «تۇركى حالىقتارى الەم تاريحىندا» اتتى كىتابى دا وقىرمانعا تانىستىرىلدى. ەڭبەك تۇركى حالىقتارىنىڭ تاريحى مەن ەۋرازيا كەڭىستىگىندەگى بىرەگەيلىكتىڭ قالىپتاسۋ ماسەلەلەرىنە ارنالعان.
Steppe and World Publishing House باسپاسىنىڭ نەگىزىن قالاۋشى رايسا سايران قادىر قازاقستانداعى اۋدارما ادەبيەت پەن عىلىمي-كوپشىلىك باسپا جوبالارىنىڭ دامۋى جونىندە ءسوز سويلەدى.
ء«بىز ءۇشىن دالا تاريحىنىڭ حالىقارالىق عىلىمي ديالوگتىڭ ءبىر بولىگىنە اينالعانى ماڭىزدى. مۇنداي ءىس-شارالار زەرتتەۋشىلەردى, باسپاگەرلەر مەن وقىرمانداردى بىرىكتىرەدى. قازىر دالا وركەنيەتىن زەرتتەۋ تاريحي سانا مەن گۋمانيتارلىق عىلىمدى دامىتۋ تۇرعىسىنان ەرەكشە وزەكتى», دەدى ۇيىمداستىرۋشىلار.
