جيىنعا مەملەكەتتىك ورگانداردىڭ, «اتامەكەن» ۇكپ باسشىلارى, سالالىق قاۋىمداستىقتار مەن بيزنەس وكىلدەرى قاتىستى.
وتىرىس بارىسىندا پرەمەر-مينيستر ولجاس بەكتەنوۆ وتاندىق دەنساۋلىق ساقتاۋ, فارماتسەۆتيكا جانە مەديتسينا ونەركاسىبىن دامىتۋ حالىقتىڭ ءومىر ءسۇرۋ ساپاسى مەن ۇلتتىق ەكونوميكانىڭ تۇراقتىلىعىنا تىكەلەي اسەر ەتەتىنىن اتاپ ءوتتى.
«ادامعا باعدارلانعان مەملەكەت قاعيداتى پرەزيدەنتىمىز قاسىم-جومارت كەمەل ۇلى توقاەۆتىڭ باستاماسىمەن قابىلدانعان جاڭا كونستيتۋتسيانىڭ نەگىزگى وزەگىنە اينالدى. ياعني, ادام كاپيتالىن دامىتۋ مەملەكەت قىزمەتىنىڭ ستراتەگيالىق باعىتى رەتىندە تانىلدى ءارى ول اتا زاڭدا ناقتى بەكىتىلدى. بۇل, ءوز كەزەگىندە وتاندىق دەنساۋلىق ساقتاۋ جۇيەسىن ودان ءارى دامىتۋ ءۇشىن دە تىڭ تاسىلدەردى تالاپ ەتەدى», دەدى ولجاس بەكتەنوۆ.
«اتامەكەن» ۇكپ تورالقا توراعاسى قانات شارلاپاەۆتىڭ ايتۋىنشا, بۇگىندە ەلىمىزدە 209 وتاندىق ءوندىرۋشى تىركەلگەن, ونىڭ 43-ءى دارىلىك زاتتار وندىرىسىمەن, 166-سى مەديتسينالىق بۇيىمدار شىعارۋمەن اينالىسادى. قازىرگى تاڭدا 31 قازاقستاندىق تاۋار وندىرۋشىمەن 2 مىڭنان استام فارماتسەۆتيكالىق ءونىم ءتۇرىن جەتكىزۋ بويىنشا 83 ۇزاقمەرزىمدى شارت جاسالعان. 2025 جىلعى جەلتوقساننان بەرى 316,3 ملرد تەڭگە بولاتىن 6 ينۆەستيتسيالىق جوبا ىسكە قوسىلىپ, ناتيجەسىندە 400-گە جۋىق دارىلىك زات ءتۇرىن شىعارۋ, 1,1 مىڭنان استام جۇمىس ورنىن قۇرۋ جانە ەكسپورتتىق الەۋەتتى كەڭەيتۋ كوزدەلگەن.
ەمحانالاردا تەگىن بەرىلەتىن دارىلەر ءدارىحانالاردا زاڭسىز ساتىلعان
ۇكىمەتتىڭ قولداۋىمەن ۋاكىلەتتى ورگاندارمەن بىرلەسىپ, باعانى كەزەڭ-كەزەڭىمەن رەتتەۋ بويىنشا جۇمىس جالعاسىپ جاتىر. بۇگىنگى تاڭدا بۇل شارا رەتسەپتسىز ساتىلاتىن 2,5 مىڭعا جۋىق ءدارى-دارمەكتى قامتىدى, سونداي-اق قۇنى 1 اەك-كە دەيىنگى تاعى 1,8 مىڭ رەتسەپت ارقىلى بەرىلەتىن ءدارى-دارمەك بويىنشا ۋاعدالاستىققا قول جەتكىزىلدى. مەديتسينالىق جانە فارماتسەۆتيكالىق باقىلاۋ كوميتەتىنىڭ تالداۋىنا سايكەس, بيىلعى 1 توقساندا 631 ءدارى-دارمەك ءتۇرى بويىنشا باعا ورتا ەسەپپەن 24,6%-عا تومەندەگەن. سونداي-اق دارىلىك زاتتار مەن مەديتسينالىق بۇيىمداردى ء«بىر تەرەزە» قاعيداتى بويىنشا تىركەۋدى جەدەلدەتۋ تەتىكتەرى پىسىقتالۋدا, بۇل ولاردىڭ نارىققا شىعۋ مەرزىمدەرىن قىسقارتۋعا مۇمكىندىك بەرەدى.
دارىلىك زاتتاردىڭ باعاسىن رەتتەۋ ماسەلەلەرى بويىنشا فارماتسەۆتيكالىق قىزمەتتى قولداۋ جانە دامىتۋ قاۋىمداستىعى تۇرىندەگى زاڭدى تۇلعالار بىرلەستىگىنىڭ باسشىسى مارينا دۋرمانوۆانىڭ بايانداماسى تىڭدالدى. ۇلتتىق ستاتيستيكا بيۋروسىنىڭ دەرەكتەرىنە سايكەس, 2025 جىلى ەلىمىزدە فارماتسەۆتيكالىق ءونىم ءوندىرىسىنىڭ كولەمى 191,1 ملرد تەڭگەنى قۇرادى, 2024 جىلمەن سالىستىرعاندا ءوسىم 8,7%-عا ارتقان. نارىقتىق ەرەكشەلىكتەردى ەسكەرە وتىرىپ, وتاندىق پرەپاراتتارعا باعا بەلگىلەۋ جۇيەسىن جەتىلدىرۋگە قاتىستى ۇسىنىستار ايتىلدى.
«ەۋرازيالىق مەديتسينالىق قاۋىمداستىعى» زتب اتقارۋشى ديرەكتورى ساۋلە ساتىباەۆا تمككك جانە ءمامس شەڭبەرىندە ءدارى-دارمەك پەن مەديتسينالىق ماقساتتاعى بۇيىمداردى ساتىپ الۋ ماسەلەسىن كوتەردى. وتاندىق وندىرۋشىلەرگە ارنالعان پرەفەرەنتسيالاردى كۇشەيتۋ جانە باعا بەلگىلەۋ بولىگىندە ۇزاقمەرزىمدى شارتتاردىڭ تۇراقتىلىعىن ارتتىرۋ مۇمكىندىكتەرىن قاراستىرۋ ۇسىنىلدى. سونداي-اق وتاندىق ءوندىرىستىڭ بار ەكەنىن ەسكەرە وتىرىپ, دارىلىك زاتتاردى حالىقارالىق ۇيىمدار ارقىلى ساتىپ الۋ تەتىكتەرىنىڭ اشىقتىعىنا ەرەكشە نازار اۋدارىلدى.
وتاندىق مەديتسينالىق تەحنيكا ءوندىرىسىن دامىتۋ بويىنشا «Sintez-KZ مەديتسينالىق حولدينگى» جشس ديرەكتورى يگور رىبين ۇسىنىستار ايتتى. اتالعان باستامالاردىڭ قاتارىندا وتاندىق تاۋار وندىرۋشىلەرمەن ۇزاقمەرزىمدى شارتتار جاساسۋ پراكتيكاسىن جاڭعىرتۋ, وفتەيك-كەلىسىمشارتتاردى ەنگىزۋ جانە قازاقستاندا اككرەديتتەلگەن سىناق زەرتحانالارىن قۇرۋ بار.
دەنساۋلىق ساقتاۋ ءمينيسترى اقمارال ءالنازاروۆا ءدارى-دارمەكپەن قامتاماسىز ەتۋ جۇيەسىن رەفورمالاۋ بويىنشا جۇرگىزىلىپ جاتقان جۇمىستار تۋرالى ايتىپ, اشىقتىققا, ءدارى-دارمەك قۇنىن تومەندەتۋگە جانە تسيفرلىق تەحنولوگيالاردى ەنگىزۋگە باسا نازار اۋدارىلىپ وتىرعانىن اتاپ ءوتتى. ۇزاقمەرزىمدى شارتتار بويىنشا 5 مىڭنان استام پوزيتسيا قايتا ەسەپتەلدى جانە وتكەن جىلدىڭ شىلدەسىنەن باستاپ جاڭا باعالار بەلگىلەندى. 2025 جىلدىڭ قورىتىندىسى بويىنشا قابىلدانعان شارالار ەسەبىنەن بىرىڭعاي ديستريبيۋتوردى ساتىپ الۋ كەزىندە شامامەن 75 ملرد تەڭگە كولەمىندە بيۋدجەت قاراجاتىن ۇنەمدەۋگە قول جەتكىزىلدى.
پرەمەر-مينيستر ولجاس بەكتەنوۆ فارماتسەۆتيكالىق ءونىم ءوندىرىسىن ۇلعايتۋ, تەحنولوگيالار ترانسفەرى, حالىق ءۇشىن مەديتسينالىق قىزمەتتەردىڭ قولجەتىمدىلىگى مەن ساپاسىن ارتتىرۋ باعىتتارىندا مەملەكەت پەن بيزنەستىڭ بىرلەسكەن جۇمىسىنىڭ قاجەتتىلىگىنە نازار اۋداردى.
«وتاندىق وندىرۋشىلەردى قولداۋ باسىمدىققا يە بولۋى كەرەك جانە بۇل بارلىق سالاعا قاتىستى. ءبىز بارلىق باعىتتا, سونىڭ ىشىندە مەديتسينالىق تەحنيكا جانە دارىلىك زاتتارمەن ءوزىن-ءوزى قامتاماسىز ەتۋ بويىنشا جۇمىس ىستەۋىمىز قاجەت. بۇل – ماڭىزدى ماسەلە. ۇكىمەت كاسىپكەرلىك قىزمەتتى رەتتەۋ ساياساتى اياسىندا باقىلاۋ جانە اكىمشىلىك جۇكتەمەنى ازايتۋ, سونداي-اق بيزنەستىڭ مەملەكەتتىك قولداۋ شارالارىنا قولجەتىمدىلىگىن كەڭەيتۋ جۇمىستارىن جالعاستىرادى. ءوز كەزەگىندە, بيزنەس تاراپىنان الەۋمەتتىك جاۋاپكەرشىلىكپەن قاتار, حالىقتىڭ كەڭ اۋقىمى ءۇشىن قولجەتىمدى باعادا قاۋىپسىز ءارى ساپالى فارماتسەۆتيكالىق ونىمدەرمەن قامتاماسىز ەتۋ باعىتىندا ناقتى قادامدار قاجەت», دەپ اتاپ ءوتتى ولجاس بەكتەنوۆ.
وتىرىس قورىتىندىسى بويىنشا پرەمەر-مينيستر مەملەكەتتىك ورگاندارعا بىرقاتار تاپسىرما بەردى.
دەنساۋلىق ساقتاۋ مينيسترلىگىنە وسى جىلدىڭ 1 شىلدەسىنە دەيىن ء«بىر تەرەزە» قاعيداتى بويىنشا دارىلىك زاتتار مەن مەديتسينالىق بۇيىمداردى تىركەۋدى قامتاماسىز ەتۋ تاپسىرىلدى. وسى جىلدىڭ 1 ماۋسىمىنا دەيىن كوتەرمە جانە بولشەك سەگمەنتتەگى قۇنى 1 ايلىق ەسەپتىك كورسەتكىشكە دەيىنگى دارىلىك زاتتاردىڭ باعاسىن دەرەگۋلياتسيالاۋ جۇمىستارىن اياقتاۋ قاجەت, ال 1 ايلىق ەسەپتىك كورسەتكىشتەن جوعارى باعالار بويىنشا بيىلعى 1 جەلتوقسانىنا دەيىن اياقتاۋ كەرەك.
دارىلىك زاتتاردى تىركەۋ جانە نارىققا شىعارۋ ءىسى جەدەلدەتىلەدى
دەنساۋلىق ساقتاۋ مينيسترلىگىنە «اتامەكەن» ۇلتتىق پالاتاسىمەن جانە مۇددەلى مەملەكەتتىك ورگاندارمەن بىرلەسىپ, باعا بەلگىلەۋدىڭ حالىقارالىق تاسىلدەرىن تالداۋ نەگىزىندە وتاندىق وندىرىستەگى دارىلىك زاتتار مەن مەديتسينالىق بۇيىمداردىڭ ءادىل نارىقتىق باعاسىنىڭ تەڭگەرىمىن قامتاماسىز ەتۋ تاپسىرىلدى.
بۇدان بولەك, لوكاليزاتسيالاۋ قۇرالى جانە سەرۆيستىك ينفراقۇرىلىم رەتىندە مەديتسينالىق تەحنيكانى جەتكىزۋگە ۇزاقمەرزىمدى شارتتار جاساسۋ تەتىگى بويىنشا ۇسىنىستار ەنگىزۋ.
ۇلتتىق ەكونوميكا مينيسترلىگى مۇددەلى مەملەكەتتىك ورگاندارمەن بىرلەسىپ, قوسىلعان قۇن سالىعىنىڭ بىرىڭعاي جەڭىلدەتىلگەن مولشەرلەمەسىن بەلگىلەۋ ماسەلەسىن قاراستىرىپ, دارىلىك زاتتار مەن مەديتسينالىق بۇيىمداردى يمپورتتاۋ جانە وتكىزۋ كەزىندە سالىق سالۋ تاسىلدەرىن بىرىزدەندىرۋ بويىنشا شارالار قابىلداۋى كەرەك.
