فوتو: Istockphoto.com
جاڭا ەرەجەگە سايكەس, سۋ تۇتىنۋدى ەسەپكە الۋ جۇيەسى بىرتىندەپ تسيفرلىق فورماتقا كوشىرىلەدى. ياعني, ەنگىزىلەتىن «اقىلدى» ەسەپتەگىشتەر كورسەتكىشتەردى اۆتوماتتى تۇردە جىبەرىپ, بىرىڭعاي ستاندارت بويىنشا جۇمىس ىستەيدى جانە بولاشاقتا Smart Turmys پلاتفورماسىنا قوسىلادى.
وزگەرىستەر بارلىق سۋ ەسەپتەگىشتەرىن قامتيدى. سونىمەن قاتار, سۋىق جانە ىستىق سۋ تولىقتاي ەسەپكە الىنادى.
جاڭا ۇلگىدەگى ەسەپتەگىشتەر اۆتوماتتى جاپقىش كلاپاننىڭ بولۋىمەن ەرەكشەلەنەدى. بۇل قۇرىلعى ارقىلى سۋدى قاشىقتان وشىرۋگە نەمەسە قوسۋعا مۇمكىندىك بار. دەگەنمەن, بۇل فۋنكتسيا جەتكىزۋشىگە سۋدى ءوز بەتىنشە توقتاتۋعا قۇقىق بەرمەيدى. مۇنداي شەشىمدەر قولدانىستاعى زاڭنامالارمەن, سۋ كودەكسى جانە كوممۋنالدىق قىزمەت كورسەتۋ قاعيدالارىمەن رەتتەلەدى.
سالا ماماندارىنىڭ ايتۋىنشا, قازىرگى ەسەپتەگىشتەردى جاپپاي اۋىستىرۋ تالاپ ەتىلمەيدى. ولار قىزمەت ەتۋ مەرزىمى اياقتالعانعا دەيىن قولدانىستا بولادى. جالپى كوشۋ ۇدەرىسى 2029 جىلعا دەيىن سوزىلادى, ياعني بۇل – بىرتىندەپ جۇزەگە اساتىن جاڭارتۋ.
Smart Turmys جۇيەسى ازىرگە ازىرلەنىپ جاتىر. الدىمەن كوممۋنالدىق قىزمەتتەر تولىقتاي اۆتوماتتاندىرىلعان ەسەپكە الۋ جۇيەسىن ەنگىزۋى ءتيىس, سودان كەيىن عانا بىرىڭعاي پلاتفورما ىسكە قوسىلادى.
ەسەپتەگىشتى اۋىستىرۋ تەك ناقتى جاعدايلاردا قاجەت:
– العاش رەت ورناتقاندا;
– قۇرىلعى ىستەن شىققاندا;
– قىزمەت ەتۋ مەرزىمى اياقتالعاندا (ادەتتە 10-12 جىل).
ەگەر ەسەپتەگىش تەكسەرىستەن وتسە, ونى اۋىستىرۋ مىندەتتى ەمەس. مۇنداي تەكسەرۋ ءار 4-5 جىل سايىن جۇرگىزىلەدى.
ال ەسەپتەگىش بۇزىلعان نەمەسە مەرزىمى وتكەن جاعدايدا, مەنشىك يەسىنە 30 كۇن ىشىندە جاڭاسىن ورناتۋ مىندەتى جۇكتەلەدى. وسى ۋاقىت ارالىعىندا تولەم سوڭعى 3 ايدىڭ ورتاشا كورسەتكىشى بويىنشا ەسەپتەلەدى, بىراق بۇل ءتاسىل 1 ايدان ارتىق قولدانىلمايدى. ەگەر ەسەپتەگىش ورناتىلماسا, تولەم جالپى تاريفپەن ەسەپتەلەدى, ال ول بىرنەشە ەسە قىمبات.
جاڭا جۇيەدە كورسەتكىشتەردى قولمەن تاپسىرۋ جويىلادى. اقىلدى قۇرىلعى دەرەكتەردى اۆتوماتتى تۇردە جەتكىزۋشىگە جولدايدى.
داۋلى جاعداي تۋىنداسا, ەڭ الدىمەن ەسەپتەگىشتىڭ ناقتى كورسەتكىشى نەگىزگە الىنادى. قاجەت بولسا, قايتا ەسەپ جۇرگىزىلىپ, قۇرىلعى كەزەكتەن تىس تەكسەرىسكە جىبەرىلەدى.
باعا ماسەلەسىنە كەلسەك, قازىرگى تاڭدا جاڭا ۇلگىدەگى ەسەپتەگىشتەر قاراپايىم قۇرالدارمەن سالىستىرعاندا شامامەن ەكى ەسە قىمبات. كادىمگى ەسەپتەگىشتەر 8000 تەڭگەدەن, ال اقىلدى قۇرىلعىلار 15 000 تەڭگەدەن باستالادى.
جالپى العاندا, سۋ ەسەپتەگىشتەرىن جەدەل اۋىستىرۋ تالاپ ەتىلمەيدى. ەسكى قۇرىلعىلار جۇمىسىن جالعاستىرا بەرەدى, ال جاڭاسىنا كوشۋ كەزەڭ-كەزەڭىمەن ىسكە اسادى. بارلىق شىعىندى مەنشىك يەسى وتەيدى. تەك جاڭا ۇيلەردە قۇرىلىس سالۋشى بىردەن جاڭا ۇلگىدەگى ەسەپتەگىش ورناتۋعا مىندەتتى, ايتپەسە نىسان پايدالانۋعا بەرىلمەيدى.
ۇكىمەت: ەلىمىزدىڭ بارلىق ەلدى مەكەنى 100% اۋىز سۋمەن قامتىلدى
