جولاۋشى قاۋىپسىزدىگى – جاۋاپتى مىندەت

«Burabay Express» ەلەكتر پويىزىندا ۇيىمداستىرىلعان ءىس-شارادا وزەكتى ماسەلەلەردىڭ ءمان-جايىن بىلىكتى مامانداردان بىلۋگە مۇمكىندىك تۋدى. اڭگىمە بارىسىندا بەلگىلى بولعانداي, جازعى تاسىمالعا دايىندىق 1 ساۋىردە باستالىپ 31 مامىرعا دەيىن جالعاسادى. وسى كەزەڭدە جوندەۋ ۇيىمدارى تەحنيكالىق قىزمەت كورسەتەدى. «جولاۋشىلار تاسىمالى» اق-نىڭ «قالا ماڭى تاسىمالدارى» فيليالى جىلجىمالى قۇرامدى كۇتىپ ۇستاۋ توبىنىڭ باس مەنەدجەرى دۋلات سارسەكەەۆتىڭ ايتۋىنشا, كومپانيا 2 مىننان استام ۆاگوندى پايدالانۋعا بەرەدى. ونىڭ 1300-ءى – ستاندارت, 700-دەن استامى – Talgo, 100-دەن استامى – موتورۆاگوندى جىلجىمالى قۇرام (ەلەكتر پويىزى). دايىندىق ۋاقىتىندا «ۆاگونسەرۆيس» اق جولاۋشىلار ۆاگونىنا, «قامقور لوكوموتيۆ» جشس ەلەكتر پويىزدارىنا قىزمەت كورسەتەدى.

ء«اربىر مامان ءوز جۇمىسىن اتقارادى. بارلىق ەلەكترلىك جابدىق تەكسەرىلىپ, اقاۋلار تۇزەتىلەدى. اككۋمۋلياتورلار جازعى رەجىمگە اۋىستىرىلادى. ءجۇرۋ بولىكتەرى دە تەكسەرىستەن وتەدى. تەجەۋ جۇيەلەرى رەتتەلىپ, قوزعالىس قاۋىپسىزدىگى قامتاماسىز ەتىلەدى. سالون ماماندارى بەكىتپەلەردى, تەرەزەلەردى, جالپى سالوننىڭ جاعدايىن ءجىتى قارايدى. كونديتسيونەرلەۋ جۇيەلەرى دە قايتا ىسكە قوسىلادى», دەپ ءتۇسىندىردى د.سارسەكەەۆ.

 بارلىق جۇمىس بىتكەن سوڭ كوميسسيالىق تەكسەرىس جۇرگىزىلەدى. كوميسسيا قۇرامىنا جوندەۋ ۇيىمدارىنىڭ, سانيتارلىق قىزمەت پەن كومپانيانىڭ وكىلدەرى كىرەدى. تەكسەرىستەن كەيىن دايىندىق اكتىسى جاسالادى. سودان سوڭ جوندەۋ ۇيىمى جارامدىلىق تۋرالى كەپىلدىك بەرەدى. بۇل راسىمدەرسىز ۆاگوندار پايدالانۋعا بەرىلمەيدى ەكەن.

جىلجىمالى قۇرامدى جاڭارتۋ 2014 جىلدان  باستالعان. جاڭا ۆاگوندار ەلىمىزدە وندىرىلەدى. ءبىز وتىرعان استانا-بۋراباي باعىتىنداعى «Burabay Express» پويىزى بىلتىر پايدالانۋعا بەرىلگەن. مۇندا جولاۋشىلارعا بارلىق جاعداي جاسالىپتى. ۆاگوندار جايلىلىق دەڭگەيىنە قاراي ءۇش ساناتقا بولىنەدى. بىزگە بۇيىرعان ءبىرىنشى ساناتتا ورىندىقتار وتە جايلى, ينتەرنەت قوسۋلى, ءار ورىندا تەلەفون قۋاتتاۋعا بولادى. ۆاگوننىڭ كىرە-بەرىسىندە شاعىن كوفە-بار ورنالاسقان. پويىز بار بولعانى 2,5 ساعاتتا بۋرابايعا جەتىپ بارادى.

ء«اربىر رەيستىڭ الدىندا كەشەندى تازالىق جۇمىسى جۇرگىزىلەدى. ءورت قاۋىپسىزدىگى دە تەكسەرىلەدى. ۆاگوندا كليماتتىق باقىلاۋ جۇيەسى ورناتىلعان. كۇن سالقىن بولسا جىلۋ بەرىلەدى, ال كەرىسىنشە ىسىسا – ءىش سالقىنداتىلادى. سونداي-اق اقپاراتتىق تابلولار, ماشينيسپەن بايلانىسۋ مۇمكىندىگى بار», دەيدى د.سارسەكەەۆ.

ەڭ ماڭىزدىسى, كومپانيانىڭ الداعى جوس­پارى – بارلىق ەسكى قۇرامدى جاڭاسىنا اۋىس­تىرۋ. بۇل جوسپار 2030 جىلعا دەيىن تولىق ىسكە اسپاق.

جول قاۋىپسىزدىگى دە – وزەكتى ماسەلە. تەمىرجول ۇستىندە بولعان جازاتايىم جاع­دايلار از ەمەس. «قتج» ۇك» اق-نىڭ «ما­گيسترالدىك جەلى ديرەكتسياسى» فيليالى­نىڭ قاۋىپسىزدىك جونىندەگى اتقارۋشى ديرەكتورى سەرىك ايقىنبەكوۆتىڭ ايتۋىنشا, مۇنداي وقيعالار جىل سايىن بولادى. ادامدار بىلمەستىكپەن نەمەسە ءارتۇرلى سەبەپپەن پويىز استىنا ءتۇسىپ, جاراقات الادى نە جان تاپسىرادى.

«وسىنداي وكىنىشتى جاعدايلارعا جول بەرمەۋ ماقساتىندا جىل باسىنان بەرى 16 مىڭعا جۋىق ادامعا اقپاراتتىق-ءتۇسىندىرۋ جۇمىسىن جۇرگىزدىك. وقۋ جىلى دا اياقتالۋعا شاق. سول سەبەپتى بالالارعا دا ەرەكشە كوڭىل بولەمىز. 1 ساۋىردەن باستاپ ەلىمىزدىڭ بارلىق وڭىرىندە 40-قا جۋىق توپ قۇرىلىپ, تەمىرجول بو­يىندا ورنالاسقان مىڭنان استام مەكتەپتە ءتۇسىندىرۋ جۇمىسىن جۇرگىزىپ جاتىر», دەيدى س.ايقىنبەكوۆ. مامان تەمىرجولدان وتەردە ارنايى بەلگىلەنگەن ورىندار – كوپىرلەر مەن وتكەلدەردى پايدالانۋ كەرەك ەكەنىن ەسكەرتەدى.

ينفراقۇرىلىم دا ءبىرشاما جەتىلىپ جاتىر ەكەن. 2030 جىلعا دەيىن 11 مىڭ شاقىرىم تەمىرجولدى جاڭارتۋ جوسپارى بەلگىلەنىپتى. جىل سايىن 1,5 مىڭ شاقىرىم جول جاڭارادى. وعان ءتۇرلى دەڭگەيدەگى جوندەۋ جۇمىسى كىرەدى.

«كەيىنگى جىلدارى جول ساپاسى ايتارلىق­تاي جاقساردى. بىلتىر 2024 جىلمەن سالىس­تىرعاندا قاۋىپسىزدىك كورسەتكىشتەرى شامامەن 10%-عا ارتتى. ايىنا ەكى رەت ءموبيلدى دياگنوستيكالىق كەشەن جولدارعا تەكسەرىس جۇرگىزەدى. سونىڭ ناتيجەسىندە بىلتىر وتكەن جىلعا قاراعاندا وقىس وقيعالار سانى 20% ازايدى. ينفراقۇرىلىم سەبەپ بولعان اپات مۇلدە تىركەلگەن جوق. ءتۇرلى بۇزۋشىلىقتار دا 50%-عا دەيىن قىسقاردى», دەيدى س.ايقىنبەكوۆ.

تەمىر جول ۇستىندەگى سۇحباتتان سالا ماماندارى قاربالاس كەزەڭگە جوعارى دەڭگەيدە دا­يىن ەكەنىن اڭعاردىق. اسىرەسە قاۋىپسىزدىك پەن قىزمەت ساپاسىنا مۇقيات نازار اۋدارىلادى. سوندا عانا ساپار سەنىمدى ءارى جايلى بولماق.