بۇل تۋرالى 2026 جىلعى 10 ساۋىردە قازاقستاننىڭ جاساندى ينتەللەكت جانە تسيفرلىق دامۋ مينيسترلىگىنىڭ ءباسپاسوز قىزمەتى مالىمدەدى. ۆەدومستۆو دەرەكتەرىنە سايكەس, تسيفرلىق سالانىڭ قازىرگى كورسەتكىشتەرى ساپالى ءوسىمدى كورسەتىپ وتىر:
- قازاقستاننىڭ تسيفرلىق سەكتورداعى ەكسپورتتىق تابىسى يمپورت كولەمىنەن 2,6 ەسەدەن استام جوعارى. يمپورت كولەمى 429 ملن دوللاردى قۇرادى.
- قازاقستاندىق IT-ازىرلەمەلەر 110-نان استام ەلدە سۇرانىسقا يە, ولاردىڭ قاتارىندا ءباا, گەرمانيا, يسپانيا جانە نيدەرلاندى بار.
- ءوسىمنىڭ نەگىزگى درايۆەرى – Astana Hub, ونىڭ رەزيدەنتتەرى ەكسپورتتىڭ 50%-دان استامىن (633 ملن دوللار) قامتاماسىز ەتتى.
«بۇگىندە ءبىز قازاقستاندىق IT-كومپانيالاردىڭ حالىقارالىق نارىقتارعا شىعۋىنا, ءوز شەشىمدەرىن اۋقىمداۋعا جانە جاھاندىق تسيفرلىق ەكونوميكانىڭ ءبىر بولىگىنە اينالۋىنا مۇمكىندىك بەرەتىن جاعدايلاردى جۇيەلى تۇردە قالىپتاستىرىپ جاتىرمىز. 1 ملرد دوللارلىق مەجەگە جەتۋ – قابىلدانعان قولداۋ شارالارىنىڭ, ەكوجۇيەنىڭ دامۋىنىڭ جانە حالىقارالىق ىلگەرىلەتۋدىڭ ناقتى ناتيجە بەرىپ جاتقانىن كورسەتەتىن ماڭىزدى كورسەتكىش. ءبىزدىڭ مىندەتىمىز – وسى ءوسىمدى بەكىتىپ, تسيفرلىق قىزمەتتەر ەكسپورتىن ودان ءارى ارتتىرۋعا بەرىك نەگىز قالىپتاستىرۋ», دەدى قر جيتسدم تسيفرلىق اكتيۆتەر جانە سەرپىندى تەحنولوگيالار كوميتەتىنىڭ توراعاسى عيززات بايتۇرسىنوۆ.
قازاقستاننىڭ جاھاندىق قاتىسۋى پالو-التو, شانحاي جانە دۋباي قالالارىنداعى حالىقارالىق يننوۆاتسيالىق حابتار ارقىلى دا نىعايىپ كەلەدى. جاڭا ستراتەگيالىق باعىت رەتىندە وڭتۇستىك-شىعىس ازيا ءوڭىرى ايقىندالدى: تاشكەنتتە وتكەن CEVF 2026 فورۋمى اياسىندا Astana Hub, IT Park Uzbekistan جانە Big Sky Capital ۆەنچۋرلىك قورى ۇشجاقتى مەموراندۋمعا قول قويىپ, ارىپتەستىكتى بەكىتتى.
بۇل كەلىسىم مالايزيادا تەحنولوگيالىق حاب اشۋدى كوزدەيدى. ول قازاقستاندىق ستارتاپتار ءۇشىن ءوڭىر نارىقتارىنا شىعۋدىڭ نەگىزگى نۇكتەسىنە اينالماق. سونىمەن قاتار, Silkway Accelerator جانە Hero Training باعدارلامالارى جەرگىلىكتى ازىرلەمەلەردى باسەكەگە قابىلەتتى ەكسپورتتىق ونىمدەرگە اينالدىرۋدى ءتيىمدى تۇردە جالعاستىرىپ كەلەدى.
قازاقستاننىڭ 150-دەن استام ۇيىمنىڭ توپ-مەنەدجەرلەرى جي بويىنشا ءبىلىم الادى
