ساراپشىلاردىڭ ايتۋىنشا, قازىرگى تاڭدا IT-ەكسپورت كولەمى يمپورتقا جۇمسالعان شىعىننان 2,6 ەسە جوعارى. بۇل قازاقستاننىڭ تسيفرلىق ەكوجۇيەسى تۇراقتى تۇردە دامىپ كەلە جاتقانىن ايعاقتايدى.
ۇلتتىق بانكتىڭ مالىمەتى بويىنشا, قازاقستاندىق IT-شەشىمدەر الەمنىڭ 110-نان استام ەلىندە قولدانىلادى. نەگىزگى ماقسات – وتاندىق يننوۆاتسيالاردى جاھاندىق تسيفرلىق نارىققا شىعارۋ جانە حالىقارالىق قوسىلعان قۇن تىزبەگىنە ينتەگراتسيالاۋ.
«Qazaq Digital Mektebi»: قالا مەن اۋىل مەكتەپتەرى اراسىنداعى الشاقتىق جويىلا ما؟
تسيفرلىق دامۋ سالاسىنداعى باستى درايۆەرلەردىڭ ءبىرى – Astana Hub. ونىڭ رەزيدەنت كومپانيالارىنىڭ ەكسپورتتىق تابىسى 633 ملن دوللارعا جەتكەن. قازىرگى تاڭدا 537 كومپانيا شەتەل نارىعىندا جۇمىس ىستەپ, ولاردىڭ گەوگرافياسى گەرمانيا, يسپانيا, نيدەرلاندى جانە ءباا ەلدەرىن قامتيدى. ەكوجۇيەدە 32,5 مىڭنان استام جۇمىس ورنى قۇرىلعان.
سونىمەن قاتار e-residency جوباسى ارقىلى 6 مىڭنان استام شەتەلدىك مامان قازاقستاننىڭ تسيفرلىق ينفراقۇرىلىمىنا قول جەتكىزگەن.
جاساندى ينتەللەكت جانە تسيفرلىق دامۋ مينيسترلىگى وكىلدەرىنىڭ ايتۋىنشا, 1 ملرد دوللارلىق مەجەگە جەتۋ – جۇيەلى مەملەكەتتىك قولداۋ مەن ەكوجۇيەلىك دامۋدىڭ ناتيجەسى.
قازاقستاننىڭ جاھاندىق تەحنولوگيالىق ىقپالى حالىقارالىق حابتار ارقىلى دا كەڭەيۋدە. پالو-التو, شانحاي جانە دۋبايدا يننوۆاتسيالىق الاڭدار جۇمىس ىستەيدى. سونىمەن قاتار وڭتۇستىك-شىعىس ازيا باعىتى دا جاڭا باسىمدىققا اينالۋدا.
