«عىلىمدى قولداۋ, عالىمدارعا ەل بولىپ قۇرمەت كورسەتۋ, بۇل – ەڭ الدىمەن قوعامدا ەڭبەكقورلىق, بىلىمپازدىق, جاسامپازدىق قۇندىلىقتارىن ورنىقتىرۋ دەگەن ءسوز. حالقىمىزدىڭ ويى وزىق بولسا, وسكەلەڭ ۇرپاقتىڭ دا عىلىم-بىلىمگە دەگەن ىقىلاسى ايرىقشا بولارى انىق. زەردەلى ءارى زياتكەر ۇرپاق تاربيەلەۋ – بارشاعا ورتاق پارىز. وعان مەملەكەت تە, اتا-انالار دا بىردەي جاۋاپتى», دەدى پرەزيدەنت.
پرەزيدەنت: ادامزاتتىڭ بارلىق جەتىستىگى – عالىمداردىڭ زياتكەرلىك ەڭبەگىنىڭ جەمىسى
وسى رەتتە ول بىلتىر «كەلەشەك» بىرىڭعاي جيناقتاۋ جۇيەسىن قۇرۋ تۋرالى ءتيىستى زاڭعا قول قويعانىن ەسكە سالدى. بۇل جۇيە ارقىلى اتا-انالار بالاسىنىڭ بولاشاقتا ساپالى ءبىلىم الۋىنا قاراجات جيناي الادى. مەملەكەت باسشىسىنىڭ ايتۋىنشا, قازىردىڭ وزىندە 200 مىڭعا جۋىق ازامات ارنايى ەسەپشوت اشقان. مۇنى بولاشاققا سالىنعان ەڭ ۇتىمدى ينۆەستيتسيا دەۋگە بولادى.
بۇدان سوڭ, ول عىلىمنىڭ الەۋەتىن ەل يگىلىگىنە جاراتۋدىڭ ماڭىزىن ايتتى.
«عالىمدارىمىز اشقان جاڭالىقتار زەرتحانالار اياسىندا قالىپ قويماۋى كەرەك. ناقتى ناتيجە بەرەتىن, وندىرىسكە ەنگىزۋگە بولاتىن جوبالاردى جۇزەگە اسىرۋ قاجەت. ءبىر سوزبەن, عىلىم ەكونوميكا مەن قوعامنىڭ سۇرانىسىنا ساي بولۋعا ءتيىس. بۇل ماقسات ۇكىمەتتىڭ ۇدايى نازارىندا بولۋى كەرەك, سەبەبى وسى مىندەتتىڭ ەلىمىز ءۇشىن ءمان-ماعىناسى ەرەكشە. سونىمەن قاتار بۇل – الەمدەگى ەڭ ۇزدىك كومپانيالاردىڭ بەرىك ۇستانىمى, بۇلجىماس قاعيداسى. جاھاندىق دەڭگەيدەگى ءىرى تەحنولوگيالىق كورپوراتسيالار ءبىرىنشى كەزەكتە ءبىلىم مەن عىلىمعا باسىمدىق بەرەدى, عىلىمي جاڭالىقتاردى وندىرىسكە جەدەل ەنگىزەدى. تالانتتاردى قىزمەتكە تارتۋ جاعىنان دا بۇل كومپانيالار كوش باستاپ تۇر. ادام كاپيتالى ولاردىڭ نەگىزگى كۇش-قۋاتى سانالادى. تەحنولوگيا مەن يننوۆاتسيا – دامۋدىڭ ەڭ باستى ءارى بالاماسىز شارتى. مۇنى ءححى عاسىردىڭ ۇزدىك كومپانيالارى دالەلدەپ وتىر», دەدى ق.توقاەۆ.
