فوتو: عىلىم جانە جوعارى ءبىلىم مينيسترلىگى
تەستىلەۋگە قاتىسۋشىلاردىڭ 75%-ى – قازاق تىلىندە, 25%-ى – ورىس تىلىندە, ال 157 تالاپكەر اعىلشىن تىلىندە تاپسىرعان. بەس ءپان بويىنشا ورتاشا بالل – 66, ال ەڭ جوعارى ناتيجە – 140 بالل.
ەڭ ۇزدىك كورسەتكىشتەردىڭ ءبىرى اتىراۋ وبلىسىنىڭ تۇلەگى كەنەسوۆا جازيراعا تيەسىلى. ول ءتورت پاننەن 90 بالل جيناپ, قازتەست سەرتيفيكاتى ارقىلى «قازاق ءتىلى» ءپانى بويىنشا ناتيجەسىن كونۆەرتاتسيالاۋ ناتيجەسىندە جالپى 140 باللعا قول جەتكىزدى.
تالاپكەرلەر تەست اياقتالعاننان كەيىن 30 مينۋت ىشىندە اپەللياتسياعا بەرۋ قۇقىعىنا يە. ال تەحنيكالىق سەبەپتەرگە بايلانىستى وتىنىشتەر تەستىلەۋ بارىسىندا قابىلدانعان. بيىل 31 مىڭنان استام اپەللياتسيالىق ءوتىنىش ءتۇسىپ, ولاردىڭ ىشىندە 17 بىرەگەي تەست تاپسىرماسى بويىنشا وتىنىشتەر قاناعاتتاندىرىلدى. قازىر رەسپۋبليكالىق كوميسسيا جۇمىسىن اياقتاپ, تالاپكەرلەردىڭ سەرتيفيكاتتارى جەكە كابينەتتەرىندە قولجەتىمدى.
پاندىك كومبيناتسيالار اراسىندا تالاپكەرلەر ەڭ كوپ تاڭداعان باعىت – «ماتەماتيكا-فيزيكا» (18,7%). ودان كەيىن «بيولوگيا-حيميا» (16,5%) جانە «شىعارماشىلىق ەمتيحان» (10,3%) كومبيناتسيالارى كوش باستاپ تۇر.
ناۋرىزداعى ۇبت: سەمەيلىك وقۋشى ەراسىل سايلاۋوۆ 140 بالل جينادى
ەرەكشە ءبىلىم بەرۋ قاجەتتىلىكتەرى بار تالاپكەرلەر ءۇشىن جاعداي جاسالىپ, 408 ادام ۇبت-عا قاتىسقان.
تەستىلەۋ بارىسىندا 264 ەرەجە بۇزۋشىلىق انىقتالدى. ونىڭ ىشىندە 130 تالاپكەر تىيىم سالىنعان زاتتاردى الىپ كىرمەك بولعانى ءۇشىن شەتتەتىلسە, تاعى 134 ادام تەست كەزىندە ءتارتىپ بۇزعانى ءۇشىن اۋديتوريادان شىعارىلىپ, ناتيجەلەرى جويىلدى. باسقا ادامنىڭ ورنىنا كىرۋ دەرەكتەرى تىركەلمەگەن.
مينيسترلىكتىڭ مالىمەتىنشە, 31 قازانعا دەيىن بەينەجازبالارعا تالداۋ جۇرگىزىلەدى. ەگەر قوسىمشا ەرەجە بۇزۋشىلىقتار انىقتالسا, تالاپكەرلەردىڭ ۇبت ناتيجەلەرى جويىلادى.
