الەمدىك تاجىريبە ەسكەرىلگەن
ۆيتسە-پرەمەر قانات بوزىمباەۆ ۇكىمەت الاتاۋ قالاسىنىڭ ارناۋلى مارتەبەسى تۋرالى كونستيتۋتسيالىق زاڭ جوباسىن مەملەكەت باسشىسىنىڭ 2025 جىلعى جولداۋىنا جانە الاتاۋ قالاسىن دامىتۋ تۋرالى جارلىعىنا سايكەس ازىرلەگەنىن ايتتى. سونداي-اق بۇل زاڭ جوباسى مەملەكەت باسشىسى ايقىنداعان تاسىلدەر مەن قاعيداتتارعا نەگىزدەلگەنىن, ونىڭ نەگىزگى ماقساتى الاتاۋ قالاسىنىڭ جەدەل جانە تۇراقتى دامۋىنا جاعداي جاساۋ ەكەنىن اتاپ ءوتتى.
قانات الدابەرگەن ۇلىنىڭ ايتۋىنشا, جاقىندا قابىلدانعان كونستيتۋتسيادا جەكەلەگەن وڭىرلەردىڭ ەكونوميكاسىن جىلدامداتۋ ءۇشىن «قارقىندى داميتىن قالا» ارناۋلى قۇقىقتىق رەجىمىن كونستيتۋتسيالىق زاڭ ارقىلى ەنگىزۋگە بولاتىنى كورسەتىلگەن. وسىعان سايكەس, مەملەكەت الاتاۋ جوباسىن دەربەس ەكوجۇيە رەتىندە قاراستىرىپ وتىر.
قانات بوزىمباەۆ زاڭ جوباسىن ازىرلەۋگە جەتەكشى حالىقارالىق ساراپشىلار تارتىلعانىن ايتتى. ولار ارنايى اكىمشىلىك جانە ەكونوميكالىق ايماقتار ارقىلى قالالاردى دامىتۋ بويىنشا الەمدىك تاجىريبەنى زەرتتەپ شىققان.
«اتاپ ايتقاندا, شەنچجەن, حاينان (قىتاي), سەدجون مەن سونگدو (وڭتۇستىك كورەيا), سونداي-اق سينگاپۋر, دۋباي جانە دوحا سياقتى قالالاردىڭ تاجىريبەسى قاراستىرىلدى. حالىقارالىق تاجىريبە كورسەتكەندەي, قالاعا تەك ارنايى مارتەبە بەرۋ جەتكىلىكسىز. نەگىزگى ءرولدى ءتيىمدى ينستيتۋتسيونالدىق ورتا اتقارادى. مىسالى, شەنچجەن مەن حاينان تاجىريبەسى – بۇل وڭىرلەردە جەرگىلىكتى اكىمشىلىكتەرگە كەڭ وكىلەتتىكتەر بەرىلگەن. ولار سالىق رەجىمدەرىن بەكىتە الادى, جەڭىلدىكتەردى اكىمشىلەندىرەدى جانە ينۆەستيتسيالىق قولداۋدى باسقارادى. ناتيجەسىندە شەشىمدەر جەدەل قابىلدانادى, ورتالىق ورگاندارمەن فۋنكتسيالارى قايتالانبايدى. حاينان پروۆينتسياسى ودان دا كەڭ ەكونوميكالىق وكىلەتتىكتەر الدى. وسى جىلدان باستاپ حاينان جاڭا ساۋدا جانە ينۆەستيتسيالىق حاب رەتىندە جاريالاندى», دەدى ۇكىمەت باسشىسىنىڭ ورىنباسارى.
وسىلاردى ەسكەرە وتىرىپ, ۇكىمەت الاتاۋ قالاسىندا دا اكىمشىلىك سالىق رەجىمدەرىن بەكىتۋ, جەڭىلدىكتەردى جانە ينۆەستيتسيالىق قولداۋداعى دەربەستىكتى ەنگىزۋدى ۇسىنىپ وتىر.
سونداي-اق ۇكىمەت الاتاۋ قالاسىن دامىتۋعا قاتىستى زاڭ جوباسىن ازىرلەۋدە الەمدىك بيزنەس پەن ءتۋريزمنىڭ قايناعان وشاعىنا اينالعان دۋباي قالاسىنىڭ دا تاجىريبەسىن سىرت اينالماپتى. سەبەبى دۋبايدىڭ ارنايى ەكونوميكالىق ايماعىنىڭ تاجىريبەسى ءبىر ورتالىقتان مەملەكەتتىك قىزمەتتەردى, باقىلاۋدى جانە اكىمشىلەندىرۋدى جۇزەگە اسىرۋعا مۇمكىندىك بەرەدى. بۇل تەتىك بيزنەس-ليتسەنزيالاردى بەرۋدى دە قامتيدى.
ال سينگاپۋر تاجىريبەسى ۇزاقمەرزىمدى 50 جىلعا دەيىنگى ستراتەگيالىق قۇجاتتاردىڭ ماڭىزدىلىعىن كورسەتىپ وتىر. سوندىقتان ق.بوزىمباەۆ الاتاۋ قالاسىنىڭ دا ستراتەگيالىق قۇجاتتارى ۇزاق كەزەڭگە ارناپ قابىلدانۋعا ءتيىس ەكەنىنە نازار اۋداردى. ونىڭ ايتۋىنشا, مۇنداي قۇجاتتارعا كەمىندە 5–10 جىل وزگەرىس ەنگىزىلمەۋى قاجەت.
قۇقىقتىق مارتەبەنىڭ قاجەتتىلىگى
بايانداماشى وڭ تاجىريبەگە عانا ەمەس, سونىمەن بىرگە ءساتسىز مىسالدارعا دا تالداۋ جاسادى.
«كەيىنگى 10 جىلدا الەمدە ينۆەستيتسيالار, يننوۆاتسيالار جانە تەحنولوگيالاردى تارتۋ ءۇشىن مىڭنان استام ارنايى اكىمشىلىك جانە ەكونوميكالىق ايماق قۇرۋ جاريالاندى. بۇل قالالار نەمەسە ايماقتار اراسىنداعى باسەكەلەستىك كۇن سايىن ارتىپ كەلە جاتقانىن كورسەتەدى. الايدا قۇرىلعان ايماقتاردىڭ شامامەن 60%-ى ءساتسىز اياقتالدى», دەدى ۆيتسە-پرەمەر.
ماسەلەن, تاياۋ شىعىس پەن ازياداعى جوبالاردىڭ ءساتسىز جۇزەگە اسىرىلۋىنا قۇقىقتىق جانە سالىقتىق دەربەستىكتىڭ بولماۋى, باسقارۋداعى بيۋروكراتيا, ينفراقۇرىلىمدى دامىتۋعا قارجىنىڭ جەتىسپەۋشىلىگى, تاۋەلسىز سوت جۇيەسىنىڭ السىزدىگى, قۇزىرەتتى ورگانداردىڭ جاريالانعان سالىق جەڭىلدىكتەرىنەن قايتا باس تارتۋى جانە جەر ۋچاسكەلەرىن ينۆەستورلار مۇددەسىنە ادىلەتسىز الىپ قويۋ ماسەلەلەرى نەگىز بولعان.
ق.بوزىمباەۆ وسىنداي سەبەپتەردى نازاردان تىس قالدىرساق, ينۆەستورلاردىڭ الاتاۋدىڭ ماڭىنا جولاماۋ قاۋپى بار ەكەنىن جەتكىزىپ, زاڭ جوباسىن دايىنداۋ كەزىندە اتالعان تاجىريبەلەر مەن قورىتىندىلاردى تولىق ەسكەرۋ وتە ماڭىزدى ەكەنىنە توقتالدى. سەبەبى بۇگىندە الاتاۋ قۇرىلعاننان باستاپ ينۆەستورلار قالانىڭ الەۋەتىنە ۇلكەن قىزىعۋشىلىق تانىتىپ وتىر ەكەن.
«قازىردىڭ وزىندە جالپى قۇنى 1,8 ترلن تەڭگەنى قۇرايتىن العاشقى 44 ينۆەستيتسيالىق جوبا قالىپتاستىرىلىپ جانە 30 مىڭعا جۋىق جاڭا جۇمىس ورنىن اشۋعا مۇمكىندىك بەرەدى. بۇل قالانى عىلىم, تۋريزم, مەديتسينا جانە يننوۆاتسيالار ورتالىعى رەتىندە دامىتۋدىڭ نەگىزىن قالايدى. ولاردىڭ قاتارىنا ءىرى الەمدىك تانىمال كومپانيالار «Mars», «PepsiCo», «Hyundai Green Food», «Envision Energy», «Khan Tengri Biopharma» جانە ەكى يندۋستريالىق-لوگيستيكالىق حاب, سونداي-اق «ASP اrena, «ك-Park» سياقتى تۋريستىك جوبالار كىرەدى», دەدى قانات الدابەرگەن ۇلى جالپى وتىرىستا.
سونىمەن بىرگە زاماناۋي «Iconic Complex» كوپفۋنكتسيونالدى كلاستەرى, كوشباسشى KAIST كورەيانىڭ جوعارى تەحنولوگيالىق ۋنيۆەرسيتەتى جانە پيلوتسىز ۇشۋ اپپاراتتارىن ەنگىزۋ بويىنشا ستراتەگيالىق جوبالار ىسكە اسىرىلماق.
ۆيتسە-پرەمەر قالانى ينفراقۇرىلىممەن قامتۋدى كەزەڭ-كەزەڭمەن ىسكە اسىرۋ ءۇشىن 2030 جىلعا دەيىنگى جوسپار بەكىتىلگەنىن اتاپ ءوتتى. العا قويعان ماقساتتار ىسكە اسقان جاعدايدا, حالىقارالىق ساراپشىلاردىڭ بولجامى بويىنشا 2050 جىلعا قاراي قالانىڭ وڭىرلىك جالپى ءونىمى 50 ملرد دوللارعا دەيىن جەتەدى دەپ كۇتىلىپ وتىر.
بايانداما بارىسىندا زاڭ جوباسىنىڭ نەگىزگى باعىتتارىنا توقتالعان ۇكىمەت باسشىسىنىڭ ورىنباسارى ق.بوزىمباەۆ پرەزيدەنتتىڭ بۇل قالاعا ەرەكشە قۇقىقتىق مارتەبە بەرۋى ارتىقشىلىق ەمەس, قاجەتتى قۇرال ەكەنىن اتاپ وتكەنىنە ءمان بەردى. ۇسىنىلىپ وتىرعان زاڭ جوباسى وسى قاعيداتقا نەگىزدەلىپ وتىر.
«كونستيتۋتسيالىق زاڭ نەگىزىندە الاتاۋدا ارنايى قۇقىقتىق رەجىم قالىپتاسادى. ول كاسىپكەرلىك قىزمەتتىڭ نەگىزگى باعىتتارىن قامتيدى. ناتيجەسىندە الاتاۋ جاڭا باسقارۋ جانە تەحنولوگيالىق شەشىمدەردى ەنگىزۋگە مۇمكىندىك بەرەتىن زاماناۋي رەتتەۋشى الاڭعا اينالادى», دەگەن ق.بوزىمباەۆ الاتاۋدا سىناقتان وتكەن ءتيىمدى تەتىكتەر الداعى ۋاقىتتا ەلىمىزدىڭ وزگە وڭىرلەرىندە دە تارالۋى مۇمكىن ەكەنىن اتاپ ءوتتى.
جەدەل وركەندەۋدىڭ جەتى باعىتى
بايانداماشىنىڭ ايتۋىنشا, الاتاۋ قالاسىندا سالىقتىق جەڭىلدىكتەر عانا ەمەس, سونىمەن بىرگە بيزنەستى رەتتەۋ, ينۆەستورلاردى تارتۋ جانە ينۆەستيتسيالىق داۋلاردى شەشۋ جۇيەسىن قامتيتىن تولىق ەكوجۇيە قالىپتاستىرۋ جوسپارلانىپ وتىر.
اتاپ ايتساق, بىرىنشىدەن, Alatau City Authority ستراتەگيالىق دامۋعا نەگىزدەلگەن جاڭا مەملەكەتتىك ورگان رەتىندە قۇرىلادى. ونىڭ نەگىزگى باعىتىن پرەمەر-مينيستر باسقاراتىن كەڭەس ايقىندايدى. ال اكىمشىلىك جۇمىستى باس اتقارۋشى ديرەكتور جۇزەگە اسىرادى. كەڭەس قالاداعى نەگىزگى ستراتەگيالىق شەشىمدەردى قابىلدايدى جانە اكىمشىلىك اكتىلەردى بەكىتەدى. ال ءماسليحات پەن اكىمدىك قالانىڭ الەۋمەتتىك, كوممۋنالدىق جانە قوعامدىق ماسەلەلەرىنە جاۋاپ بەرەدى.
ەكىنشىدەن, زاڭ جوباسىندا ينۆەستيتسيالىق كەلىسىمدەردىڭ تۇراقتىلىعى, ارنايى قۇقىقتىق رەجىمنىڭ باسىمدىعى جانە ليتسەنزيالاۋدىڭ جەكە ءتارتىبى قاراستىرىلعان. سونداي-اق ء«بىر تەرەزە» قاعيداتى ارقىلى تاۋەلسىز رەتتەۋ جۇيەسى ەنگىزىلەدى. ينۆەستورلاردىڭ قۇقىعى حالىقارالىق دەڭگەيدە قورعالادى.
ۇشىنشىدەن, سالىقتىق پرەفەرەنتسيالار باسىم سالالارداعى جاڭا ينۆەستيتسيالىق جوبالارعا عانا بەرىلەدى.
تورتىنشىدەن, Alatau City Authority رەسپۋبليكالىق بيۋدجەتتىك باعدارلامالاردىڭ دەربەس اكىمشىسى بولادى. ونىڭ بيۋدجەتى رەسپۋبليكالىق بيۋدجەت قۇرامىندا بلوكتىق بيۋدجەتتەۋ قاعيداتى بويىنشا قالىپتاسىپ, نەگىزىنەن ينفراقۇرىلىمدى دامىتۋعا جانە ۇزاقمەرزىمدى جوبالاردى قولداۋعا باعىتتالادى. ءوز كەزەگىندە جوبالاردى ىرىكتەۋ مەن قارجىلاندىرۋ ءتارتىبىن كەڭەس بەكىتەتىن بولادى.
بەسىنشىدەن, قالانىڭ ۇزاقمەرزىمدى ينۆەستيتسيالىق دامۋى ستراتەگيالىق قۇجاتتارعا نەگىزدەلەدى, ولار – 30 جىلعا ارنالعان ۇزاقمەرزىمدى دامۋ جوسپارى جانە 15 جىلدىق ستراتەگيا مەن ماستەر-جوسپار. ينۆەستورلار ءۇشىن تۇراقتىلىقتى ساقتاۋ ماقساتىندا اتالعان قۇجاتتارعا وزگەرىستەر تيىسىنشە 10 جانە 5 جىل ىشىندە ءبىر رەتتەن ءجيى ەنگىزىلمەيدى.
التىنشىدان, جەر قاتىناستارى ارنايى رەجىم ارقىلى رەتتەلەدى. قالانىڭ جەر قورى قالىپتاستىرىلادى. بۇل ستراتەگيالىق جانە ينۆەستيتسيالىق جوبالاردى ىسكە اسىرۋدىڭ نەگىزگى قۇرالى جانە دامۋ مەن ەكونوميكالىق ءوسۋدىڭ رەسۋرسى رەتىندە قاراستىرىلادى.
جەتىنشىدەن, قالا باستاپقىدا «Digital by default» قاعيداتىنا نەگىزدەلىپ قۇرىلادى. ياعني بارلىق نەگىزگى قىزمەت تسيفرلىق فورماتتا جۇمىس ىستەيدى. قالادا يننوۆاتسيالىق تەحنولوگيالاردى ەنگىزۋ ءۇشىن ەكسپەريمەنتالدى قۇقىقتىق رەجىمدەر قاراستىرىلادى. بۇل بايلانىس, تسيفرلىق جەلىلەر, جاساندى ينتەللەكت, روبوتتىق جۇيەلەر جانە اۆتونومدى كولىك سياقتى سالالاردى قامتيدى.
«ۇسىنىلىپ وتىرعان كونستيتۋتسيالىق زاڭ جوباسى الاتاۋ قالاسىندا حالىقارالىق دەڭگەيدە باسەكەگە قابىلەتتى يۋريسديكتسيا قالىپتاستىرۋعا باعىتتالعان. اتالعان تاسىلدەر ەكونوميكالىق ءوسىمدى جەدەلدەتۋگە, تەحنولوگيالىق دامۋدى كۇشەيتۋگە جانە جاڭا كاپيتال تارتۋعا مۇمكىندىك بەرەدى», دەدى ق.بوزىمباەۆ.
ينۆەستيتسيالىق كەزەڭنىڭ نەگىزگى باعىتى
سەنات دەپۋتاتى سەرىك شايداروۆ زاڭ جوباسىن تالقىلاۋ بارىسىندا جوبانى ىسكە اسىرۋعا دۇرىس كوزقاراسپەن قاراعان كەزدە Alatau City بۇكىل ءوڭىردىڭ ەكونوميكاسىن قايتا جانداندىرۋعا قابىلەتتى قۋاتتى حاب بولا الاتىنىن اتاپ ءوتتى. دەگەنمەن, بارلىق ەرەكشەلىكتى ەسكەرىپ, حالىقارالىق تاجىريبەنى مۇقيات زەردەلەۋ مەن ودان ساباق الۋ اسا ماڭىزدى.
«مەملەكەت باسشىسى ۇكىمەتتىڭ كەڭەيتىلگەن وتىرىسىندا الاتاۋ قالاسى جاڭا ينۆەستيتسيالىق كەزەڭنىڭ نەگىزگى جوباسى بولۋعا ءتيىس, بۇل كاپيتالدى تارتۋ ءۇشىن تەڭدەسى جوق جاعدايلار جاساۋدى, پروگرەسسيۆتى رەتتەۋشى رەجىم ورناتۋدى, وزىق يننوۆاتسيالىق شەشىمدەردى ەنگىزۋدى, ءومىردىڭ بارلىق سالاسىندا جاساندى ينتەللەكت پەن تسيفرلىق تەحنولوگيالاردى پايدالانۋدى بىلدىرەدى دەپ اتاپ ءوتتى. وسىعان بايلانىستى جوبانى جۇيەلى ءارى ءتيىمدى ىسكە اسىرۋعا كەدەرگى كەلتىرۋى مۇمكىن بارلىق فاكتوردى ەسكەرۋ قاجەت. بۇل اسا ماڭىزدى مىندەت», دەدى ول.
سەناتور وسىعان بايلانىستى جەر قاتىناستارى سالاسىنداعى پروبلەمالارعا, ونىڭ ىشىندە زاڭسىز قۇرىلىس سالۋ مەن جەر ۋچاسكەلەرىن ءوز بەتىنشە باسىپ الۋعا, جەر ۋچاسكەلەرىن بەرۋدە بىركەلكى بولۋدى تالاپ ەتەتىن اياقتالماعان راسىمدەرگە ەرەكشە نازار اۋداردى.
«جالپى, الاتاۋدى دامىتۋ نەگىزىنەن جەكە ينۆەستيتسيا ەسەبىنەن جۇزەگە اسىرىلادى. بيۋدجەتتىك ينۆەستيتسيالار مەن كۆازيمەملەكەتتىك سەكتوردىڭ ينۆەستيتسيالارى مەملەكەتكە نەمەسە كۆازيمەملەكەتتىك ۇيىمدارعا تيەسىلى كولىك, كوممۋنالدىق, ەنەرگەتيكا جانە الەۋمەتتىك ينفراقۇرىلىمدى دامىتۋ ماقساتىندا عانا باعىتتالۋعا ءتيىس. وسىعان بايلانىستى قالانى باسقارۋ ورگاندارى, اكىمشىلىك پەن اكىمدىكتىڭ الدىندا بيۋدجەت قاراجاتى مەن تارتىلعان ينۆەستيتسيانى ءتيىمدى پايدالانۋ بويىنشا ءبىرىنشى كەزەكتەگى مىندەت تۇر», دەدى س.شايداروۆ.
قابىلدانعان قادامدار يننوۆاتسياعا باعدارلانعان ۇلتتىق ەكونوميكانىڭ ورنىقتى ءوسۋىن ىنتالاندىرۋعا, جوعارى تەحنولوگيالىق سالالارعا ينۆەستيتسيا تارتۋعا جانە الماتى اگلومەراتسياسىنىڭ جيناقتالعان الەۋەتى نەگىزىندە ىسكەرلىك جانە يننوۆاتسيالىق بەلسەندى حالىقارالىق ماڭىزى بار وڭىرلىك ورتالىعىن قالىپتاستىرۋعا باعىتتالعان.
جوبا – ەلىمىزدىڭ كەلەشەك كەسكىن-كەلبەتى
وتىرىستا ءماجىلىس دەپۋتاتى نۇرتاي سابيليانوۆ «الاتاۋ قالاسىنىڭ ارناۋلى مارتەبەسى تۋرالى» كونستيتۋتسيالىق زاڭ جوباسى شاھاردىڭ تۇراقتى ءوسۋى مەن دامۋى ءۇشىن جەتىلدىرىلگەن قۇقىقتىق, ۇيىمداستىرۋشىلىق, ەكونوميكالىق جاعدايلار جاساۋ ماقساتىندا ازىرلەنگەنىن اتاپ ءوتتى. رەسپۋبليكالىق رەفەرەندۋمدا قابىلدانعان جاڭا كونستيتۋتسيادا «قارقىندى داميتىن قالا» ارناۋلى قۇقىقتىق رەجىمى» بەكىتىلگەنىن, بۇل ينۆەستورلارعا قولايلى جاعداي جاسايتىنىن ناقتىلادى.
«وسىعان بايلانىستى, بىرىنشىدەن, قارالىپ جاتقان كونستيتۋتسيالىق زاڭ جوباسىنا سايكەس الاتاۋ قالاسىنا ارناۋلى مارتەبە بەرۋ – ونىڭ قارقىندى ەكونوميكالىق دامۋى ءۇشىن جاڭا ءتاسىل. بۇل تسيفرلاندىرۋعا, تىكەلەي ينۆەستيتسيا تارتۋعا, يننوۆاتسيالاردى ەنگىزۋگە جانە زاماناۋي قالالىق ورتا قالىپتاستىرۋعا باعىتتالعان «اقىلدى قالا» بولماق. ەكىنشىدەن, زاڭ جوباسى قالانى باسقارۋدىڭ ءتيىمدى جۇيەسىن قالىپتاستىرۋدى كوزدەيدى», دەدى ن.سابيليانوۆ.
ءماجىلىس دەپۋتاتى سنەجاننا يماشەۆا تالقىلانىپ وتىرعان زاڭ جوباسى جاي عانا قۇجات ەمەس, ەلىمىزدىڭ كەلەشەك كەسكىن-كەلبەتى ەكەنىن ايتتى. جاڭا كونستيتۋتسيامىز ارناۋلى قۇقىقتىق رەجىمدەردى ەكونوميكا درايۆەرى رەتىندە پايدالانۋ ءۇشىن ىرگەتاس قالاعانىن, الاتاۋ قالاسى وسى ستراتەگيانى ىسكە اسىرۋ جولىنداعى العاشقى كولەمدى قادام ەكەنىن اتاپ ءوتتى.
«مەن الاتاۋدى ۇلكەن بولاشاق كۇتىپ تۇرعانىنا سەنەمىن. نەگە؟ ويتكەنى جوباعا مەملەكەت تاراپىنان كورسەتىلىپ جاتقان قولداۋدىڭ اۋقىمى وراسان. قالانىڭ ايرىقشا مارتەبەسى بەلگىلەندى, ونىڭ قىزمەتى ۇكىمەت تاراپىنان تىكەلەي قاداعالانادى جانە كەپىلدەندىرىلگەن باسىم قارجىلاندىرۋ كوزدەلگەن. جالپى ينۆەستيتسيالىق الەۋەتى 2050 جىلعا دەيىن 10 تريلليون تەڭگە دەپ باعالانىپ وتىر, ونىڭ ىشىندە العاشقى تريلليون تەڭگەنىڭ جوبالارى بەلسەندى كەزەڭدە يگەرىلىپ جاتىر», دەدى دەپۋتات.
وتىرىس بارىسىندا سەناتورلار بەكبول ورىنباساروۆ, الىبەك ناۋتيەۆ جانە باسقالار ءسوز سويلەدى.
ايتا كەتەيىك, پارلامەنت پالاتالارىنىڭ بىرلەسكەن وتىرىسىندا ەكىنشى وقىلىمدى وتكىزۋ 27 ناۋرىزعا جوسپارلانعان. زاڭ جوباسىن ناۋرىز ايىنىڭ سوڭىنا دەيىن مەملەكەت باسشىسىنىڭ قاراۋىنا ەنگىزۋ كوزدەلىپ وتىر.
جاسۇلان سەيىلحان,
ەسكەندىر زۇلقارناي,
«Egemen Qazaqstan»
