«Digital Nauryz» باستاماسىنىڭ تاعى ءبىر ەرەكشەلىگى – ۇلتتىق قۇندىلىقتاردى جاھاندىق اۋديتورياعا تانىتۋ مۇمكىندىگى. شەتەلدەگى قانداستار مەن وزگە ۇلت وكىلدەرى دە قازاقتىڭ سالت-داستۇرىمەن ونلاين تانىسىپ, مەرەكەلىك ءىس-شارالارعا قاتىسا الادى. وسىلايشا, تسيفرلىق شەشىمدەر ارقىلى ناۋرىزدىڭ مازمۇنى تەرەڭدەپ, اۋقىمى كەڭەيە ءتۇستى. بۇل – تەحنولوگيالىق جاڭاشىلدىق قانا ەمەس, ۇلتتىق مادەنيەتتى جاڭا دەڭگەيگە كوتەرۋدىڭ ءبىر جولى.
«Digital Nauryz» پلاتفورماسى مەملەكەتتىك «GOV.KZ» پورتالى نەگىزىندە ىسكە قوسىلىپ, مەرەكەنىڭ ءىس-شاراسىن ءبىر جەرگە شوعىرلاندىردى. ياعني ەلىمىزدىڭ ءار وڭىرىندەگى كونتسەرت, كورمە, كەزدەسۋلەر مەن فورۋمدار ءبىر تسيفرلىق كەڭىستىكتە ۇسىنىلىپ, تىكەلەي ەفيردە كورسەتىلەدى. بۇل – ناۋرىزدى العاش رەت تولىققاندى ونلاين فورماتتا تاماشالاۋعا مۇمكىندىك بەرگەن جوبا.
پلاتفورمانىڭ باستى ارتىقشىلىعى – وڭىرلىك قامتۋ. سايتتا ەلىمىزدىڭ بارلىق وبلىسى بويىنشا جەكە بولىمدەر قاراستىرىلعان. سونىڭ ارقاسىندا پايدالانۋشى ءوزى قالاعان قالاداعى ءىس-شارالاردى كورىپ, ۋاقىتىن جوسپارلاي الادى. سونىمەن قاتار جاڭالىقتار, انونس-تار مەن بەينەترانسلياتسيالار ءبىر جۇيەگە بىرىكتىرىلگەن. جاساندى ينتەللەكت نەگىزىندەگى اۆتوماتتى اۋدارما فۋنكتسياسى دا ەنگىزىلىپ, كونتەنتتى كەڭ اۋديتورياعا قولجەتىمدى ەتتى.
«Digital Nauryz» تەك ونلاين پلاتفورما دەڭگەيىندە قالىپ قويعان جوق. ول ەل اۋماعىنداعى IT-حابتاردى قامتىعان ۇلكەن تەحنولوگيالىق قوزعالىسقا اينالدى. حاكاتوندار, ينتەراكتيۆ كورمەلەر مەن ستارتاپ تانىس-تىرۋلار ناۋرىز مەرەكەسىنە جاڭاشا مازمۇن بەردى.
ماسەلەن, اقتاۋدا وتكەن كەزدەسۋدە قاتىسۋشىلار جاساندى ينتەللەكت كومەگىمەن ءماتىن مەن ۆيزۋالدى كونتەنت جاساۋدى ۇيرەنسە, اتىراۋدا ۇيىمداستىرىلعان «Digital Caspian»: «GenAI Cup» بايقاۋىندا وڭىرلىك ەرەكشەلىكتەردى ەسكەرگەن جي جوبالار ۇسىنىلدى. بۇل – تەحنولوگيانىڭ تەك قۇرال ەمەس, شىعارماشىلىق ورتاعا اينالىپ كەلە جاتقانىن كورسەتەدى.
پاۆلودار مەن قىزىلوردادا وتكەن «AI Bootcamp» باعدارلاماسى تاجىريبەلىك باعىتقا باسىمدىق بەردى. قاتىسۋشىلار ديزاين, ۆيزۋالدى ستوريتەللينگ جانە تسيفرلىق ءونىم جاساۋدى مەڭگەردى. ال قاراعاندىنىڭ ورتالىق ساياباعىندا دروندار تۇرعىندارعا باۋىرساق تاراتىپ, كوپشىلىكتى تاڭعالدىردى. سول سەكىلدى جەزقازعاندا وتكەن ۆوركشوپ ۇلتتىق مادەنيەتتى نەيروجەلىلەر ارقىلى جاڭاشا بەينەلەۋ جولدارىن قاراستىردى.
«Digital Nauryz» كاسىپكەرلىككە دە تىڭ سەرپىن بەردى. اقتوبەدەگى «Baursaq Pitch» الاڭىندا ستارتاپتار ءوز جوبالارىن ۇسىنىپ, تەحنولوگيا مەن ۇلتتىق قۇندىلىقتاردى ۇيلەستىرۋدىڭ جاڭا ۇلگىلەرىن كورسەتتى. پەتروپاۆلدا مەكتەپ وقۋشىلارى ستارتاپ جوبالارىن قورعاپ, جاس بۋىننىڭ يننوۆاتسياعا قىزىعۋشىلىعى ارتىپ كەلە جاتقانىن دالەلدەدى.
شىعارماشىلىق باعىت تا نازاردان تىس قالعان جوق. تالدىقورعاندا روبوتتەحنيكا مەن VR جوبالارى ۇسىنىلعان كورمە ۇيىمداستىرىلسا, شىمكەنت پەن سەمەيدە جاساندى ينتەللەكت كومەگىمەن 3D مودەلدەر جاساۋ جانە تسيفرلىق ونەر بويىنشا شەبەرلىك ساباقتارى ءوتتى. ال تاراز بەن تۇركىستاندا تەحنولوگيا مەن ءداستۇردىڭ بولاشاعىنا قاتىستى پىكىرتالاس ءوربىدى.
بۇل باستامانىڭ اۋقىمدىلىعى ونىڭ ۇيىمداستىرۋ دەڭگەيىنەن دە بايقالادى. بارلىق ءىس-شارا «Astana Hub» ەكوجۇيەسىنە كىرەتىن ايماقتىق IT-حابتار بازاسىندا ءوتىپ جاتىر. بۇگىندە بۇل ورتالىقتار تەك ءبىلىم الاڭى عانا ەمەس, ستارتاپتار مەن يننوۆاتسيالىق جوبالاردىڭ ءوسىپ-وركەندەيتىن ورتاسىنا اينالىپ وتىر.
