فوتو: سۋ رەسۋرستارى جانە يرريگاتسيا مينيسترلىگى
سۋ رەسۋرستارى جانە يرريگاتسيا مينيسترلىگى 2027 جىلعا دەيىن اقمولا, باتىس قازاقستان, قوستاناي, جەتىسۋ جانە ۇلىتاۋ وبلىستارىندا جەراستى سۋىن ىزدەستىرۋ-بارلاۋ جۇمىستارىن جۇرگىزۋدى جوسپارلاپ وتىر. اتالعان باستاما جەراستى سۋ قورىنىڭ رەسۋرستىق الەۋەتىن كەڭەيتىپ, ەكونوميكانىڭ ءتۇرلى سالالارىن تۇراقتى سۋمەن قامتاماسىز ەتۋگە مۇمكىندىك بەرەدى.
سونىمەن قاتار 2026 جىلى جەراستى سۋ كەن ورىندارىن بارلاۋعا ارنالعان 28 جاڭا جوبا ازىرلەۋ كوزدەلگەن. ونىڭ ىشىندە جامبىل وبلىسىندا – 9 جوبا, اقمولا وبلىسىندا – 3 جوبا, باتىس قازاقستان جانە تۇركىستان وبلىستارىندا – 4 جوبادان, ماڭعىستاۋ مەن اتىراۋ وبلىستارىندا – 2 جوبادان ىسكە اسىرىلادى. بۇدان بولەك, شىعىس قازاقستان, پاۆلودار, قىزىلوردا, ۇلىتاۋ وبلىستارىندا 1 جوبادان جۇزەگە اسپاق.
GIZ قازاقستاننىڭ سۋ رەسۋرستارى جانە يرريگاتسيا مينيسترلىگىنە 240 جاڭا تەحنيكا بەرەدى
قازىرگى تاڭدا قازاقستان اۋماعىندا اۋىزسۋ, وندىرىستىك جانە اۋىل شارۋاشىلىعى قاجەتتىلىكتەرىنە ارنالعان 4 803 جەراستى سۋ كەن ورنى بارلانعان. مەملەكەتتىك بالانس دەرەكتەرىنە سايكەس, جەراستى سۋىنىڭ تاۋلىكتىك پايدالانۋعا بولاتىن قورى 43,2 ملن تەكشە مەتردى قۇرايدى. الايدا سونىڭ نەبارى 1,5 ملن تەكشە مەترى عانا پايدالانىلىپ وتىر, بۇل جالپى كولەمنىڭ 3,6%-ى.
بارلانعان قور قۇرىلىمىندا 21,2 ملن تەكشە مەتر اۋىزسۋ مەن تۇرمىستىق قاجەتتىلىككە, 2,4 ملن تەكشە مەتر وندىرىستىك-تەحنيكالىق ماقساتتارعا, ال 19,6 ملن تەكشە مەتر سۋارمالى ەگىنشىلىككە باعىتتالعان.
«سۋ تاپشىلىعى كۇشەيىپ, كليماتتىق وزگەرىستەر ۇدەگەن تۇستا جەراستى سۋىنىڭ الەۋەتىن دامىتۋ – نەگىزگى ستراتەگيالىق باعىتتاردىڭ ءبىرى. قازىرگى تاڭدا ونىڭ ەداۋىر بولىگى تولىق زەرتتەلمەگەن», دەدى سۋ رەسۋرستارى جانە يرريگاتسيا ۆيتسە-ءمينيسترى تالعات مومىشەۆ.
وسىعان بايلانىستى مينيسترلىك جەراستى سۋىن كەشەندى پايدالانۋ تۇجىرىمداماسىن ازىرلەۋدى باستاعان. قۇجات جەراستى سۋ رەسۋرستارىن باسقارۋدىڭ زاماناۋي جۇيەسىن قالىپتاستىرۋعا باعىتتالعان.
