پرەزيدەنتتىڭ ايتۋىنشا, ادام كاپيتالىنىڭ ساپاسىن ارتتىرۋ ءۇشىن قولدان كەلگەننىڭ ءبارىن جاساۋ قاجەت.
«ەلىمىزدىڭ عىلىمي جانە اكادەميالىق قاۋىمداستىعىنىڭ بارلىق وكىلىنە قاراتا ايتقىم كەلەدى. قازاقستاننىڭ ەرتەڭى قانداي بولادى, قانشالىقتى جاڭاشىل ءارى وزىق ەلگە اينالا الامىز؟ بۇل سىزدەردىڭ يدەيالارىڭىزعا, زەرتتەۋلەرىڭىزگە, جۇمىستارىڭىزدىڭ ناتيجەسىنە, اشقان جاڭالىقتارىڭىزعا تىكەلەي بايلانىستى. بارشامىز كۇش جۇمىلدىرا وتىرىپ, قازاقستاندى ەۋرازياداعى جەتەكشى عىلىمي جانە تەحنولوگيالىق ورتالىققا اينالدىرا الاتىنىمىزعا سەنەمىن», دەدى مەملەكەت باسشىسى.
سونىمەن قاتار قاسىم-جومارت توقاەۆ قول جەتكىزگەن ناتيجەگە توقمەيىلسىپ, كورسەتكىشتەرمەن ماقتانباۋىمىز كەرەك. كەرىسىنشە, جاڭا ماقساتتارعا جەتۋ ءۇشىن تىنىمسىز ەڭبەك ەتۋىمىز قاجەت.
«الەمدىك باسەكە كۇشەيگەن كەزەڭدە ءبىز ءاردايىم جەڭىمپاز بولۋىمىز كەرەك. قازاق حالقى قانداي جاعداي بولسا دا, وركەنيەت كوشىنەن قالماۋعا ءتيىس. تاريحىمىزدا قيلى قاسىرەتتى باستان وتكەردىك. وسى باق-قۋاتتى ومىرگە جەتۋ ءۇشىن تالاي زوبالاڭدى كوردىك. وركەنيەت بىزگە وزدىگىنەن كەلمەيدى. ونى وزدەرىڭىز دە تۇسىنەتىن شىعارسىزدار. وعان قول جەتكىزۋ ءۇشىن قوعام جۇدىرىقتاي جۇمىلىپ, كۇش بىرىكتىرۋى قاجەت. عالىمدار, تەحنولوگتار, كاسىپكەرلەر, ءبىلىمدى ازاماتتار, ءتىپتى, ستۋدەنتتەر دە ورتاق ىسكە اتسالىسقانى ءجون», دەدى پرەزيدەنت.
ايتا كەتەيىك, پرەزيدەنت عىلىمي قاۋىم الدىندا سويلەگەن سوزىندە بۇگىندە ءتۇرلى مەملەكەتتەر اراسىندا تەحنولوگياسى وزىق ەل بولۋ ءۇشىن قارقىندى كۇرەس ءجۇرىپ جاتقانىن اتاپ ءوتتى.
