ورتالىق رەفەرەندۋم كوميسسياسىنىڭ توراعاسى نۇرلان ءابدىروۆ 16 ناۋرىزداعى تاڭعى ساعات 8.00-دەگى جاعداي بويىنشا ەلىمىزدىڭ بارلىق ءوڭىرى مەن شەتەلدەگى 10 388 رەفەرەندۋم ۋچاسكەسىندە داۋىستاردى ساناۋ اياقتالعانىن مالىمدەدى.
«كەشە تاڭەرتەڭ اۋماقتىق رەفەرەندۋم كوميسسيالارى داۋىس بەرۋ ناتيجەلەرى تۋرالى حاتتامالاردىڭ ەلەكتروندىق كوشىرمەلەرىن ۇسىندى. وبلىستاردىڭ, استانا, الماتى, شىمكەنت قالالارىنىڭ كوميسسيالارىنان الىنعان دەرەكتەردىڭ نەگىزىندە ورتالىق رەفەرەندۋم كوميسسياسى رەسپۋبليكالىق رەفەرەندۋمدا داۋىس بەرۋدىڭ الدىن الا ناتيجەلەرىن انىقتادى», دەدى ن.ءابدىروۆ.
رەفەرەندۋمعا قاتىسۋعا قۇقىعى بار 12 482 613 ەل ازاماتىنىڭ 9 127 192-ءسى (73,12 پايىز) داۋىس بەرۋ ۋچاسكەلەرىنە كەلىپ, قاتىستى. «2026 جىلعى 12 اقپاندا بۇقارالىق اقپارات قۇرالدارىندا جاريالانعان قازاقستان رەسپۋبليكاسىنىڭ جاڭا كونستيتۋتسياسىن قابىلدايسىز با؟» دەگەن سۇراققا 7 954 667 ادام ء«يا, قابىلدايمىن», 898 099 ادام «جوق, قابىلدامايمىن» دەپ جاۋاپ بەرگەن.
146 558 بيۋللەتەن جارامسىز دەپ تانىلعان, 127 868 بيۋللەتەن جارامدى, بىراق ەسەپكە الىنبادى, ويتكەنى ولاردا جاۋاپ نۇسقالارىنىڭ ەكەۋى دە بەلگىلەنگەن.
«رەسپۋبليكالىق رەفەرەندۋم تۋرالى زاڭنامانىڭ نورمالارىنا سايكەس, ەگەر رەفەرەندۋمعا قاتىسۋ قۇقىعى بار ازاماتتاردىڭ جارتىسىنان كوبى داۋىس بەرۋگە قاتىسقان بولسا, رەفەرەندۋم وتكىزىلگەن دەپ سانالادى. رەسپۋبليكالىق رەفەرەندۋمعا شىعارىلعان ماسەلە بويىنشا شەشىم ەگەر ونى جاقتاپ, وبلىستاردىڭ, رەسپۋبليكالىق ماڭىزى بار قالالاردىڭ, استانانىڭ كەمىندە ۇشتەن ەكىسىندە داۋىس بەرۋگە قاتىسقان ازاماتتاردىڭ جارتىسىنان استامى جاقتاپ داۋىس بەرسە, «قابىلداندى» دەپ ەسەپتەلەدى», دەدى ن.ءابدىروۆ ورك-دا وتكەن بريفينگتە.
ورك توراعاسىنىڭ ايتۋىنشا, رەسپۋبليكالىق رەفەرەندۋم زاڭناماسىنا سايكەس, اۋماقتىق رەفەرەندۋم كوميسسيالارى داۋىستار سانالعاننان كەيىن ءاربىر ءوڭىر بويىنشا حاتتامالاردىڭ تۇپنۇسقالارىن ورتالىق رەفەرەندۋم كوميسسياسىنا تابىستاۋى قاجەت. رەسپۋبليكالىق رەفەرەندۋمنىڭ قورىتىندىلارى ورتالىق رەفەرەندۋم كوميسسياسىندا بەلگىلەنەدى.
