سۋرەت: senate.parlam.kz
ماۋلەن اشىمباەۆ تۇركپا ميسسياسىنىڭ مۇشەلەرىنە ءىلتيپات ءبىلدىرىپ, ولاردىڭ مونيتورينگى قازاقستانداعى دەموكراتيالىق ينستيتۋتتاردىڭ دامۋىنا جانە قوعامداعى سەنىمنىڭ نىعايۋىنا ىقپال ەتەتىنىن اتاپ ءوتتى. سونداي-اق ول بۇل تاجىريبە ءوتىپ جاتقان ۇدەرىستەردىڭ اشىقتىعى مەن وبەكتيۆتى باعالانۋىنا قوسىمشا مۇمكىندىك بەرەتىنىن ايتتى.
سۇحبات بارىسىندا سەنات توراعاسى قازاقستاننىڭ تاياۋ شىعىستاعى قاقتىعىستى حالىقارالىق قۇقىق جانە بىرىككەن ۇلتتار ۇيىمىنىڭ جارعىسى اياسىندا ديپلوماتيالىق جولمەن بەيبىت رەتتەۋدى قولدايتىنىنا ەرەكشە نازار اۋداردى.
ءوز كەزەگىندە دەلەگاتسيا باسشىسى وسمان مەستەن ميسسيانىڭ وبەكتيۆتىلىك قاعيداتتارىنا بەرىك ەكەنىن اتاپ ءوتتى. ول رەفەرەندۋمنىڭ ەلدىڭ ۇلتتىق زاڭناماسىنا جانە حالىقارالىق نورمالارعا ساي تابىستى وتۋىنە تىلەكتەستىك ءبىلدىردى.
سونداي-اق ماۋلەن اشىمباەۆ قازاقستانعا جاڭا كونستيتۋتسياعا بايلانىستى رەفەرەندۋمعا حالىقارالىق بايقاۋشى رەتىندە كەلگەن تاۋەلسىز مەملەكەتتەر دوستاستىعى پارلامەنتارالىق اسسامبلەياسىنىڭ وكىلدەرىمەن كەزدەستى.
كەزدەسۋدە پالاتا سپيكەرى تمد پاا وكىلدەرىنە جاڭا اتا زاڭ جوباسىنىڭ نەگىزگى ەرەجەلەرى تۋرالى جان-جاقتى ايتىپ بەردى. سونىڭ اياسىندا ەلدىڭ الداعى دامۋ باعدارى, ونىڭ ىشىندە ادام كاپيتالىن دامىتۋ, مەملەكەتتىلىكتى نىعايتۋ, تاۋەلسىزدىك پەن ەگەمەندىكتى كۇشەيتۋ جانە ىشكى ساياسي تۇراقتىلىق پەن قوعامدىق كەلىسىمدى ساقتاۋ ماسەلەلەرى ءسوز بولدى.
ءوز كەزەگىندە حالىقارالىق بايقاۋشىلار قازاقستاندا رەفەرەندۋمدى ۇلتتىق زاڭناماعا جانە حالىقارالىق تاجىريبەگە سايكەس جوعارى دەڭگەيدە ۇيىمداستىرۋدىڭ ماڭىزىن اتاپ ءوتتى. سونداي-اق ولار رەفەرەندۋمعا مونيتورينگ جۇرگىزۋ جونىندەگى جوسپارلارى تۋرالى ايتىپ بەردى.
سەنات توراعاسى ۇجىمدىق قاۋىپسىزدىك تۋرالى شارت ۇيىمىنىڭ پارلامەنتتىك اسسامبلەياسى وكىلدەرىمەن دە كەزدەستى. ولار قازاقستانعا كونستيتۋتسياعا بايلانىستى رەفەرەندۋمعا حالىقارالىق بايقاۋشى رەتىندە كەلگەن.
ماۋلەن اشىمباەۆ ۇقشۇ پا دەلەگاتسياسىن ۇيىمنىڭ 20 جىلدىعىمەن قۇتتىقتاپ, وسى الاڭ اياسىندا جۇزەگە اسىرىلىپ جاتقان كوپجاقتى ىنتىماقتاستىقتىڭ ماڭىزىنا توقتالدى. ول قازاقستان ۇجىمدىق قاۋىپسىزدىك تۋرالى شارت ۇيىمىن ۇجىمدىق قاۋىپسىزدىكتى قامتاماسىز ەتۋدە ماڭىزدى ءرول اتقاراتىن قۇرىلىم رەتىندە قاراستىراتىنىن اتاپ ءوتتى.
سونىمەن قاتار سەنات توراعاسى جاھاندىق تۇراقسىزدىق كۇشەيىپ, حالىقارالىق احۋال شيەلەنىسە تۇسكەن قازىرگى جاعدايدا زاماناۋي سىن-قاتەرلەردى ناقتى باعالاپ, قۇبىلمالى الەمنىڭ تالاپتارىن ەسكەرە وتىرىپ, مەملەكەتتىك باسقارۋ مەن دامۋ جۇيەسىن قالىپتاستىرۋ ايرىقشا ماڭىزدى ەكەنىن ايتتى.
ءوز كەزەگىندە حالىقارالىق بايقاۋشىلار قازاقستاندا جۇرگىزىلىپ جاتقان رەفورمالارعا وڭ باعا بەردى. سونىمەن قاتار ولار رەفەرەندۋمدى قازاقستان زاڭناماسىنا جانە حالىقارالىق تاجىريبەگە سايكەس ۇيىمداستىرۋدىڭ ماڭىزىن اتاپ ءوتتى.
