موڭعولياداعى «بۇرگەدين بايار – 2026» («بۇركىت تويى – 2026») جارىسىندا موڭعوليالىق قۇسبەگى سەرىك جەڭىسبەك ءبىرىنشى ورىنعا, ءۇشىنشى ورىنعا بۇركىتحان حايزىم يە بولدى.
بۇعان دەيىن ءداستۇرلى تۇردە وتكىزىلىپ كەلگەن قۇسبەگىلەر فەستيۆالى بيىل العاش رەت الەم چەمپيوناتى فورماتىنا كەڭەيتىلدى. بۇل تۋرالى «Mongolian National Broadcaster» جانە «iSee» سياقتى موڭعوليالىق باسىلىمدار جاريالادى.
فەستيۆالعا بايان-ولگەي, ءتوۆ, سەلەنگە ايماقتارىنان 29 جەرگىلىكتى بۇركىتشى, قازاقستان, قىرعىزستان, يسپانيا, ماجارستان, رەسەيدەن كەلگەن 16 شەتەلدىك سپورتشى, جيىنى 45 قۇسبەگى قاتىسقان.
جەرلەسىمىز ەرزات بايقاداموۆ – بۇعان دەيىن دە ءىرى جارىستاردا جۇلدە الىپ جۇرگەن تاجىريبەلى قۇسبەگى. 2025 جىلدىڭ اقپان ايىندا پەتروپاۆل قالاسىندا وتكەن ەرەسەكتەر اراسىنداعى ەل چەمپيوناتىندا كۇمىس مەدال يەلەنگەن. وندا «زاڭعار» اتتى بۇركىتپەن ونەر كورسەتكەن. قۇسبەگىلىك داستۇردە ناتيجە ادامنىڭ شەبەرلىگىنە عانا بايلانىستى ەمەس. مۇندا بۇركىت پەن قۇسبەگىنىڭ ۇزاق جىلدار قالىپتاسقان ۇيلەسىمى شەشۋشى ءرول اتقارادى.
بۇركىتپەن اڭ اۋلاۋ جارىسى بىرنەشە كەزەڭنەن تۇرادى. ادەتتە قۇستىڭ بەلگىلى قاشىقتىقتان قوجايىنىنا قايتا ورالۋى, نىساناعا شابۋىل جاساۋ شەبەرلىگى, اڭعا ءتۇسۋى سياقتى داعدىلار باعالانادى. قازاق قۇسبەگىلىگى ادام, قۇس جانە جىلقى اراسىنداعى ەرەكشە بايلانىسقا نەگىزدەلگەن. ياعني بۇل ونەر تەك سپورت ەمەس, كوشپەلى مادەنيەتتىڭ كۇردەلى تاجىريبەلىك جۇيەسى سانالادى.
اباي وبلىسى
