فوتو: kazgazeta.kz
وقۋ-اعارتۋ ءمينيسترى جۇلدىز سۇلەيمەنوۆانىڭ ايتۋىنشا, دەمالىس ورتالىقتارىنىڭ قىزمەتىن جۇيەلەۋ بالالاردىڭ قاۋىپسىزدىگىن كۇشەيتۋگە جانە كورسەتىلەتىن قىزمەت ساپاسىن ارتتىرۋعا مۇمكىندىك بەرەدى.
«بيىلعى جىلدان باستاپ جىل بويى جۇمىس ىستەيتىن جانە ماۋسىمدىق دەمالىس ورتالىقتارىنىڭ قىزمەتى ليتسەنزيالاۋ ارقىلى رەتتەلەدى. وسىعان وراي نورماتيۆتىك قۇقىقتىق اكتىلەردى سايكەستەندىرۋ جۇمىستارى جۇرگىزىلىپ, قايتا بەكىتىلدى», دەدى مينيستر.
ءمينيستردىڭ ايتۋىنشا, ليتسەنزيالاۋ تالاپتارىنا سايكەس بىرنەشە نەگىزگى قۇجات جاڭارتىلعان. اتاپ ايتقاندا, ء«بىلىم بەرۋ ۇيىمدارى تۇرلەرىنىڭ نومەنكلاتۋراسىن بەكىتۋ تۋرالى» №50 بۇيرىق, «مەملەكەتتىك ءبىلىم بەرۋ ۇيىمدارىنىڭ ۇلگىلىك شتاتتارىن بەكىتۋ تۋرالى» №224 بۇيرىق, ء«بىلىم بەرۋ ۇيىمدارىنىڭ ۇلگىلىك قاعيدالارىن بەكىتۋ تۋرالى» №385 بۇيرىق قايتا بەكىتىلدى.
سونداي-اق ء«بىلىم بەرۋ ۇيىمدارىنىڭ ءبىلىم بەرۋ قىزمەتىنە قويىلاتىن بىلىكتىلىك تالاپتارىن جانە ولارعا سايكەستىكتى راستايتىن قۇجاتتاردىڭ تىزبەسىن بەكىتۋ تۋرالى» №473 بۇيرىق پەن ء«بىلىم بەرۋ ۇيىمدارىنىڭ ءبىلىم بەرۋ قىزمەتىمەن اينالىسۋعا ليتسەنزيا بەرۋ» مەملەكەتتىك قىزمەتىن كورسەتۋ قاعيدالارىن بەكىتۋ تۋرالى» №483 بۇيرىققا وزگەرىستەر ەنگىزىلدى. بۇدان بولەك, ءبىلىم بەرۋ-ساۋىقتىرۋ باعدارلامالارىن ازىرلەۋ, كەلىسۋ جانە بەكىتۋ ءتارتىبىن ايقىندايتىن جاڭا قۇجات دايىندالعان.
سوڭعى قوڭىراۋ: ەلىمىزدە 215 مىڭنان استام تۇلەك مەكتەپپەن قوشتاستى
مينيسترلىك دەمالىس ورتالىقتارىنىڭ اشىلۋ مەرزىمىنە قاراي ليتسەنزيالاۋ تالاپتارىن كەزەڭ-كەزەڭىمەن ەنگىزۋ بويىنشا ءتۇسىندىرۋ جۇمىستارىن جۇرگىزىپ جاتىر. وڭىرلىك شتابتار اياسىندا اكىمدىكتەر مەن مۇددەلى مەملەكەتتىك ورگاندار ءبىلىم بەرۋ-ساۋىقتىرۋ ورتالىقتارىنا ادىستەمەلىك قولداۋ كورسەتۋدە.
جۇلدىز سۇلەيمەنوۆانىڭ سوزىنشە, بالالاردىڭ جازعى دەمالىسىن ۇيىمداستىرۋعا قاتىستى 2024-2026 جىلدارعا ارنالعان ۆەدومستۆوارالىق جوسپار اياسىنداعى بارلىق ءىس-شارا تولىق ورىندالىپ كەلەدى.
«وڭىرلىك شتابتاردىڭ جۇمىسى ۇيلەستىرىلگەن. بيىل العاش رەت ء«بىلىم بەرۋ ۇيىمدارىندا بالالاردىڭ ساۋىقتىرىلۋى مەن دەمالىسىن ۇيىمداستىرۋ قاعيدالارى» بەكىتىلدى», دەدى مينيستر.
№237 بۇيرىققا سايكەس جازعى ماۋسىم الدىندا ساۋىقتىرۋ ورتالىقتارىنىڭ دايىندىعىن قابىلداۋ جۇمىسىنا سانيتاريالىق-ەپيدەميولوگيالىق قىزمەت, توتەنشە جاعدايلار ورگاندارى, پوليتسيا, اكىمدىك, ءبىلىم باسقارمالارى مەن دوكسو وكىلدەرى بىرلەسىپ قاتىسادى.
استانا مەكتەپتەرىندەگى ورىن تاپشىلىعى ماسەلەسى قالاي شەشىلمەك؟
دەمالىس ورىندارىنداعى مامانداردىڭ ساپالىق قۇرامىنا دا ەرەكشە نازار اۋدارىلعان. ءاربىر قىزمەتكەردىڭ سوتتىلىعى تەكسەرىلەدى. ءمينيستردىڭ ايتۋىنشا, مامانداردىڭ بىلىكتىلىگىن ارتتىرۋ ءۇشىن «بالداۋرەن» جانە «بوبەك» ورتالىقتارىنىڭ بازاسىندا ارنايى كۋرستار مەن سەمينارلار ۇيىمداستىرىلعان.
جازعى دەمالىس كەزەڭىندە بالالاردىڭ قاۋىپسىزدىگىن كۇشەيتۋ ءۇشىن كەرى بايلانىس جانە جەدەل كومەك كورسەتۋ تەتىكتەرى دە جەتىلدىرىلدى.
ء«بىلىم باسقارمالارى جانىنداعى كولل-ورتالىقتار ازاماتتاردىڭ سۇراقتارى مەن وتىنىشتەرىن قابىلدايدى. سونىمەن قاتار «111» بايلانىس ورتالىعى جازعى كەزەڭدە كۇشەيتىلگەن رەجيمدە جۇمىس ىستەيدى», دەدى جۇلدىز سۇلەيمەنوۆا.
بارلىق ءبىلىم بەرۋ ۇيىمدارىندا بالالاردىڭ تىكەلەي كومەك سۇراۋىنا ارنالعان QR-كودتار ورنالاستىرىلعان.
ەسكە سالايىق, بيىل تۇلەكتەر سانى سوڭعى 25 جىلداعى ەڭ جوعارى كورسەتكىشكە جەتتى.
