جول ەرەجەسىن بۇزۋ دەرەكتەرى 12 پايىزعا تومەندەگەن
باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ كوميتەتىنىڭ دەرەكتەرىنە سۇيەنسەك, 2026 جىلدىڭ قاڭتار-اقپان ايلارىندا ەل بويىنشا كولىك جانە جول شارۋاشىلىعى سالاسىندا شامامەن 1,95 ميلليون اكىمشىلىك قۇقىق بۇزۋشىلىق تىركەلگەن.
بۇل وتكەن جىلدىڭ ءدال وسى كەزەڭىمەن سالىستىرعاندا 12 پايىزعا از. ساراپشىلاردىڭ ايتۋىنشا, سوڭعى جىلدارى سالاداعى ستاتيستيكانىڭ تومەندەۋى سيرەك قۇبىلىسقا اينالعان. سەبەبى بۇعان دەيىنگى ستاتيستيكا كەرىسىنشە تۇراقتى ءوسىمدى كورسەتىپ كەلگەن.
مىسالى, 2024 جىلمەن سالىستىرعاندا وتكەن جىلى اۆتوماتتى تۇردە تىركەلگەن قۇقىق بۇزۋشىلىقتار سانى 52 پايىزعا, ال ودان ءبىر جىل بۇرىن 49 پايىزعا ارتقان. جالپى العاندا, جىل سايىن تىركەلەتىن جول ەرەجەسىن بۇزۋدىڭ ورتاشا ءوسىمى شامامەن 21 پايىزدى قۇراعان.
ساراپشىلار جول ەرەجەسىن بۇزۋ دەرەكتەرىنىڭ وسۋىنە اۆتوماتتى فوتو جانە بەينەباقىلاۋ جۇيەلەرىنىڭ كەڭىنەن ەنگىزىلۋى اسەر ەتكەنىن ايتىپ وتىر.
وتكەن جىلدىڭ قورىتىندىسى بويىنشا ەلىمىزدەگى جول كامەرالارى 11,1 ميلليونعا جۋىق قۇقىق بۇزۋشىلىقتى تىركەگەن. بۇل 2023 جىلعى كورسەتكىشتەن 85 پايىزعا جوعارى.
دەسە دە بيىلعى ستاتيستيكادا كەيبىر باپتار بويىنشا تىركەلگەن قۇقىق بۇزۋشىلىقتار كۇرت تومەندەگەنى بايقالىپ وتىر.
ماسەلەن:
• جول بەلگىلەرى مەن جول تاڭباسىنىڭ تالاپتارىن ساقتاماۋ (اقبتك 601-بابى) دەرەكتەرى شامامەن ءۇش ەسەگە ازايعان;
• تىيىم سالىنعان باعدارشام بەلگىسىنەن ءوتۋ (599-باپ) فاكتىلەرى ەكى ەسەگە تومەندەگەن.
ماماندار مۇنى دا اۆتوماتتى بەينەفيكساتسيا جۇيەلەرىنىڭ قولدانىلۋىمەن بايلانىستىرادى. سەبەبى وسى ەكى باپ بويىنشا قۇقىق بۇزۋشىلىقتاردىڭ تورتتەن ءۇش بولىگى كامەرالار ارقىلى انىقتالادى. ايتا كەتەرلىگى, وتكەن جىلدىڭ ءدال وسى كەزەڭىندە مۇنداي بۇزۋشىلىقتار كەرىسىنشە تەك ءوسىم كورسەتىپ وتىرعان.
12 ناۋرىزدان باستاپ كامەرالار ارقىلى تىركەلەتىن قۇقىق بۇزۋشىلىقتار كوبەيەدى
2026 جىلدىڭ 12 ناۋرىزىنان باستاپ قازاقستاندا قۇقىق بۇزۋشىلىقتاردى اۆتوماتتى تىركەۋ جۇيەسىنە قاتىستى زاڭنامالىق وزگەرىستەر كۇشىنە ەنەدى.
تۇركىستان وبلىسىندا 13 ملن تەڭگە ايىپپ ۇلى بار جۇرگىزۋشى انىقتالدى
بۇل وزگەرىستەر 2026 جىلعى 9 قاڭتاردا قابىلدانعان «اكىمشىلىك قۇقىق بۇزۋشىلىق تۋرالى كودەكسكە وزگەرىستەر مەن تولىقتىرۋلار ەنگىزۋ تۋرالى» زاڭ نەگىزىندە ەنگىزىلگەن.
جاڭارتىلعان نورمالار اكىمشىلىك قۇقىق بۇزۋشىلىق تۋرالى كودەكستىڭ 31-بابىنا قاتىستى. بۇل باپ اۆتوماتتى رەجيمدە انىقتالعان قۇقىق بۇزۋشىلىقتار ءۇشىن جاۋاپكەرشىلىك ءتارتىبىن رەتتەيدى.
بۇعان دەيىنگى زاڭ رەداكتسياسى بويىنشا, اۆتوماتتى تۇردە تىركەلگەن قۇقىق بۇزۋشىلىقتار ءۇشىن كولىك قۇرالىنىڭ يەسى نەمەسە يەلەنۋشىسى جاۋاپقا تارتىلاتىن.
سوندىقتان اۆتوماتتى كامەرالار نەگىزىنەن جول ەرەجەسىنە قاتىستى ولشەنەتىن بۇزۋشىلىقتاردى عانا تىركەيتىن. ولاردىڭ قاتارىندا:
• جىلدامدىقتى اسىرۋ;
• باعدارشامنىڭ تىيىم سالىنعان بەلگىسىنەن ءوتۋ;
• جول تاڭباسىن ەلەمەۋ سەكىلدى جاعدايلار بولدى.
جاڭا رەداكتسيا: قۇقىق بۇزۋشىنىڭ ءوزى جاۋاپ بەرەدى
12 ناۋرىزدان باستاپ باپتىڭ جاڭا رەداكتسياسى كۇشىنە ەنەدى. ەندى اكىمشىلىك قۇقىق بۇزۋشىلىق تسيفرلىق جۇيەلەر ارقىلى انىقتالعان جاعدايدا جاۋاپكەرشىلىك تىكەلەي قۇقىق بۇزۋشىلىقتى جاساعان تۇلعاعا جۇكتەلەدى.
بۇل ءۇشىن دەرەكتەر اكىمشىلىك وندىرىستەردىڭ بىرىڭعاي تىزىلىمىمەن ينتەگراتسيالانعان تسيفرلىق جۇيەلەر ارقىلى وڭدەلەدى.
ىشكى ىستەر مينيسترلىگى قازىرگى ۋاقىتتا تەحنيكالىق جۇيەلەر تەك كولىك قۇرالدارىنىڭ جول قوزعالىسى ەرەجەسىن بۇزۋ جاعدايىن انىقتاۋعا ارنالعانىن مالىمدەدى.
ايىپپۇل ارقالاپ جۇرمەڭىز: الماتى – استانا تاسجولىندا جاڭا كامەرالار ىسكە قوسىلدى
ياعني جاڭا نورمالار بىردەن بارلىق اكىمشىلىك قۇقىق بۇزۋشىلىقتاردى اۆتوماتتى تۇردە تىركەمەيدى.
كامەرالار انىقتايتىن بۇزۋشىلىقتار ءتىزىمى كەڭەيەدى
زاڭداعى وزگەرىستەر نەگىزىنەن كامەرالاردىڭ تەحنيكالىق مۇمكىندىگىن كەڭەيتۋدى كوزدەيدى. بۇعان دەيىن اۆتوماتتى جۇيەلەر التى نەگىزگى قۇقىق بۇزۋشىلىقتى انىقتاي الاتىن:
• جىلدامدىقتى اسىرۋ;
• باعدارشامنىڭ قىزىل تۇسىنەن ءوتۋ;
• جول بەلگىلەرى مەن تاڭباسىن ساقتاماۋ;
• كولىكتى دۇرىس توقتاتپاۋ نەمەسە تۇراققا قويماۋ;
• وزۋ جانە جولاقتا ورنالاسۋ ەرەجەسىن بۇزۋ;
• جاياۋ جۇرگىنشىلەرگە جول بەرمەۋ.
ەندى كامەرالار:
• قاۋىپسىزدىك بەلدىگىن تاقپاۋ;
• كولىك جۇرگىزۋ كەزىندە تەلەفونمەن سويلەسۋ ەرەجەسىن بۇزعانداردى دى انىقتاۋعا قاۋقارلى.
قۇجاتتارعا قاتىستى زاڭبۇزۋشىلىقتار دا اۆتوماتتى تۇردە انىقتالۋى مۇمكىن
ساراپشىلاردىڭ ايتۋىنشا, جۇيەلەر اكىمشىلىك وندىرىستەردىڭ بىرىڭعاي تىزىلىمىمەن ينتەگراتسيالانۋ ارقىلى قۇجاتتارعا قاتىستى كەيبىر قۇقىق بۇزۋشىلىقتاردى دا اۆتوماتتى تۇردە انىقتاي الادى.
بۇل قاتاردا:
• تەحنيكالىق بايقاۋدىڭ مەرزىمى ءوتىپ كەتكەن جاعدايدا;
• ساقتاندىرۋ ءپوليسى بولماعان كەزدە;
• قارۋ ساقتاۋ رۇقساتىنىڭ مەرزىمى ءوتۋ سىندى جاعدايلار بار.
