قايىرگۇل سايلاۋقىزى وسى ۋاقىت ىشىندە قاتارداعى قىزمەتكەردەن تاجىريبەلى اعا جەدەل ۋاكىلگە دەيىنگى جولدان ءوتتى. پاۆلودار وڭىرىندەگى قىلمىستىق توپتاردىڭ جولىن كەسۋ, زاڭسىز ارەكەتتەردى اشكەرەلەۋ مەن قوعامدىق قاۋىپسىزدىكتى ساقتاۋ جولىندا كەيىپكەرىمىز تالاي كۇردەلى تاپسىرمانى ورىندادى. وڭىرلىك ۇيىمداسقان قىلمىسقا قارسى كۇرەس باسقارماسىندا جۇمىس ىستەۋ فيزيكالىق دايىندىقتى عانا ەمەس, اناليتيكالىق ويلاۋ مەن پسيحولوگيالىق توزىمدىلىكتى دە قاجەت ەتەدى. ونىڭ ايتۋىنشا, بۇل سالادا ايەلگە ءتان قىراعىلىق پەن ينتۋيتسيا شەشۋشى ءرول اتقارادى.
«ماي اۋدانىنىڭ تۋماسىمىن. مەكتەپتى سەمەي وڭىرىندە وقىپ, الماتىداعى قازاق قىزدار پەداگوگيكالىق ينستيتۋتىن ءتامامدادىم. بالا كەزىمنەن پوليتسيا كيىمىن كيگەندەرگە قاتتى قىزىعاتىنمىن, ونىڭ ۇستىنە ناعاشىم ىشكى ىستەر ورگانىندا قىزمەت ەتتى. سول اسەر ەتكەن بولۋى كەرەك, 2007 جىلى پاۆلودار قالاسىنداعى وڭتۇستىك پوليتسيا بولىمىنە جۇمىسقا تۇردىم. بىلىكتى مامان بولىپ قالىپتاسۋىما كومەك كورسەتكەن ءبىرىنشى باسشىلارىم ق.تۇسىپبەكوۆ پەن ب.بولەجانوۆقا, تالىمگەرلەرىم يرينا كريۆوۆا مەن گۇلميرا داۋلەتشيناعا, ايگەرىم نۇربايقىزىنا العىسىم شەكسىز. پوليتسيادا ايەل نەمەسە ەر ادام دەپ ءبولىنۋ جوق. بىزدە تەك ورتاق مىندەت – زاڭدىلىقتى قامتاماسىز ەتۋ, ازاماتتاردىڭ تىنىشتىعىن قورعاۋ عانا بار. كۇن سايىنعى قيىندىققا قاراماستان, جۇمىسىمدى ادال اتقارۋعا تىرىسامىن», دەدى ق.وڭالباەۆا.
ۇيىمداسقان قىلمىستىق ىستەر بويىنشا وڭىردە ورمان اعاشتارىن ۇرلاۋ, كونتراباندالىق ونىمدەردى تاسىمالداۋ, كاسىپورىنداردىڭ مۇلكىن توناۋ, ۇيىمداسقان قىلمىستىق توپتار قۇرۋ سياقتى زاڭ بۇزۋشىلىق ءجيى تىركەلەدى ەكەن.
«ماسەلەن, جاقىندا باياناۋىل اۋدانىندا «قىزىل كىتاپقا» ەنگەن سۇڭقارلاردى ۇستاپ, شەتەل اسىرماق بولعان ۇيىمداسقان قىلمىستىق توپ مۇشەلەرىن قۇرىقتادىق. كۇدىكتىلەر تۋرالى مالىمەتتەردى ۇزاق جينادىق. ناتيجەسىندە, بۇلتارتپاس ايعاقتار تابىلدى. ىزدەستىرۋ بارىسىندا ساتۋ ماقساتىندا تەمىر تورعا قاماپ قويعان 32 سۇڭقار انىقتالدى. قىلمىستىق ىسكە قاتىسى بارلار قازىر تەرگەلىپ جاتىر. ونىڭ الدىندا بىرنەشە جىل ورماندى وتاپ كەلگەن ۇيىمداسقان قىلمىستىق توپ مۇشەلەرىن انىقتاپ, قولعا تۇسىرگەن ەدىك. وسىنداي كەشەندى جۇمىستىڭ ارقاسىندا زاڭعا قايشى ارەكەت جاساعاندار جازاسىن الىپ جاتىر», دەپ قوستى ول.
اعا جەدەل ۋاكىلدىڭ ايتۋىنشا, وبلىستىق پوليتسيا دەپارتامەنتىنە قاراستى ۇيىمداسقان قىلمىسقا قارسى كۇرەس باسقارماسىندا سەگىز جىلدان اسا ۋاقىت ەڭبەك ەتىپ كەلەدى. ۇجىمداعى كىلەڭ ەرلەر اراسىندا نەبارى ءۇش ارۋ جۇمىس ىستەيتىنىن, العاشقىدا قيىن بولعانىمەن بۇگىندە ابدەن توسەلىپ العانىن جەتكىزدى. جىلدام ويلاۋ, دەرەۋ ارەكەت ەتۋ, جاعدايدى شۇعىل تۇردە تالداۋ – كۇندەلىكتى تالاپ ەتىلەتىن داعدىلار. باسقارما قىزمەتكەرلەرى كۇندەلىكتى شۇعىل تاپسىرمالاردى دەر كەزىندە شەشىپ وتىرۋى قاجەت.
باسقارما باسشىلىعى قايىرگۇلدىڭ ەڭبەك جولى جاس ماماندارعا ۇلگى ەكەنىن ايتادى. 20 جىلعا جۋىق تاجىريبەسى بار وفيتسەر رەتىندە ول ءوزىنىڭ ءبىلىمىن كەيىنگى تولقىنعا ۇيرەتۋدەن جالىققان ەمەس. پاۆلودار وبلىسىنىڭ كريمينوگەندىك احۋالىن جاقسارتۋعا قوسقان ۇلەسى ءۇشىن بىرنەشە مارتە ۆەدومستۆولىق ماراپاتتارمەن, العىسحاتتارمەن ماراپاتتالعان. وتباسىندا ءبىر ۇل, ءبىر قىز ءوسىرىپ وتىرعان ارداقتى انا. بالالارى مەكتەپتە ۇلگىلى وقىپ, ءبىلىم دودالارىندا توپ جارىپ ءجۇر. جەتكىنشەكتەرىنىڭ جەتىستىگى بويىنا قۋات بەرەدى.
ءسوز سوڭىندا قايىرگۇل سايلاۋقىزى ماماندىعىن ماقتان تۇتاتىنىن جەتكىزدى. اياۋلى جان بارلىق نازىك جانداردى, سونىڭ ىشىندە پوگون تاققان ارۋلاردى كوكتەمنىڭ شۋاقتى مەرەكەسىمەن قۇتتىقتاپ, باق-بەرەكە تىلەدى.
پاۆلودار وبلىسى
