بيىل ەكىنشى رەت ءوتىپ وتىرعان ايتۋلى ءىس-شاراعا ەلىمىز وڭىرلەرىنەن وتاندىق عىلىمدى دامىتۋعا ايرىقشا ۇلەس قوسىپ جۇرگەن عالىمدار قاتىستى.
كورنەكتى عالىم, فيزيولوگ ءنايلا بازانوۆانىڭ ەسىمى ورتالىق ازيا ەلدەرىنە العاشقى ايەل-اكادەميك, قازاق ايەلدەرى اراسىنان شىققان تۇڭعىش بيولوگيا عىلىمىنىڭ دوكتورى, پروفەسسور رەتىندە بەلگىلى. اكادەميك ن. بازانوۆا اتىنداعى ماراپات – قازاقستان عىلىمىنىڭ دامۋىنا ەلەۋلى ۇلەس قوسىپ جۇرگەن عالىم ايەلدەردى ماراپاتتاۋعا ارنالعان قۇرمەت بەلگىسى. ماراپات عىلىم مەن تەحنولوگيانىڭ ۇزدىكسىز دامۋىن جانە اكادەميك زەرتتەۋلەرىندەگى جاڭاشىلدىقتى بەينەلەيدى.
سالتاناتتى جيىندا پرەزيدەنت جانىنداعى ۇعا پرەزيدەنتى اقىلبەك كۇرىشباۆ بۇگىنگى كۇنى عىلىم سالاسىندا تاباندىلىقپەن ەڭبەك ەتىپ جۇرگەن نازىك جاندىلاردى كوكتەممەن بىرگە كەلگەن جىلۋلىق پەن سۇلۋلىق مەرەكەسىمەن قۇتتىقتادى.
– ەلىمىزدىڭ ەكونوميكالىق دامۋىن عىلىمنىڭ قاتىسۋىنسىز دامىتۋ مۇمكىن ەمەس. وسى ورايدا مەملەكەت باسشىسى عىلىم سالاسىنا وراسان زور مىندەتتەر جۇكتەپ وتىر. بۇل زەرتتەۋ قىزمەتىن ۇيىمداستىرۋعا دەگەن كوزقاراستى وزگەرتىپ, عىلىمدى باسقارۋ ورگاندارىنىڭ مىندەتتەرىن ناقتىلاۋعا جانە عالىمدى ءوزىنىڭ زياتكەرلىك الەۋەتىن تولىق اشۋعا ىنتالاندىراتىن جاڭا تەتىكتەر جاساۋعا مىندەتتەيدى. جاۋاپكەرشىلىگى جوعارى مىندەتتى ىسكە اسىرۋدا عىلىمي قوعامداستىقتىڭ ايەلدەر قاۋىمىنا ەرەكشە سەنىم ارتامىز. «جۇماق – انانىڭ ىزىندە, شۋاق – انانىڭ كوزىندە» دەگەن تامسىلگە نازار اۋدارار بولساق, نازىك جاندىلار ءبىلىم مەن عىلىمنىڭ دامۋىنا, قوعامنىڭ زياتكەرلىك الەۋەتىن ارتتىرۋعا سۇبەلى ۇلەس قوسىپ, ۇرپاق تاربيەلەپ ءجۇر. جىل سايىن عىلىمداعى ايەلدەر ۇلەسى ارتىپ بۇگىندە كورسەتكىش 12 مىڭنان اسادى. ولاردىڭ قاتارىندا عىلىم دوكتورلارىنىڭ سانى – 898, عىلىم كانديداتتارى – 2 859, PhD – 2 229 جانە بەيىنى بويىنشا دوكتورلار – 185. عىلىمدى دامىتۋعا باعىتتالعان كەشەندى جوسپاردا عالىم ايەلدەرگە تۇسەتىن سالماق تا, جاۋاپكەرشىلىك تە جوعارى. بىراق وسىنداي كۇردەلى مىندەتتى ىسكە اسىرۋدا نازىك جاندىلار ءوز ىسىنە دەگەن ادالدىقپەن ەل دامۋىنا كەلەلى ۇلەس قوسىپ كەلەدى, – دەدى ۇعا پرەزيدەنتى.
القالى جيىن بارىسىندا الماتى قالاسى اكىمى دارحان ساتىبالدىنىڭ قۇتتىقتاۋىن جاستار ساياساتى باسقارماسىنىڭ باسشىسى ءازيز قاجدەنبەك جەتكىزىپ, عىلىمدى قولداۋعا باعىتتالعان جوبالار تۋرالى ايتىپ ءوتتى. ال ىزگى لەبىزىن ارناعان ۇعا اكادەميگى ديليارا قايداروۆا, قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى بەيبىتگۇل كارىموۆا قوعامداعى عالىم ايەلدەردىڭ ءرولى, جەتىستىگىنە توقتالدى.
اقمارال ءالنازاروۆا مەرەكە قارساڭىندا مەديتسينا قىزمەتكەرلەرىن ماراپاتتادى
سالتاناتتى جيىندا اباي اتىنداعى قازۇپۋ پروفەسسورى فاۋزيا ورازباەۆا, ر. سۇلەيمەنوۆ اتىنداعى شىعىستانۋ ينستيتۋتى جانىنداعى رەسپۋبليكالىق اقپاراتتىق ورتالىق ديرەكتورى, پروفەسسور مەرۋەرت ابۋسەيىتوۆا, الماتى تەحنولوگيالىق ۋنيۆەرسيتەتىنىڭ پروفەسسورى ماريام اليماردانوۆا, ءال-فارابي اتىنداعى قازۇۋ پروفەسسورى تامارا شالاحمەتوۆا, سەيسمولوگيالىق باقىلاۋلار مەن زەرتتەۋلەر ۇلتتىق عىلىمي ورتالىعىنىڭ ينجەنەرلىك سەيسمولوگيا زەرتحاناسىنىڭ مەڭگەرۋشىسى ناتاليا سيلاچەۆا, ش. ءۋاليحانوۆ اتىنداعى تاريح جانە ەتنولوگيا ينستيتۋتىنىڭ باس عىلىمي قىزمەتكەرى, پروفەسسور زاكيش تۇلەۋحانوۆا, ميكروبيولوگيا جانە ۆيرۋسولوگيا عىلىمي-وندىرىستىك ورتالىعىنىڭ ميكروبيولوگيا ءبولىمىنىڭ جەتەكشىسى گۇل بايماحانوۆا, ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىنىڭ ءبولىم باستىعى جانات بيسەنباەۆا, جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتى دەپارتامەنت ديرەكتورى ينديرا بەيشوۆا, عۇماربەك داۋكەەۆ اتىنداعى الماتى ەنەرگەتيكا جانە بايلانىس ۋنيۆەرسيتەتىنىڭ «كيبەرقاۋىپسىزدىك» كافەدراسىنىڭ مەڭگەرۋشىسى ەڭلىك بەگىمباەۆا سىندى 60-تان استام عالىم ماراپاتتالدى.
ماراپات وتاندىق عىلىمداعى نازىك جانداردىڭ جەتىستىكتەرىن مويىنداۋ, دارىپتەۋ جانە جاس عالىمداردى ىنتالاندىرۋ ماقساتىندا تاعايىندالدى. اكادەميكتىڭ عىلىمي مۇراسى جاس عالىمدارعا ۇلگى-ونەگە.
الماتى
