سۋرەت: aqshamnews.kz
سەناتور بيبىگۇل جەكسەنباي ەلوردادا «قازاتومونەركاسىپ» اق ەڭبەك ۇجىمىمەن كەزدەسىپ, جاڭا كونستيتۋتسيا جوباسىنىڭ نەگىزگى ەرەجەلەرى مەن ونىڭ ەلدىڭ الەۋمەتتىك-ەكونوميكالىق دامۋىنداعى ماڭىزىن ءتۇسىندىردى. سونداي-اق ول مەملەكەتتىڭ ەنەرگەتيكالىق قاۋىپسىزدىگى مەن ۇلتتىق ەكونوميكانىڭ تۇراقتى دامۋىن قامتاماسىز ەتۋدەگى كومپانيانىڭ ستراتەگيالىق ءرولىن اتاپ ءوتتى.
سەنات دەپۋتاتى ءنۇريا نيازوۆا الماتى قالاسىنداعى دوستىق ۇيىندە ەتنومادەني بىرلەستىكتەردىڭ وكىلدەرىمەن كەزدەستى. ول جوعارى كونسۋلتاتيۆتىك-قوعامدىق ورگان – «حالىق كەڭەسىن» قۇرۋ تۋرالى باستاماعا توقتالدى. دەپۋتاتتىڭ ايتۋىنشا, حالىق كەڭەسى مەملەكەت پەن قوعامنىڭ تىكەلەي پىكىرلەسۋ, ىشكى ساياسات ماسەلەلەرى بويىنشا ۇسىنىستار ازىرلەۋ, ەتنوسارالىق كەلىسىمدى نىعايتۋ مەن جالپىۇلتتىق قۇندىلىقتاردى ىلگەرىلەتۋدە ءتيىمدى الاڭ بولادى.
سونداي-اق دەپۋتات جاننا اسانوۆا الماتىدا «قازپوشتا» ۇلتتىق بايلانىس وپەراتورىنىڭ ۇجىمىمەن كەزدەستى. سەناتور كونستيتۋتسيالىق رەفورمانىڭ نەگىزگى باعىتتارىنا ءجىتى توقتالىپ, ۇسىنىلعان وزگەرىستەر مەملەكەتتىك باسقارۋدىڭ نەعۇرلىم ادىلەتتى جانە جاۋاپتى ۇلگىسىن قالىپتاستىرۋعا, زاڭ ۇستەمدىگى قاعيداتتارىن نىعايتۋعا, ەلىمىزدىڭ قوعامدىق-ساياسي ومىرىندەگى ازاماتتاردىڭ ءرولىن ارتتىرۋعا باعىتتالعانىن اتاپ ايتتى.
ال دەپۋتات نۇرلان بەكنازاروۆ شىمكەنت قالاسىنداعى «Alan» حالىقارالىق مەكتەبىنىڭ پەداگوگيكالىق ۇجىمىمەن كەزدەستى. سەناتور ساپالى ءبىلىم الۋ قۇقىعىن قامتاماسىز ەتۋ, پەداگوگ مارتەبەسىن نىعايتۋ, الەۋمەتتىك ادىلەتتىلىك قاعيداتتارىن ساقتاۋ, مەملەكەتتىڭ قۇقىقتىق نەگىزدەرىن دامىتۋعا ەرەكشە توقتالدى.
جالپىۇلتتىق كواليتسيا قىزمەتى اياسىندا دەپۋتات جانبولات جورگەنباەۆ الماتى وبلىسى, جامبىل اۋدانىنىڭ تۇرعىندارىمەن كەزدەستى. قاينازار اۋىلىنىڭ №2 ورتا مەكتەبىنە 150-گە جۋىق ادام جينالدى. سەناتور قاتىسۋشىلارعا اتا زاڭداعى وزگەرىستەر ادىلەتتى, وسكەلەڭ قوعامدى قالىپتاستىرۋعا, زاڭ ۇستەمدىگى قاعيداتتارىن نىعايتۋعا, ازاماتتاردىڭ قۇقىقتارى مەن بوستاندىقتارىنىڭ كەپىلدىكتەرىن كەڭەيتۋگە, سونداي-اق
مەملەكەتتىڭ الەۋمەتتىك جاۋاپكەرشىلىگىن كۇشەيتۋگە باعىتتالعانىن جەتكىزدى.
سەنات دەپۋتاتتارى امانگەلدى ەسباي, عالياسقار سارىباەۆ پەن سۇلتان دۇيسەمبينوۆ جەتىسۋ وبلىسىنىڭ تەكەلى قالاسىندا قالا تۇرعىندارى مەن «Tasun» جشس ۇجىمىمەن كەزدەستى. سونداي-اق كەربۇلاق اۋدانىنداعى زيالى قاۋىم وكىلدەرى, اسكەري بولىمدەگى اسكەري قىزمەتشىلەرى, دەنساۋلىق ساقتاۋ سالاسىنىڭ قىزمەتكەرلەرى مەن «قاراشوقى» وندىرىستىك كووپەراتيۆىنىڭ ۇجىمىمەن كەزدەستى. ولار حالىققا بيلىك تارماقتارى اراسىندا وكىلەتتىكتەردى قايتا ءبولۋ, قۇرىلتايدىڭ ءرولىن كۇشەيتۋدى كوزدەيتىن ەرەجەلەردى ءتۇسىندىردى.
«جاڭا كونستيتۋتسيانىڭ جوباسى ەلىمىزدىڭ بۇدان بىلايعى دامۋ كەلبەتىن ايقىندايتىن ستراتەگيالىق قۇجات رەتىندە جالپىحالىقتىق تالقىلاۋعا شىعارىلدى. قۇجاتتا مەملەكەتتىك باسقارۋدىڭ نەعۇرلىم تەڭدەستىرىلگەن جۇيەسىن قالىپتاستىرۋ, بيلىك ينستيتۋتتارىنىڭ جاۋاپكەرشىلىگىن كۇشەيتۋ مەن ازاماتتار قۇقىقتارىنىڭ كەپىلدىكتەرىن نىعايتۋ كوزدەلىپ وتىر», دەدى ا.ەسباي.
