ايدا بالاەۆا كونستيتۋتسيا جوباسىن حالىققا ءتۇسىندىرۋ ماقساتىندا قۇرىلعان «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسى توراعاسىنىڭ ورىنباسارى رەتىندە ءاربىر ازاماتتىڭ رەفورمانىڭ شىنايى مازمۇنىن تەرەڭ ءتۇسىنۋى ايرىقشا ماڭىزدى دەپ سانايتىنىن ايتتى. ويتكەنى 15 ناۋرىزدا قابىلداناتىن شەشىم ەلدىڭ ەرتەڭىنە قاتىستى سانالى ازاماتتىق ۇستانىمنىڭ كورىنىسى بولماق.
«ەڭ الدىمەن, بۇكىل قۇجاتتىڭ ماعىنالىق وزەگىن ايقىندايتىن پرەامبۋلاعا توقتالعان ءجون. ول ء«بىز, ءبىرتۇتاس قازاقستان حالقى…» دەگەن سوزدەرمەن باستالادى. وسى ماڭىزدى تۇجىرىم مەملەكەتتەگى بيلىكتىڭ بىردەن-ءبىر قاينار كوزى حالىقتىڭ ءوزى ەكەنىن, كونستيتۋتسيانىڭ شىنايى اۆتورى ەل ازاماتتارى ەكەنىن بىلدىرەدى. جاڭا جوبادا «بايىرعى قازاق جەرىندەگى مەملەكەتتىلىكتى نىعايتۋ» جانە « ۇلى دالانىڭ مىڭجىلدىق تاريحىنىڭ ساباقتاستىعى» ايقىن كورسەتىلگەن. بۇل قازىرگى قازاقستان رەسپۋبليكاسىنىڭ تاريحي تامىرى تەرەڭ, ۇلتتىڭ بولمىسى مەن رۋحاني مۇراسىن ساقتاۋ جولىنداعى ساباقتاستىق ساقتالاتىنىن ايقىندايدى», دەدى ايدا بالاەۆا.
مينيستر سونىمەن قاتار مەملەكەتتىڭ ۋنيتارلىق سيپاتى, شەكارانىڭ مىزعىماستىعى مەن اۋماقتىق تۇتاستىعىنىڭ كونستيتۋتسيالىق دەڭگەيدە بەكىتىلۋى – ەلدىڭ تۇتاستىعى مەن تۇراقتىلىعىنىڭ باستى كەپىلى ەكەنىن اتاپ ءوتتى.
«قازاقستان ءاردايىم ءبىرتۇتاس, بولىنبەيتىن مەملەكەت بولىپ قالا بەرەدى. پرەامبۋلادا العاش رەت ەلىمىزدىڭ دامۋ باعىتىن ايقىندايتىن ماڭىزدى قۇندىلىقتار دا كورىنىس تاپقان. اتاپ ايتقاندا, ادىلەتتى قازاقستان يدەياسى مەن «زاڭ مەن ءتارتىپ» قاعيداتى. بۇل نەگىزگى ۇستانىمدار قۇقىق ۇستەمدىگىن قامتاماسىز ەتۋگە, زاڭ الدىندا بارشانىڭ تەڭدىگىن ورنىقتىرۋعا جانە بيلىكتىڭ قوعام الدىنداعى جاۋاپكەرشىلىگىن ارتتىرۋعا باعىتتالعان», دەدى مينيستر.
ايدا بالاەۆانىڭ پايىمداۋىنشا جاڭا اتا زاڭ ادام قۇقىعى مەن بوستاندىعىن باستى ورىنعا قويادى. وسىلايشا, ادام جانە ونىڭ قادىر-قاسيەتى كونستيتۋتسيالىق مودەلدىڭ وزەگىنە اينالىپ وتىر.
«قوعامداعى بىرلىك, ىنتىماق, ەتنوسارالىق جانە كونفەسسياارالىق كەلىسىم قۇندىلىقتارى دا ەرەكشە اتاپ وتىلگەن. ءدال وسى قۇندىلىقتار ەلىمىزدەگى بەيبىتشىلىك پەن تۇراقتىلىقتىڭ بەرىك نەگىزىن قالىپتاستىرادى. مادەنيەت, ءبىلىم, عىلىم مەن يننوۆاتسيانى دامىتۋ, سونداي-اق تابيعاتقا ۇقىپتى ءارى جاۋاپكەرشىلىكپەن قاراۋ دا ەلدىڭ جاڭعىرۋ جولىنداعى باستى باسىمدىقتار رەتىندە كورىنىس تاپقان.ءبىز بەيبىتشىلىك پەن بارلىق مەملەكەتتەرمەن سىيلاستىققا نەگىزدەلگەن دوستىق قارىم-قاتىناس ورناتۋعا ۇمتىلامىز جانە كەلەشەك ۇرپاق الدىنداعى تاريحي جاۋاپكەرشىلىگىمىزدى تەرەڭ سەزىنەمىز.پرەامبۋلا «…قازاقستان رەسپۋبليكاسىنىڭ اتا زاڭىن – وسى كونستيتۋتسيانى قابىلدايمىز» دەگەن سوزدەرمەن اياقتالادى. بۇل قوعام بولىپ سانالى تۇردە ۇيىسىپ, ەل بولاشاعىنا ورتاق جاۋاپكەرشىلىك جۇگىن بىرگە كوتەرۋگە دەگەن دايىندىقتىڭ كورىنىسى دەپ بىلەمىن», دەدى ول.
