قوستاناي وبلىسى تسيفرلىق ترانسفورماتسيا باعىتىندا بەلسەندى جۇمىس جۇرگىزىپ كەلەدى. 2025 جىلى وڭىردەگى اۆتوكولىك قۇراستىرۋ زاۋىتتارىندا, تاۋ-كەن ءوندىرىسى مەن ماشينا جاساۋ كاسىپورىندارىندا 101 ونەركاسىپتىك روبوت ورناتىلدى. بۇرىن ەنگىزىلگەن جۇيەلەردى قوسا ەسەپتەگەندە, قازىرگى تاڭدا وندىرىستە 145 روبوتتاندىرىلعان كەشەن جۇمىس ىستەپ تۇر. مۇنداي تەحنولوگيادا ءوندىرىس تيىمدىلىگىن ارتتىرۋعا, تەحنولوگيالىق ۇدەرىستەردىڭ تۇراقتىلىعىن قامتاماسىز ەتۋگە, ءونىم ساپاسىن جاقسارتۋعا مۇمكىندىك بەرەدى.
قوستاناي وبلىسى اكىمدىگى ينفورماتيزاتسيا, مەملەكەتتىك قىزمەتتەر كورسەتۋ جانە ارحيۆتەر باسقارماسىنىڭ باسشىسى ازامات كاشيەۆتىڭ ايتۋىنشا, ءوڭىر الدىندا تۇرعان باستى مىندەت – جەكەلەگەن تسيفرلىق جوبالارمەن شەكتەلمەي, Smart Region قاعيداتىنا نەگىزدەلگەن كەشەندى تسيفرلىق ينفراقۇرىلىم قالىپتاستىرۋ.
«Smart Region جانە تسيفرلىق ينفراقۇرىلىمدى دامىتۋدىڭ جۇيەلى ءتاسىلىن قالىپتاستىرۋ ارقىلى تسيفرلىق ترانسفورماتسيانىڭ ناقتى ناتيجەسىن كورىپ وتىرمىز. بۇل ونەركاسىپتەگى ۇدەرىستەردى اۆتوماتتاندىرۋ, الەۋمەتتىك سالادا تسيفرلىق سەرۆيستەردى دامىتۋ جانە باسقارۋ تيىمدىلىگىن ارتتىرۋ ءۇشىن دەرەكتەردى پايدالانۋعا مۇمكىندىك بەرەدى. نەگىزگى نازاردى ءوڭىر ەكونوميكاسىنا ولشەنەتىن ناتيجە بەرەتىن جانە تۇرعىنداردىڭ ءومىر ساپاسىن جاقسارتاتىن شەشىمدەرگە اۋدارامىز», دەدى ول.
2025 جىلدىڭ جازىندا وتكەن Qostanai Investment Forum الاڭىندا تسيفرلىق ترانسفورماتسيا, جاساندى ينتەللەكتىنى ەنگىزۋ جانە جوعارى تەحنولوگيالىق جوبالاردى دامىتۋ ماسەلەلەرى تالقىلاندى. فورۋم قاتىسۋشىلارى ينۆەستيتسيا تارتۋ تەتىكتەرىن جانە وبلىس ەكونوميكاسىنا يننوۆاتسيالىق شەشىمدەردى ەنگىزۋ جولدارىن قاراستىردى.
بۇگىندە وبلىستا اگروونەركاسىپ كەشەنىندە, كولىك ينفراقۇرىلىمىندا جانە دەنساۋلىق ساقتاۋ سالاسىندا تسيفرلىق شەشىمدەر بەلسەندى ەنگىزىلىپ جاتىر. بۇل جوبالار باسقارۋ ساپاسىن ارتتىرۋعا جانە شەشىم قابىلداۋ بارىسىندا دەرەكتەرگە نەگىزدەلگەن ءتاسىلدى كەڭىنەن قولدانۋعا باعىتتالعان.
الداعى كەزەڭدە ءوڭىردىڭ باستى ماقساتى – ءساتتى تسيفرلىق تاجىريبەلەردى اۋقىمداپ, ەكونوميكانىڭ نەگىزگى سالالارى مەن الەۋمەتتىك سەكتورعا جاساندى ينتەللەكت قۇرالدارىن جۇيەلى تۇردە ەنگىزۋ.
