كەزدەسۋگە قازاقستان رەسپۋبليكاسى پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى, كواليتسيا توراعاسىنىڭ ورىنباسارى ايدا بالاەۆا قاتىستى.
ءوز سوزىندە ايدا بالاەۆا جاڭا كونستيتۋتسيا جوباسى ەل دامۋىنىڭ جاڭا پاراديگماسىن ايقىندايتىنىن اتاپ ءوتتى. بۇل پاراديگمادا ادام جانە ونىڭ قادىر-قاسيەتى الدىڭعى ورىنعا شىعىپ, زياتكەرلىك الەۋەت ستراتەگيالىق رەسۋرس رەتىندە قاراستىرىلادى.
«جاڭا كونستيتۋتسيا جوباسىنىڭ نەگىزگى ءمانى - ءاربىر ازاماتتىڭ قادىر-قاسيەتىن قورعاۋ جانە ەلدىڭ تۇراقتى دامۋىن قامتاماسىز ەتۋ. ەڭ باستىسى, العاش رەت كونستيتۋتسيالىق دەڭگەيدە ء«بىلىم», «عىلىم» جانە «يننوۆاتسيالار» مەملەكەتتىڭ جوعارى قۇندىلىقتارى رەتىندە بەكىتىلدى. بۇل – بىلىمگە, عىلىمي ويعا جانە شىعارماشىلىق الەۋەتكە ناقتى پروگرەسس فاكتورلارى رەتىندە سۇيەنۋ دەگەن ءسوز. جاڭا تەحنولوگيالار مەن جاساندى ينتەللەكت داۋىرىندە باسەكەگە قابىلەتتى بولۋ وسى باعىتتارسىز مۇمكىن ەمەس», دەدى ول.
جوبا تالقىلاۋىنىڭ كەڭ قوعامدىق فورماتتا وتكەنىنە ەرەكشە نازار اۋدارىلدى. ۇسىنىستار e-Otinish جانە eGov تسيفرلىق پلاتفورمالارى ارقىلى قابىلدانىپ, كونستيتۋتسيالىق كوميسسيا جۇمىسى اشىق جۇرگىزىلىپ, قوعامدىق تالقىلاۋلار تىكەلەي ەفيردە كورسەتىلدى.
«بۇرىنعى كونستيتۋتسيامىز 30 جىلدان استام ۋاقىت بۇرىن, قيىن كەزەڭدە قابىلداندى. ال, قازىرگى زامان تالابى باسقا – ءبىز دامۋ مىندەتتەرىن ايقىنداۋىمىز كەرەك. سوندىقتان 10–20–30 جىل العا قاراپ, تۇراقتى وركەندەۋدى قامتاماسىز ەتىپ, بالالارىمىزعا بولاشاقتا مىقتى مەملەكەت قالدىرۋىمىز قاجەت. جاڭا كونستيتۋتسيا جوباسى ادامي كاپيتالدىڭ باسىمدىعىن, عىلىم مەن يننوۆاتسيالارعا سۇيەنۋدى, ۇلتارالىق جانە كونفەسسياارالىق كەلىسىمدى نىعايتۋدى كۇشەيتەدى», دەدى ءماجىلىس دەپۋتاتى نيكيتا شاتالوۆ.
ادامي كاپيتالدى دامىتۋ جانە كادر دايارلاۋ ماسەلەلەرىن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ باسقارما توراعاسى – رەكتورى بولات تىلەپ كوتەردى. گۋمانيتارلىق باعىتتا «حالىقارالىق «قازاق ءتىلى» قوعامى» قوعامدىق بىرلەستىگىنىڭ جەتىسۋ وبلىستىق فيليالىنىڭ توراعاسى امىرە ءارىن ۇسىنىستارىن ءبىلدىردى. ال اڭگىمەنىڭ مادەني قىرىن بيكەن ريموۆا اتىنداعى قازاق دراما تەاترىنىڭ كوركەمدىك جەتەكشىسى ساعىندىق ءجۇمادىل اتاپ ءوتتى.
امىرە ءارىن كونستيتۋتسيادا بەكىتىلگەن نەگىزگى قاعيداتتاردىڭ مەملەكەت دامۋىنا جانە ەلدىڭ حالىقارالىق بەدەلىن نىعايتۋعا ىقپالىن ەرەكشە اتاپ ءوتتى.
«نەگىزگى قۇجاتتا بەكىتىلگەن ەل مەن اۋماقتىڭ تۇتاستىعى, ادام قۇقىقتارى مەن بوستاندىقتارى, زايىرلى مەملەكەت قاعيداتى, تسيفرلاندىرۋ, نەكە, ادىلەتتىلىك, زاڭ مەن ءتارتىپ, تابيعاتتى قورعاۋ سياقتى قاعيداتتاردى ومىرشەڭ دەپ سانايمىن. وسىلايشا ازاماتتىق قوعامنىڭ مەملەكەتتىك باسقارۋداعى ءرولى ارتىپ, مەملەكەتتىك ۇدەرىستەرىمىز دامىپ, ەلىمىزدىڭ الەمدىك قاۋىمداستىقتاعى بەدەلى نىعايا تۇسەدى», دەدى ول.
ساعىندىق ءجۇمادىل دە كونستيتۋتسيادا بەكىتىلگەن قاعيداتتاردىڭ ماڭىزىن اتاپ ءوتتى.
«تاۋەلسىزدىك پەن مەملەكەتتىلىك قۇندىلىعى دا كونستيتۋتسيادا ايقىن كورىنىس تاپقان. جەرىمىزدىڭ تۇتاستىعى, شەكارامىزدىڭ بەرىكتىگى, حالىقتىڭ بىرلىگى – مەملەكەتتىڭ باستى بايلىعى», دەدى ول.
كەزدەسۋ سوڭىندا قاتىسۋشىلار الداعى رەفەرەندۋمدا سانالى تاڭداۋ جاساۋدىڭ جانە ءار ازاماتتىڭ جەكە جاۋاپكەرشىلىگىنىڭ ماڭىزىن اتاپ ءوتتى. كونستيتۋتسيالىق نورمالار ءىس جۇزىندە جۇمىس ىستەپ, مەملەكەت پەن قوعام اراسىنداعى سەنىمدى نىعايتۋى ءتيىس ەكەنى ايتىلدى.
