اشىلۋ سالتاناتىنا ماڭعىستاۋ وبلىسى اكىمىنىڭ ورىنباسارى اببات ورىسباەۆ, وبلىستىق ءماسليحات دەپۋتاتتارى, انالار كەڭەسىنىڭ مۇشەلەرى جانە ءبىلىم بەرۋ ۇيىمدارىنىڭ قىزمەتكەرلەرى قاتىستى. ءىس-شارانىڭ ماقساتى – ءبىلىم الۋشىلارعا يننوۆاتسيالىق لوگوپەديالىق قولداۋ كورسەتۋ جانە تسيفرلىق رەسۋرستاردى ءتيىمدى پايدالانۋ ارقىلى قولجەتىمدى, ساپالى ءبىلىم بەرۋ ورتاسىن قالىپتاستىرۋ.
باعدارلاما اياسىندا كوللەدجدىڭ جاڭارتىلعان كەلبەتى مەن ستراتەگيالىق دامۋ باعىتى تانىستىرىلىپ, يننوۆاتسيالىق لوگوپەديا جانە تسيفرلىق ءبىلىم كابينەتتەرى اشىلدى. سونىمەن قاتار تاجىريبەلىك الاڭداردا «اقىلدى اينا», قۇم تەراپياسى, 3D-پرينتەر جانە Pibody ينتەراكتيۆتى قۇرىلعىسىنىڭ قولدانىلۋى بويىنشا workshop ۇيىمداستىرىلدى.
«مۇرىن جىراۋ سەڭگىربەك ۇلى اتىنداعى ماڭعىستاۋ جوعارى پەداگوگيكالىق كوللەدجىنىڭ» ديرەكتورى باقتىگۇل ومىربەكوۆا جاڭا كابينەتتەردىڭ ءبىلىم بەرۋ ۇدەرىسىندەگى ماڭىزىنا توقتالدى.
«بۇگىن ءبىزدىڭ كوللەدجدە ەرەكشە ءبىلىمدى قاجەت ەتەتىن بالالارعا ارنالعان لوگوپەديالىق جانە تسيفرلىق ءبىلىم كابينەتتەرى اشىلدى. بۇل كابينەتتەر سوڭعى ۇلگىدەگى «اقىلدى اينا» جانە زاماناۋي تەراپيالىق قۇرال-جابدىقتارمەن قامتاماسىز ەتىلگەن. نەگىزگى ماقسات – لوگوپەديا ماماندىعى بويىنشا ءبىلىم الىپ جاتقان ستۋدەنتتەردىڭ پراكتيكالىق داعدىلارىن دامىتۋ. ستۋدەنتتەر ەرەكشە ءبىلىمدى قاجەت ەتەتىن بالالارمەن تىكەلەي جۇمىس جاساپ, ءوز تاجىريبەلەرىن جەتىلدىرەدى. الەۋمەتتىك جوبا اياسىندا ءتىل دامۋىندا كەمشىلىگى بار بالالار تەگىن قابىلدانادى. ستۋدەنتتەر ولارمەن پراكتيكالىق ساباقتار وتكىزىپ, بالالاردىڭ سويلەۋ قابىلەتىن دامىتۋعا جانە قوعامعا بەيىمدەلۋىنە ءوز ۇلەستەرىن قوسادى. سونىمەن قاتار, كوللەدجدە روبوتوتەحنيكا قۇرالدارىمەن جابدىقتالعان كابينەتتەر جۇمىس ىستەيدى. ءبىز ينفورماتيكا ءپانى مۇعالىمدەرىن دايارلايمىز. بولاشاق پەداگوگتەر مەكتەپتەردە زاماناۋي يننوۆاتسيالىق قۇرالدارمەن جۇمىس ىستەيدى. مەملەكەت باسشىسى جاريالاعان «تسيفرلىق تەحنولوگيالار جانە جاساندى ينتەللەكت» جىلى اياسىندا ءبىلىم بەرۋ سالاسىنا تسيفرلىق تەحنولوگيالار كەڭىنەن ەنگىزىلۋدە. بۇل كابينەتتەردە ستۋدەنتتەر ەلەكترونيكاعا قاتىستى جوبالار جاساپ, ولاردى ءىس جۇزىندە جۇزەگە اسىرادى. كوللەدجدە سوڭعى ۇلگىدەگى 3D-پرينتەر دە بار. ستۋدەنتتەر وسى قۇرالدارمەن جۇمىس ىستەۋدى مەڭگەرىپ, دايىن مامان رەتىندە مەكتەپتەرگە بارادى. بولاشاقتا ولار وقۋشىلاردى روبوتوتەحنيكا, ەلەكترونيكا جانە ينفورماتيكا باعىتىندا ساپالى بىلىممەن قامتاماسىز ەتەدى», دەدى باقتىگۇل ومىربەكوۆا.
ايتا كەتەيىك, اتالعان كابينەتتەردە تۇركيا ەلىندە تاعىلىمدامادان وتكەن ءۇش بىلىكتى لوگوپەد مامان قىزمەت ەتەدى. ولار وسى باعىت بويىنشا تاجىريبەدەن ءوتۋشى ستۋدەنتتەرگە دە ءتالىم بەرەدى. جالپى, پەداگوگيكالىق كوللەدجدە 7 ماماندىق پەن 12 بىلىكتىلىك بويىنشا كادرلار دايارلانادى.
